روحت الليلة في قلبي حيرة بهذلتني ضحكة و غزرة عينين و زاد الكاس عليا بترهويجتين حلوين
حبيت نحكيلكم على الهزة و الدزة و التمهميشة و المرا الي حست روحها كيف الريشة
قالي: اش تشرب
قعدت نخمم ...
غزرلي و قالي: مانيفيك!
قلت قبل ما الصوت يخرج... ماك فية كيفاش عرفت
زادها : بلان
الدنيا ولات زوز و نسيت البسيكوز متع الجرابع المتجربعين
كل كاس بكاسين و الشيخة من عينيه لراسي اقوى مالاسبيرين
عشية تاريخية تتقيد كارها في اجندا البشرية
روحت و الدنيا فيا و الكرة الارضية تلحلح بيا خليني نكمل دورتي لا تقوم حرب كونية هههه سخفتني سيبتها و بستها و قلتلها دورة و الا عشرين مانيش بش نسيب هاللحظتين
و انا مروحة و افكاري ملوحة شطرها فيه و الشطر الاخر عليه قالي: مانيفيك على خاطر عينيك !!!
طحت, دخت, و شعرا لا صحت.... حطيت قلبي على شفايفو... و كي خممت الي ممكن الدنيا تدور و ماعاد نتشاوفوا.... حطيت روحي على شفايفو ....و خليت قلبو لغدوة و الا لبعدو و الا للي بعدي كان صار لازم بعدي .....و لا حلفت و لا تكتفت و لا وعدت و لا توعدت.....
روحت كالطفلة الصغيرة هازتها التنطيرة ....تجري و تتلفت و تغني من جواجيها للدنيا و ماليها و الفرحة في عينيها علي صار و ينجم ما يكون و الي كان و ينجم ما يولي......
عشية قصيرة و برشا حيرة..... و انا المرا طفلة صغيرة في يدها عروسة تتمنالها في كروسة بش تحوس بيها في شوارع مكبوسة و ترخيها كيفما ترخي بوسة.....
كلمة و كلمتين... و الكاس كاسين.... و العالم نحنا الاثنين.... ناسين متناسين منسيين اخطاوني على رحمة الوالدين....
روحت و شطحت و دوحت بروحي.... و قبلت للمراية و غنيتلها غناية و غنايتين وقوفا على اطلال المحرومين.... و من بعد كونكتيت ياخي الهم و الغم لقيت "مرحبا بيك في العنكبوت و هاو قدامك المكبوت"
هل مناظر يا عبد الناظر!!! و لا في الكوشمار و لا في الدمار الي يحب على اربعة و هو سنيه مقربعة و كالسبالة عندو في الكاواتشو فويت....
و الي يحب عالضرب في الشوارع بالسوط و قتلي باحت الاصوات على حرمة البدنات متع النساء في الشوارع و البيوت.....
و الي يحب يقتل غير المسلمين كانو الدين عندو تركة ورثها عالوالدين.....
والي يحب يقص الروس و كان يرا موس يلاما يعيط كالجاموس و الجاموس ماهو ولاو عاملينو ناموس قالك هو الاخير يحمد سبحان الله سبحان الي حرم عليكم ماكلة القرط.....
و الي يحب على بنية و الا ثنين و الا عشرين يطري عليها شيب المتسوفجين.... و كان ماتت يدفنها و يقول سنة الحياة و الكلنا لغادي راجعين..... وهو ناسي الي الطفلة هاذيكة كانت تنجم تولي مرا تروح ليلة في قلبها حيرة مبهذلتها ضحكة و غزرة عينين و تقول للنجوم براو تو نضوي على الحيين الميتين......
و لقيت الي يحب الترهيب بالاحاديث و الفتاوي الاكاذيب.... يعوي كالذيب يطرش الوذنين.... ينسيك في الفن و الفنانين.... و الشعراء المناضلين يعبيلك وذنيك بالظلام بش تنسى ضو التخمام.... يعطيه رزام عالحزام ....
و لقيت جماعة ضدي و السخط عليا: قال شنوه بارازيت هههه ما تعديتلكش صبة زيت.... جماعة هاوية الفلاحة و التفليح لا تعرف لا غالط لا صحيح .....تعفس ترفس مخنوقة و تحب الناس معادش تتنفس.... تفرض في روحها علينا بشق الانفس و المطالبة بقطع الروس يقص روسكم الزوز و يخليكم كالكلب المنبوز بعبوصو بين ساقيه و الزبلة بين سنيه.....
بو لحية وراء الايكرون يبهبر و يعيط للشهادة .... تاخذ ايه تاخذ في العصصصصصرهععع شهادة البهامة و الطحين من عند زميمة الملحدين بنت طراد :
و كان عندك ريح ذري عشرة و تربح كان البص يا مقص يلي العافية عايفتك و للمكبوت دازتك و لا عاد فايد فيك لا الصابون و لا تحكيك الماعون
اتمنى لصاحب المجموعة و الي هو يسركل في البلوغ تشليطة في فطشاتو على شكل قاطع و مقطوع على الحرب الي حلها في وجه احلى عزوزة في العالم
RépondreSupprimerBent trad, mes respects belle femme.
RépondreSupprimer