samedi 11 décembre 2010

تينزي تيلي-كوم-نيكاسيون

                                   


يحدث للمرء أشياء كثيرة ينجم يتجنّ منها ، من بينها إنك تدفع كل شهر فاتورة التيليكوم خاصة إذا تفانت هذه الأخيرة في التكركيرة
 و أنا في قمّة الغلبة و ما باليد حيلة إلاّ القلبة، قَلبة ويفي الجار، قلت نقسم هالتجربة الططولجية tautologique)) إلّي تحوّلت في حياتي إلى عادة بي ـ شهريّة موش سرية علنية و ربما مام شعبية جمهورية ذات افق تش - تراكي
فجعة على حين غفلة يتقص عليك التليفون لا بالك لا وسع و التليكوم هازة شعار " قصينا التليفون يا تونسي يا مغبون !!" , الاغرب يا حبيبي انو كي تطلب نومروك ينوقز في راسك كالكلوشات متع كنيسة نوتردام دي باريز و مخك يسوطي كالبريز و كي تعمل ريكلاماسيون يقلك نحنا كونديسيون موش منا لا من مازمبي مالة !!!
تينزي تيلي-كوم-نيكاسيون هاو اسمهم الأصلي ما فهمتش شكون جابهالهم بش يتربجوا برويحاتهم و يردوها كوم... أين هم من الكوم يا حبيبي ? أما في الكوم-نيكاسيون اه هكاكة ما كيفهم حد !
رد بالك توخر عفاكم التعالى بنهارين عالفاتورة : انت توخر و التليكوم تعملك نيكاسيون هععع قصدت كومنيكاسيون تقلك: آسف قصيتهالك.... الليني متاعك لا عاد تنجم تتصل و لا عاد ينجمو يتصلو بيك ! و المصيبة-العصيبة الي الكلو مالبوسطاجي يوصل لراس النهج يحط جوابات الحومة الكل عند الجار ايه موش بش نجبدوا البوسطة خاطر انجم نبات نكتب و الا نصوف دايير ما علينا حشاكم كالمستفعل فيه تهز الفاتورة لأول وكالة ههه
و هي وكالة ? وكالات الحفصية صدقوني الهيلتون عليها اما في الحفصية  ما يعملهملك حتى حد و الكلها زواولة ولاد الشعب(ة) هالتاء سامحوني تيك نرفوزي لا اكثر و لا اقل
وكالة التليكوم-نيكاسيون في البنفسجية حاجة عالمية ريتو "الكرايزي هورس" قسما عظما جبانة:
الساعة لازم تلقا واحد و الا ثنين الرب حشيش نعذرهم فاتورة بمليون و العيشة فول و كمون ..... و يقلك خلص و بعد احكيلي, اشكيلي, ابكيلي انا الكوم-نيكاسيون الصدر الحنين و مالغلب الدمعة في العين.....
لازم تلقا عشرة و الا عشرين في حالتك طايحين لاعبين فيها فاهمين و بلغة الحقوق واعين و في دفع الضرر مكبشين اما دا بعدك يا جربوع المجربعين!!! الكوم-نيكاسيون عندها مالمحامي ألفين و عالركاكة قادرين و بما انو فمة ناس محلبين تلقاهم واقفين مخاخهم موقفين قابعين في الصف و أمام الشباك ماثلين تقول عاملين جريمة و إلا ثنين خضر مصفرين و جوهم كازين يسبو في الوالدين و الكببل ولادهم الفايسبوكيين و إلا المدونين هه
و تلقا الشيف داجنس ملة شانس... بيرو يدور الزيرو كان كل واحد يدخلوا و يدخلوا الفاتورة و عالتدخيلة يمدلوا دينار, في نهار يدخل هم مصوار و ريق البيروات ما فيه عار !  هالشاف ديما يضحك ديما زاهي عمرو ما يعيط و يصيح و ريقو شلاكة و قبيح و يخرجلك جمل, جمل كان جيت ناقص حنان دقيقة تطيح
سامحنا و امسح فينا و موش منا راهوا نحنا ما نقصوش اما كل شيء توماتيكي و نحنا رانا ما نقصوش و موش مازمبي عاد وقتها لا تولي امريكا هي الي تقص و علينا الاتصالات تبص تفسي تطلق في الريح و انت داخل خارج و ماكش عارف الغالط مالصحيح و روح حبيبي روح تبكي و الا تصيح
ايه كتكبش و تزيد تربربش يهز الشاف يدو و يحطها على صدرو ينزل على فلسة  تقول خلسة و يكلم التيكنيسيانات و يتصوعب و الا يتعوصب هكاكة هووما ادرا بالسيركويات و تسمعوا
هات فلان عيطلي فلان و يبدا يمضغ في الجمل كاللوبان يراه في شعرو هالمصنان ! و يقلك اتهنى تنجم تروح و امورك في الجبن وناقص كان التبن  لتستقيم رسميا كمواطن حيوان...
خدمتك تستنى ارتاح جميعة و اتهنى
تحب كي تروح تتفرج في فيلم مزيان انزل عالضبعة و الغثيان
تحب تامساني مع حبيب القلب احسب روحك بلعاني طفيتو و تو تشوفوا قداش يعاني
تحب تقرا جريدة و الا ثنين اخطاك القراية تعب العينين
تحب تنسى جربوعستان و تعانق الافتراضي اخطاك و اقعد راضي
هاذي كلها شعارات تنجم تهزها اتصالات تونس في الاشهار من غير ما تدفعلي سبعة مياة مليون اما فقط ترجعلي التليفون
و بيناتنا اورانج !!!!

1 commentaire:

  1. Ce commentaire a été supprimé par un administrateur du blog.

    RépondreSupprimer