توحشتك ...

توحشتك ...

توحشت الدورة في شوارع عروقك

و توحشت الوقفة الطويلة الي تهري قدام قلبك

توحشتك حتى كيف ندق الباب و ما تحليش

و كيف ريحتها ما تخبيش

توحشت استهتارك

توحشت استنكارك

توحشت فوضويتك

و توحشت فوضى بيتك

توحشت التراب اي حتى التراب الي مشات عليه ساقيك

و توحشت الهوى الي عبا قلبك و رواريك

و توحشت اللحظة الي خممت تعطيني فيها جواجيك

و توحشت كيفاش قتلك لا و عنقتني كون مام و ما حكيت

توحشت نحبك من غير قانون من غير كلام و سلام و لغة العيون

توحشت  نبوسك من شوافر عينيك

و نتمد ونتخبى فيك موش عليك

توحشت اضواوك و حسك يا ريتني بمخي مرة نمسك

مخي مسؤول عالوحش المهبول

الي كي يشدني ما يسيبني

و يعبدني و ما يعتقني و بسخانتك نولي نهتري

توحشتك كالكاس يطلع في ضربة مالكرش للراس

و توحشت شيختك الي ما عندها حتى ساس

و توحشت نقلك توحشتك و ما تجاوبنيش ما فيها باس

توحشت دموعي تجري بين يديك

وانت راقد فاقد وعيك و دين والديك

توحشت نسبك و نكبك و نطبك و نعميك و ما نخليك و نهزك و نرجعك و نهبطك و نطلعك

بش نولدك من جديد

توحشت كلامك المرزي و مصطلحاتك الميزوجينية

منك نعاني يا راجل برشا موش شوية

توحشت نضيع فيك و نلقى الي ضاع مني على شفايفك و خديك

توحشتك

توحشتك و الوحش فيا و ما قاتلني

لا حب يتلفني لا ليك يوصلني

توحشتك

و توحشت خلطك بين النساء

بين الي يلزموا في ذاكرتك الشعرية يتوثق و بين الي يلزمو يتنسى

توحشت ريحة دخانك في شعري, نسيت ياخي انت تتكيف ?!

جثة هامدة توحشتك

ذاكرة صامدة توحشتك

توحشتك كي تنسى

توحشتك في عينين النساء لخرين

كانو يفكروني قداشنا محضوضين

لا طحنا في حضيض المقارنات

و لا قبلنا بالبديهيات و العادات

توحشت نستنى و يهزني النوم

و توحشت كي تدخل ما هامك لوم

توحشتك كي تخليني و توحشتك كي بكلمتين على طاولة تنسيني

الي انا في بلاد الممنوعات

و تولي بغزرتين بيناتنا بيعات

توحشتك و تبليت

و توحشتك و نسيت

و توحشتك ما بكيت

الحب الي فيا يخلق من جديد

و انت يا راجل تحب تكرر و تعيد ستانست تقلبست و يمكن افلست

توحشت لسانك و كلامك

توحشت صوابعك و كتابك

توحشت شفايفك عليا

توحشتك فيا

ارحل اهجر دور نساء الكرة الارضية

و كي تتوحش اعرف الي فما ثنية للمرا المتوحشة الي بيك مبلية

و يا حبيبي نهار عليك و عشرة عليا

و في لخر نمنوا بنفس القضية !!

حب متحرر من قوانين كل مجتمعات البشرية

لا تحكم فيه عايلات و لا مؤسسات رجعية

تزج بالعشاق في دهاليز مظلمة و عينيهم تبرق حية

و كان رحلت و سافرت وتوحشت مرة اخرا و عليك شوية

ما تنساش يا راجل انا نمنوا بنفس القضية

و الا حليل عليك حرام عليا!?

مالة يزي مالسفسطة و المزايدات الايديولوجية

و ايجاني هنا عندي ليك غناء

كتبتوا بشفايفي و رموش عينيا

و ماذابية عليك نلحنوا موش على الة موسيقية

توحشتك ... اما ما فماش للحديث بقية ...