jeudi 29 septembre 2011

قلبك لاهو ذهب لا هو فضّة !!

يصير اليوم :
يسرقولك ضحكتك و يضحكوا عليك
يسرقولك ثورتك و يقولولك ستنى العيد تو يجيك
يسرقولك قلبك و يقولولك الحبّ صعيب عليك
يسرقولك حلماتك و يطيّروا النوم عليك
يسرقولك كلماتك و هوما يكذبوا عليك
يسرقولك وجيعتك و يحاولوا يفرهدوك كيكدس الهمّ عليك
تحبّهم ماك طالب شيّ
مادام بحبّهم قلبك حيّ
قبل ما يسرقوك و ينزلوا عليك بالكيّ !
تعطيهم بش الّي سرقهم قبل تنسّيهم
امّا لا ما عينهمش قلبهم ما عطاهمش
و سرقوك وقتلّي كانوا ينجّموا يقتلوك
ما خممّوش دموع الدمّ ما شافوش
و حتّى كان شافوا ما يرحموش !
ناس حاربوا ما عاشوش كيفاش تحبّهم ما يسرقوش !؟
و قلبك لاهو ذهب لا هو فضّة !!
 
قلبك لاهو ذهب لا هو فضّة !!
قلبك كبر بالكبّة !!
قالوا عليه شيوعي و يخون و ما ينجّم يصون
قالوا عليه ليبيرالي و في عشقو استغلالي
قالوا عليه متخونج و راعيه الظلام
قالوا عليه ملحد ما يمّن و ما فيه امان
قالوا عليه شاعر يسكر ويبيع كلامو: داعر !
قالو عليه فنّان خوّان يسحر بوخوخو بالالون !
و قلبك سرقوه ولا هو ذهب لاهو فضّة !
قلبك بنيتو بدموعك مع كلّ سبّة !!
و يامة قالوا على قلبك كلام
هابط عليه كشكارة سميد على خدّام الحزام !
سرقوك و خلاّولك الوجيعة
خلاّوك لا خلقة لاخلوق لا صنيعة
سرقوك و خلاّوك للهمّ بير
متّكي لا تضحّك لا تبكّي كالزّير
خلاّوك ياقلب بعد السرقة ضرير !
لا خافوا عليك مالكيّاس
لا خافوا يهبط ظلامهم عليك فاس
ما خافوش عليك سرقوك و هجروا و تركوك
و يمكن كان نهار يعرضوك ما يعرفوك
خلاّوك حافي و ڨرسان و جيعان
تطلب تساسي من ايّ عينين شوية الحان
يمكن في هالبرد تموت علقلية شبه فرحان
امّا الّي يسرق يغلب الّي يحاحي
هو يشدّ ثنيتو و انت تولول في البطاحي
و كان قلّقت الناعسين يمكن يرجموك
يا قلبي لاك ذهب لا فضّة امّا احلامك هلكوك !
 عندك الزّهر يا قلبي
مازال عندي مالدموع مطر
تسقي و تنبّت
الزرّيعة في التراب تثبّت
و تو يطلع نوّار البوڨرعون
أحمرو فيك يسيل و يطيّر الهمّ
كان سرقولك آخرة قطرة دمّ
عندك يا قلبي صفحة بيضة
اكتب بيها الوجيعة قصّة للكبار
فكّرهم كيف كانوا صغار
يحلموا يطيروا للڨمرة في عزّ النّهار !!

mardi 20 septembre 2011

العروسة


زغردوا يا نساء و صلت الصبيّة
متلحّفة سفساري و مسبيّة
خلاّت قلبها و جات المبليّة
و الليلة هاي وصلت،
عروستكم هابط عليها عزاء
قلبها خلاّت و قدّام حبيبها ركعت وصلاّت
و عليه حفات و دمات
هجرها يرّاه مات خير ما تقتلو كلّ ماتلقاه مع مرا اخرى بات !
اضرب عالطبلة يا طبّال
غطّي على عياطها
غمّ على اصواتها
هاتوا الحنّة زينة الجنّة و زغردوا يانساء
جهنّم فيها نيران رشّوها بالزّهر و الماء
العروسة ماتت في هالليلة السعيدة بالحيا
مدّت يديها هزّت ساقيها
تصبّ حبيبها في جواجيها
و شكونو الغريب الّي بش يسقط عليها ؟

عرس و طبّال : عالم هبال !
كسكسي و علّوش : تخم المخاخ قبل الكروش !
تاي و حلو : و مرّ يتعدّى العمر !
و تفرّقوا الثنايا و ياما هدّوا ولايا
تلقى روحها متصدّرة على جبل !
متلحّفة الأمل يهرب بيها اللّيل في صحراء كي جمل !
زغردوا يا نساء استروا فضيحة قلبها الّي هوى
هواء
خنقة
شنقة ،فلقة : تبسيمتهم و حارقة فرحتهم !

عروسة في همّها مغروسة
عروس نبّت في وجيعتها الزّروس
بخور و عجعاجي وجيعتها تلاجي
جاوي و كمّون و الفمّ كاتم مغبون
حنّة و حرقوس و قلبها كالقوس :
قوس باب الخضراء، بالوقت تترمّم و تبرى
قوس باب بنات، هذا الوقت الّي عليه عاركت و عيات
قوس باب بحر، كان هجروا الموج ازرعوه زهر..

ضحكت العروسة بليعتها
قلبها تباع ملاتو اوجاع
امّا خيالها ليها
يخطفها و يهرب بيها و يلهّيها
طفى الضوّ، دموعها نوّ
و هبط الغريب كالصّاعقة عليها
رجّها رجرجها و لا لحظة هيّجها
ترمى فيها كالشكارة في البحر


غطس عام يرّاه يغرق
كيفاش بعماه يرى الشمس تزرق !

هي تدزّ و هو يهزّ
في بالو في نفسها حزّ
كان صاب نفسو راهو عزّها
و على النقمة و الوجيعة ما لزّها
بكات الصبيّة ولاّت مرا
مهمهت تنهيدة و غنّات للفجر :
أمل حياتي يا حبّي غالي
خبّيني في جنبك خبّيني
و سبني احلم سبني
ياريت مماتي ما يسهّرنيش "
نسات امّ كلثوم و بدّلت كلماتها
كيف ما قدرتش تبدّل حياتها !
شهّدت : اشهد ان لا الاه الاّ ألم موت الحبّ في الحياة
و أشهد انّ الله شاهد على اغتصاب شهدي
و شاهد على موت الاحساس فوق نهدي ... "
و جبدت كتاب و قرات : "
ولا تتعجل فان اقبلت بعد موعدها/فانتظرها/ وان اقبلت قبل موعدها/ فانتظرها /ولا تجفل الطير فوق جدائلها/ وانتظرها/ لتجلس مرتاحة كالحديقة في اوج زينتها/ وانتظرها ..."
ستنّاها ما تزربهاش و سايس عليها لا ماتدزّهاش
ستنّاها ما تطيّرش حمامها ما تهربّهاش
بالشويّة تو تلقى الثنيّة ستنّها ما تسبقهاش
و كان وخّرت ماجاتش ما تلومهاش
ستنّاها، لحظة تمنّاها ما تعيّطلهاش
تي علاش ؟؟ خلّيها تسرح و كان تحبّ
ستنّاها و لا ما تتستنّاش !


p.s: certains mariages sont heureux mais le bonheur ne m’intéresse pas !

vendredi 16 septembre 2011

سهام

الصباح بكري و انا نعمل في قهوة في العاصمة ريت حكاية هاي جاية !!
ريت سهام بحذا لونيفير
على طاولة هاززها النّوم
لا هامّها حسّ، لا هامّها شكون بيها يحوم
سهام رقدت على طاولتها
باتت تخدم على عيلتها
ولاّ الدنيا خدّمت عليها حيلتها
برّة لوّج على حكايتها
يامة سهامات كلاتها الكيّاسات !!!
سهام خدمت بالليل
في الصباح ظلّها ثقيل ذليل
من فوق الطاولة تهزّ راسها: مستحيل !
حاشمة من كلمة مسّخة الي ترميلها فيها العينين !
فوق طاولتها دبدوب ــ صدّق اولا تصدّق ـــ مندوب
كيف سعدها على خليقتو مكبوب !!
سهام و انا راقدة هي مرقدتش
تتكبّ على لقمتها تحت الطواول بين السّراول
سهام و انا نشرب في قهوتي هي ماشربتش
كان الكاس الّي يسكّت وسواسها الخنّاس
تعدّى القهواجي صياحو يلاجي
"سهام فيق سهام قوم !! "
ماهياش راقدة سهام بالنّوم
اليّ مرقّد سهام ليلها تنهيدها المزموم !
عاليمين في لونيفير صحافي
هزّ عينيه مالجريدة و ترشّف و عاود غطس
عاليسار ڨاورية عريانة حمراء كيف التريلية المشوية
مدّت وذنيها لعلّ لغة العكري تلاقيها و تفهّمها آش صار
للمواطنة التونسية الثورية الّي جابت للعالم شهيلي الحرية
ثورية يا والله مسرحية ويني الثورة تجيش تقيّم هالمسبيّة ؟
سهام قوم سهام فيق ! "
هبط عليها القهواجي صياحو يلاجي
حبّ يستر عليها يعرف خدمة الليل آش تهدّ امّاليها
مدّلها يدّو لقى بيّاعة الهوى
لقّالها صدرو حسّ بسخانة الفناء
تصرّعت سهام: تخميرة !
بابا حيّ بابا ميّت بابا كواني بدات تعيّط !
دبدوبها لابّو العرق : عرق الفضيحة !!
سهام كيف تتخمّر تولّي قبيحة
للمتعدّي للمتهنّي كلامها طريحة !
"سهام قوم سهام فيق !!"
سهام موش انت الدنيا قحبة !!
نحنا الغنم و هي الرحبة !!
هي السكّين و نحنا اللّحمة !!
تو يطلبولك الرّحمة !!
و الاّ يرجموك و يحرقوك كالفحمة !!
سهام ما تفيقش علاش فايقة
الدنيا ظلمة ...