لا باس ...

لا باس ما فمة باس ...غدوة ينزاح الهم بيكم و الا بالكاس... و ننسى الدمومات و العصي و الاحباس... قلتكم لاباس مازلت رغم الداء و العمى نجبد في الانفاس... و كان السحاب يبس راهو الريح يحس... ما فمة باس يا ناس... و جاء و مشى و ما باس... المرا الي حبتو الطفلة الي عشقتو و العينين الي فقدتو

اما ما فيها باس

ليوم نبكيو غدوة نحكيو و بعدو نشكيو و يجي نهار في البطاحي و عالسطوحات نزغردو و نغنيو... ليوم حصرونا اما اصواتنا سيبونا و طيرونا في سماء زرقاء و ارض ترعاها الفلقة... ليوم كبسونا و ما حبوا ينفسونا غدوة يحسونا احرار متحررين و يعملولنا قبل الراي رايين خلينا شايخين موش لا زم شاعلين و على فرش في صبيطار مطيشين ياخي نحنا من هنا و هوما ما عندهم وين ماشين ...

قلتكم لاباس سيبوني يا ناس

و اذا ضاق الحال عليا كالبقية بالكياس نشدوا في ثنية طويلة لا نجم كذبهم و لا السرقة و لا الحيلة و لا الركشة و لا اللغة الثقيلة:  لغة الثقافوت على شبكة العنكبوت و لا لغة المتسيسين المتغطرسين و لا لغة المتحيلين الي شادين الزيتون و التين و يحرقوا في اولاد الوالدين و يتكاوا على الدين

لا باس كيف الناس لا خير و لا خمير كان الغبرة و البعير و التنهيق و التعنيق  و لا من حشم من كثر الريق "فيق يا شفيق ما يليق بكيفك انيق" الكلها تتزبر و صبابطها تتغبر و شعوراتها مطوية و مكاتبها مفلية و يجريوا على راجل و الا بنية و ناسين المسائل الجوهرية

الكلها تترشق و كلامها يتلصق و بهامتها تتوثق في الغيناس يا ناس و لا باس

لاباس اما نتظاهروا عفسة متع ناس لباس عليها و الخير راعيها قلقنا تفلقنا فدينا قلنا نهبطوا للمدينة!  تي اما لباس ! لا تكسر لا راس و لا كاس شوية دم يسيل الهم و شوية تغويش و يوفى التدرويش يا و الله لباس هههه

لباس راجل لباس سروال حرير يرعش عالمقياس بعبروا الوسواس الخناس خلط عاللمة متع الناس يلقى روحو مشولق في الكياس كف و دف و ريق دغف ما تعرفش الي موش ديما لباس

موش ديمة نهزوا كتافنا تهددوا و ثقلت علينا الاحزان..... و لاعاد فينا واحد يحلم مطمان.....  اكثرها تحلم بالحرقة و تلقى كان الغرقة و الباقي عايش في عركة لا ربح و لا بركة ..... و الكلاب سايرة و القافلة حايرة  و الفرحة بايرة لا لقات قلب ياخذها و لا لقات شفة تنبضها لقات كان القبورات و قلة الذراعات الممدوة و الزناقي و البطاحي المسدودة .....اما ساعات كي يدور الريح و الاصوات تصيح و الكلاب تنقص مالنبيح... تظهر العلة للة : حبالة و ولادة و جيابة كانت متكية و هاي قامت صوتها يطنطن في الوذنين و يديها تفرح العينين موش باهي نهشان الراقدين هاي قامت و حتى كان رجعت نعست ميسالش هوكة تعرفوها كيف تقوم كيفاش تحمر عينيها ..... قامت و بدلت التاريخ و بول عليه غدوة غالط و الا صحيح مادامها خرجت من سكاتها و عنقت امواتها و كفنتهم بزغاريدنا و شيعتهم بمواعيدنا المؤجلة المسجلة ...  و لاباس ... كلينا و ضحكنا و ما بكينا و تلاقينا و ضاعوا ليوم يدينا اما غدوة كان تقابلوا عينينا ....عينينيا تبوس السماء و عينيهم تهبط كالعزا ...