mardi 31 mai 2011

فل يتّهمني الجميع !!

فليتّهمني الجميع !!
اكره الصحفيين التونسيين و آلة تصويرهم المحدّقة في آلامنا ... اكره السياسيين جميعا و لا استثني الشرفاء فجلّهم مشاريع قمع مؤجّلة.... اكره جميع الاحزاب و كلّ الجبهات والحركات فكلّها ثبوت و جمود و قوات جذب للوراء... فلتّهموني!!! اكره كلّ العقائد والتيارات الايديولوجية فهي مشاريع بتر للجمالية الغريزية فينا.... اكره كلّ الشعوب فهي في الواقع قطيعة بين المنشود و الموجود و اكره نفسي لانّي كلّ هذا و هذا كلّ ما لن اكون....
فلتتّهموني!!! اكره كلّ الصفحات الثورية و اكره اغتصاب التكنولوجيا للثورات.... اكره سرعة تمرير المعلومة حيث تبقى أنّات الشعوب مكتومة.... اكره دور النشر جلّها كلّها تلك التي نثرت الشعراء سلعا للبيع.... فل تتّهموني !!! اكره الكنائس و المساجد و المقاهي فهي بمثابة مقابر جماعية تتراكم فيها الأرواح فلا الجسد روح و لا الروح جسد.... اكره اخصائيي الاقتصاد و ارقاهم المشفعة باصفار الفشل البشري على تجاوز الربح و الاستثمار !!
فلتتّهموني!!! اكره رؤساء الدول ذات الاعلام المنكّسة... اكره الدول المدنّسة بدماء شهداء لم و لن يدفنوا فهم مواطنون غير أحرار.... اكره كلّ الحقوقيين و حتى من سُجن منهم فهم دليل ملموس عن غياب حقوق الانسان... اكره كلّ القنوات الوطنية و العربية فهم طابور خامس او عاشر للمرار كلّ ما اكره فينا قدرتنا الإلاهية على تناسي لحظات الفرح اللتي تؤججّ فينا الاستمرار .... اكره الهيئات و اللجان فهي مسرحيات خلف ستار لا تذاكر تباع و الحضور خشوع و انصياع ....
بل اتّهموني : اكره من اضرم النار في جلده و اصبح بعد الاموات رئيس الثوّار و اكره ايضا الثوّار فصورهم تباع و تلصق و احيانا عليها نبول ونبصق و هم نبض ميّت لمفهوم ثورة اشعلت النور بعد النيران و ها نحن نصارع الظلام و الظلاميين و بقايا عهود الاستعمار اكره كلّ الأغاني و القصائد و الافلام فكلّهم عجزوا عن قيادة الشعب للمنام اكره النوم فقد تمضى عقود و تُغدر العهود و يُمضى بنضالتنا حيث لن تعود ...
اتّهموني !!! بالسلاسل لمأوايا الاخير قودوني : حديقة من اقحوان... اكره ان تقفوا يوما فوقي او امامي او ان تذرف دمعة فتفسد منامي اكره نفسي حين افاجئها بالدمع تكسي صفحات دواوين درويش لوركا نيرودا آراغون بودلير دنقل النوّاب اكرهها !! حين افاجئها تصنع خياما للمعاني اللاّجئة في زمن اختار فيه الكلّ ان ينضوي تحت الوان مختلفة للاستعمار اكره نفسي او اكره روحي ما الفرق لغة؟ لهجة؟ام اغتصاب فكرة لحروف اهترئت امتثلت ركعت و تحجّبت لبشر خان ؟
اكره كلّ شيء الآن تقريبا سوى التقريب : تقريب الحرف من الظرف و تقريب اللغة من المعنى و تقريب اللامعنى من الكره علّه ينجح حيث فشل الأطبّاء اكره الأطبّاء و خِرَقَهُمْ البيضاء تعاليهم على الموت و برودتهم اللاذعة في اعلان النهايات لمن لم ينجح يوما في كتابة او قراءة المقدّمات !! اكره المؤخّرات كذلك فهي اختزال لحمّى الروح بعد عصف العشق و اكره العشق فهو مرتع آمن للهذيان و اكره اصابعي حين لا تقف عن الكلام !!!
اتّهموني ف"أنا لست لي" و حتّى كون
ي لست لي، ليست لي !!!

dimanche 22 mai 2011

excusez-moi ....

Excusez-moi mesdames et messieurs, je vais vous déranger ! je voudrai une petite pièce juste pour pouvoir manger !! J’ai des gosses à faire vivre mais j’arrive pas à bosser !
Oui mesdames et messieurs, je peux peut-être vous déranger mais je suis un gars sérieux qui n’a jamais dans les caisses de l’état puisé !
Je vous demande une petite pièce car ma fille a besoin de lait et moi j’ai des diplômes et ma seule expérience : c’est d’avoir chômé !
Excusez-moi mesdames et messieurs, je sais qu’en fin de soirée, je vous donne la nausée, je suis la seule image de vous que chaque matin vous chiez à force d’avoir petit-déjeuner !
Excusez-moi mesdames et messieurs, ma fille a besoin de lait, donnez-moi une petite pièce, j’avoue que je vais me saouler car ma fille mesdames et messieurs en Afrique est morte avant d’être née : cause HIV !

p.s : texte écrit après une soirée qui a fini à l'aube, dans le métro Parisien !

mardi 10 mai 2011

آخر حكاية و خرج !!!!


chut libre

هاني جيت . من بلاد بعيدة وهي قريبة جيت . بلاد غريبة ، لغتها صعيبة حروفها السكات . نعرفك تعرفها ، ممكن ساعات تمشيلها ، كيف حورية البحر تعنكش في ذيلها وتقلها هزني لبعيد . نزيد؟
bent trad  
زيد !!

chut libre  

أنا ريتك جاية تتبسم والموجة تلعب بيك . الشمس زادت حلات بيك . بياعة شمس صغيرة ، دينها الحيرة ، الخطوة رزينة ولو مذهوبة الشيرة ، ريحتك بالنسري على خدك نوار ناس بكري ، ساعات تحكي سوايع وتهتري وساعات لبلاد السكات تمشي تجري . عقاب الليل والذيوبة هازة الذيل نسمعك في سكاتك نجي نبني بيت شعر في جنابك ونقلك : نزيد ؟

bent trad 
زيد، زيد !! قلبي حيا كيف كلامك هبط في قلبي مطر غزيرة متع شتاء دافي !! حاولت نهرب اما علاش نجافي القلب الي زنس كيفي مصافي ؟؟

  chut libre
قلبك الحامي ، نحطو قدامي ، عريان دامي ،بيه زهوي وغرامي ، نقلوا اتكلم احكيلي ، يسكت ويطرشق ، نشوف آش فيه نلقى غشيرة تحت زيتونة ، تستنى ممحونة ، في يديها عروسة شوالق و زربوط ، محاذيها عصفور حيوط ، الدنيا بخوت وبختي على كف الغشيرة مخطوط . أقرالي !
bent trad

نقرالك الكفّ و نبوحلك بلّي يستنّى فيك ؟ و لاّ نقرالك آش كتب قلب الغشّيرة تحت الزيتونة في ظلمة لياليك؟ ولاّ نقرلك شعر ما كتبتوش ليك امّا سرقتو من عينيك ؟ نقرالك و صوتي بعيد عليك ؟؟؟ نخاف يسمعوني الناس و يرميوني في الاحباس و لاّ يزفّتوا بيّا الكيّاس !! نقرالك كيفاش و انا عمياء بلا عينيك ؟؟؟
chut libre 

أقرالي كيفاش نجمت بعد هاك النهار تكمل تعيش ، وأنا إلي من نهارتها طاير وفوق اكتافي نبتلي الريش . احكيلي عالمخبي في أكحل عينيك . ليل ولا مسك الليل ؟ باش نفهم سرهم ، ونجي نحلهم وعليا أنا وحدي نسكرهم قداش يلزمني من خيل ؟ احكيلي عالترهويجة تحت الشوارف ، وقتلي العينين تتكلم والقلب ما هو عارف . احكيلي ، ونتي تحت الزيتونة ، قالولك الأوراق إلي تتدرجح مع نسمة الخريف إلي باش يجي نهار تلقى انسان يشبهلك كيف الطيف ؟ قالولك : لا تغرق ؟ رد بالك تشرق ؟ احكيلي وإطرشق ... أنا هو العصفور إلي سنين محاذيك
bent trad 

من نهارتها الوقت وقف كيف قلبي رفّ .. العينين المتوهّجين دخلوا كالسكّين في قلبي المسكين ... خاف و مال و تعوّج و كيف عليك لوّج و ما لقاكش دمعو سال و كتبلك موّال كيفما برال ... من نهارتها عينيا شاردة و الوجيعة في وريدي واردة و الجواجي بيها مبليّة : زعمة حبّني و لاّ انسان و يحبّ البشرية ؟؟؟
من نهارتها تزورني على غرّادة التبسيمة كيف نتفكّر اللحظة الحنينة الّي ما لمّتناش و نزهى كيف نقول اللاّ ما ثمّاش و ساعات نلقى روحي هاربة ونتمنّى تروّح و ما تلقاش .. ماتلقانيش ....
chut libre 

موش على كيفي ، وموش على كيفك ، على كيف الغزرة ، والغزر منّك نحرة . عينيك سيفك ،و كيف المرة الجاية نسرح في خريفك ، و بالغدرة يعرضني طيفك ، ارحمني ما ترجمني ، وبضربة وحدة سيح دمي خليني نرويك ، و ما تخليني ليهم ، هزني لعينيك ، كيما ذبحتني سكنّي فيك .

في كل خطوة نبدى نستخايل زعمة خطوتك فين ؟ زعمة في هاللحضة شكون يغني للبوڨرعون ؟ و نحكيلك عالجريدة الماسطة و تلشليشة القهوة ، نحكيلك عالجيران والعايلة وشواطن الماضي ، ونسب الراطسة ...ونتلفت نحب وقتها نلقاك ، نهز عينيا للسماء ونتمناك ، نحطك حذاية نغير ملي حذاك ، ملي إنت زاهية يسمع في غناك ، ولي إنت مريضة يعطيك دواك . ونمرض . نحب البشرية صحيح ، أما ما نعشق كان إلي في عيناها لقيت الداء و- الدواء
bent trad
و كيف قريتلك   هاك هربت !! كان زرتني و ما لقيتنيش و قالولك "ماتت" ما تبكيش و للدنيا ما تشكيش !!! كيفما تولدت فيّا حاجات معاك كيفما في غيابك فيها ترزيت !!! في بالي فمهت و انت كنت متفهّم و كيف فقت بالوجيعة قعدت مبهّم !!! في بالي امّا الّي في بالي موش حقيقة و الدليل واقفة نمشي نضحك ما نبكي و انا شاعلة فيا اكبر حريقة !!!


lundi 9 mai 2011

في باب بحر


في باب بحر صبّت المطر : وفى القبر، قعد الخبر متاڨي عالحيوط و هرب العنكبوت و جاء الزّهر و في يدّو خبر: ياتوانسة يلّي غبنوكم راكم احرار و شعب ثوار ما تخلّيو الدمار يستعمر القلوب و الديار !!! و هبّت نسمة في بومنديل، تاكسي ليبيا خيالو عالزفت ثقيل يفكّر بالطاغية الي لا يطيح لا يميل مذوّق شعبو الويل !!!
و هزّتني سقيّا للشوارع التالانيّة و تفكّرت و انا قاطعة الثنية ليلتين قبل اربعاطاش البوليسة و الاحناش والشوارع الاحباس ملاّ اوباش !! و وصلت في تيهتي لباب سعدون و متمنية يكون كاسيه البوڨرعون و حيوطو يصون اما الوقت افيون !! زبلة مكدّسة و حلمات مهرّسة و ثورة ولاّت متمرّسة !!! اصوات !! عياط !! صياط لا ماطراك !! الحكام اتاك !!!
           
ناخو لواج و نهرب لقليبية و نلقى المنصورة كيف الصورة الي الوقت ما يبدّل فيها شيّ ؟؟ و لاّ نمشي للكاف و نلقى الاجبال اكتاف و الڨمرة و الشعير و جدّي الّي باع التراب و ارض الخير ؟؟؟ لوين نمشي ؟؟؟ نرجع لباب سويقة !!! عادي زادة فمّة حريقة : دار من عهد الاستعمار: تولدت فيها امّي ومن غادي بدات حياتي وفي باب سويقة كالدنيا تضيق نلقى في شقوق البلاص الخارب معنى لذاتي ..
                   
و الزلابية متع رمضان و شيشة عزيزي الكبران ... ديما عاقدها ما عاجبو شي اما كيف يتلموا بيه بناتو يولّي كيف البيّ ... و ممّاتي و سفساريها الحرير و خطوتها تقول نسمة تمشي عالشعير و الكحل في عينيها و الزمان يتعدّى عليها و خاطيها ... و الكانون حامي سخون في باب البلاص يطيب عليه الطاجين قبل ما تشعل الشيشة ... باب سويقة زادة شاعلة وين نمشي ؟؟
و نتفكّر قدّام الشبّاك هاربة نجري ضاربني الغاز : صينيّة البقلاوة و الكوّاش يغنّي ليلة كاملة "ياحلاوة" و الشيشة الي تكسّرت بعد عزيزي تبقبق و دموعي مالغاز و لاّ مالشَوية ترقرق ...اصوات !! عياط !! صياط لا ماطراك !! الحاكم اتاك !!! و نتفكّر الجارة اليهودية صاحبة ممّاتي و رفيقتها في الثنية ... عزوزة عكس ممّاتي لا ريتها نهار منبوزة مصقّعة مرقّعة حمّيرها احمر بوڨرعون ... زعمة الّي يضرب فيّا و لاّ في اجدادي يخون ؟؟
               
لافايات لافايات !!! ايه باهي امّاضربني الصبّاط و خايفة نتفكّر و يزيدو الدموع في عينيّا نتفكّر في بابا فرخ صغير فوق السطوحات يربّي في الحمام و كيفاش ولّى مع بنتو ليوم لجام !! خايفة نشوفو يكوّر حفيان الغشّير في وقتو تباعت التلافز بش يسمعو  "سيرة الحبّ" و نحنا الحبّ في زماننا لا يتقرى لا يتكتب !! خايفة نشوفو مروّح مالكليّة كان يتعارك مع الخوانجية و انا ليوم للعركة مالقيت ثنيّة !!

نخل شارع مصر و ثورة حتى النصر ! النصر موش الحيّ الجديد الي كلّو سيمان و حديد !! النصر الاصوات الطالعة للسماء ومهبّطة دموعها مالفرحة كيف مطر الشتاء ... النصر موش صلاة وقت العصر على ظهورات الشوارع الباركة ... النصر رجال و نساء لبلادهم راكعين و ماهم خانعين لا لهيبة و لا لحاكم ملّخر علّخر يسخّف مسكين ... النصر موش شعار يتّرفع كيف يسقط الاستعمار : النصر كيف الشعب يستعمر الشارع و يصنع شاعر بارع همّو يُرْضِي البلاصات الخاربين و ما يَرْضَى شعبو حزين !!!

 
 

jeudi 5 mai 2011

تونس

تونس ارحمني ربّك كيف ما رحمني حدّ !! تعبت منّك وتعبت عليك !! لا عارفة نسبّ الّي معاك و لاّ الّي معاديك !! الكلّهم ولادك و انت ادرى بمّاليك ... انا بيك مبليّة و انت ربّك بالدمع عينيك !!! يا تونس آش بيك ؟؟؟ عارفة السخانة تقلي فيك و تهتري وما فمّاش شكون يداويك !!! آما اصبر الكلّنا حاجتنا بيك حرّة متحررّة و ما حاجتنا كان ببهجتك و زهوة لياليك !!!
تونس منّي ليك هديّة وجيعة موش بالنقمة مبلية : راني تعبت و نحبّ على ثنيّة يا انت تورّيهالي يا راني ضايعة، مبليّة فكّ عليك !! و سيّب عليّا !!! راني حاجتي بيك عروسة بشعبها متهنيّة !! و لاّ الموت ارحم ملّي نشوفك بايعة و مشريّة ???!! تاريخك نحبّو متع لصحاب موش متع كمشة "قحاب" ؟؟؟ و آش عندي ضدّ "القحاب" الاّ انهم يبيعو في الشيخة للبشرية ؟؟؟
تونس ارحمني و سيّبني نحلم بعينيه الشعب الّي كليت العصا ليه و عليه ؛ خلّيني نقول واقف موش موقّف و طحينو يتدفّق، خلّيني نقول عاشقك الشعب و موش شاهيك وشاهي يعرف ثنيّة شهاويك !! خلّيني نمنّ ربّك يا تونس علاش تحبّني نكفر ؟؟؟ خلّيني مرّة نركع من غير مالحزن يلكع المرا الّي كبرت بحبوساتك و ببوليسيتك و بقمعك و بقلّة همّة ماليك !!!
يا تونس امان ماعادش عندي قلب كان ليك و كان حبّيتك نجّم الراجل الّي يعشقني بجنبي نخلّيه !! خلّيني مرّة قلبي نهنّيه و نغوص في عينيه الراجل الي قلبي غاويه !!! اي لها الدرجة ما قلبي يتهنّى كان ما تونس تلقى ماتتمنّى !!صدّقوا ولاّ ما تصدّقوش عشقي و عشق البلاد ما يتضاربوش !!!
سكرت وحدي، حبّيت وحدي، تظاهرت وحدي، بكيت وحدي، و نتمنّى توّة وجيعتي نقسمها مع دين والديك !!