lundi 6 mai 2013

تونس وجيعة


تونس وجيعة
تونس ليعة
تونس بكية بعد بلعة
تونس فظيعة
تونس كفّ و رشّ و تركيعة
تونس خليقة و صنيعة
تونس دمّ بلعيد
تونس عيد موش سعيد
تونس تبكّي
تونس تلقّي
تونس عملت من ولادها عزاء مسقّي
تونس ألم
تونس حزن و برشة همّ
تونس برد بين الضلوع
تونس وحش و جوع
تونس حلمة تطيّر عليك النوم
و تخلّي فجرك مزموم
تونس دموع
تونس حرّ و مقموع
تونس غناء موش مسموع
تونس تحبّها و ما تحبّكش
تونس تحڨرك و ما تقدرّكش
تونس مظلّمة
تونس في خيرها مسلّمة
تونس تقطع الشاهية
تونس في الغمّ ديمة لاهية
تونس توعد و ما توفيش
تونس تمرّض و ماتشفيش
تونس سحاب ما يتعدّاش
تونس شتاء ما وفاش
تونس قمح يبكي عالشعير
تونس عايشة بقلّة الخير
تونس تحبّ الّي شاريها
و عاطية بظهرها للّي عاطيها
....


تونس الرابطات
تونس العياط
تونس السياط
تونس الزياط
تونس قال المرزوقي كلسيطة بلا صبّاط
تونس الرجلين المبتورة
تونس العينين العورة
تونس حرقان العلم عالكورة
تونس مزطولة
تونس تتكيّف تحت الحيط
تونس تتحبس كيف تكتب عالحيط
تونس تولد و تهمّل
تونس تحرّر و تكبّل
تونس كفّ عالخليقة
تونس في الشعانبي تطرشيقة
تونس تبكي
تونس تخاف
تونس تحبّ
تونس تسبّ
تونس تكحّل قبل العينين القلب
تونس تراب فيه ألغام

تونس إجتماع مرشوق بالحجر
تونس سينما خالي
تونس مسرح غالي
تونس جامع يكفّر

تونس تنفّر
تونس نافورة بلا ماء
تونس المظيلة بلا ضوّ
تونس النصُب في الباساج
تونس للفكرة براكاج
تونس غدرة و نشلة و براكاج
تونس ساكاج
تونس كاج
تونس قفص و نحنا الدجاج
تونس فيها الكلاب تولّي أسياد
تونس الفار يولّي فيها صيد
تونس دمّ بلعيد
تونس دمع يفيض و يزيد
تونس الجلاّز
تونس الزبلة معبيّة الوديان
و ماعاد بين الوديان الحطّاب يبان
تونس الفروخ فيها تتهزّ ساقيها
و المجرمّة تلقى مؤتمر حاميها
تونس غصّة
تونس في الكار الصفراء رصّة
تونس كريز
تونس كزّة
تونس نبزة
تونس شهقة
تونس ... بلادي .

jeudi 24 janvier 2013

يا حسرة ...





بسملت و صبّت كاس
خرجت تنهيدة و تحلّت الأنفاس
شعّت سيغارو غزرت لشيباتها يكبارو
تنهّدت، تمدّت و اتكّات !
اتّكات عالدنيا و محاينها ول الوقت الّي خاينها
تفكرّت كيف كان صدرها واقف ينبت فوقو النوّار
و كيف كانو شفايفها قبل حرق الدخّان
و كيف كانو عينيها قبل ما يكمّشهم التخمام
و كيف كانو ساقيها يسريو مع النسمة في الظلام
تفكرّت ضحكتها ثلج هابط على رماد الصيف
و زنودها العراية الّي يخلّيو عين العاشق مالسماء عليهم تطيح
و فخاذها الّي يامة عليهم ساقين حفات
و كرشها الّي البال الشاقي عليها يرتاح
و صوتها الّي عيا ما شرڨع في الأفراح
تفكرّت هبلتها و الرعشة الّي يامة ليالي صادتها
و الشيخة الّي هججّت العقل و سكنتها
تفكرّت قلبها كيف كان فرخ عايق و مجنون
لا يخاف الغزرة و لا الشفايف و لا الجوجي الحامية كالكانون
تفكرّت كيف كانت تركب الشهوة و كالجواد تڨودها
صبّت كاس و بدى الّي داير بيها يدور
خانها الدهر قالت مسحور
خانها ذراعها قالت الدهر يغور
و دورّتها كاس و جاوي و بخور
هبطت دمعة و قلبت الكاس
تفكرّت من وقت الصغر قوّتها
هي العشيرة الوحيدة الّي بالوقت عشقتها .