dimanche 18 décembre 2016

مع بقية الأسرار ...



موش العيب انّك خلّيتني 
و لا العيب انّك هدّيتني 

العيب انّك مدّيتني بعد ما ودّيتني 
موش غلط انّك هجرتني 
ولاّ غلط أنّك غدرتني
الغلط انّك الجواجي حيرّتلي 
و نبتّلي حبقات و لمّيتهم في محبس
و ضيفّتلي عصافر و حشّيتلي الأغصان
و جبتلي عود و كمنجة و تلهوثت عالالحان 
موش الخايب انّك اخترت السكات
و لا الخايب انت ترقد و انا فايقة نبات
الخايب انو عشقتنا طلعت تشبّه لكل الحكايات 
موش الصعيب انّك تنسى و تطمان 
و لا صعيب انّك تحيا و قلبي يدوان
الصعيب إنّك تصوّر بعد ما كحالو الالوان 
رجعّتني للحلم بعد ما قبلت بحقيقة الأوهام
هرّبتني مالظلمة و الظلم و بعد سلسلتني مع الآلام
دفّيتني من برد الهجر و طيشتلي قلبي فدنيتهم حافي عريان 
موش حرام اني بروحي لفّيتك 
ولا حرام اني في الظلام بنور عينيا ورّيتك 
الحرام انّي في آخر تركينة منّي وشمة مدّيتك 
موش خسارة عطيتني ليك مشموم
و لا خسارة اني خسرتني بعدك كلّ يوم
الخسارة انّو بعد العزّ رجعنا للوقت المشوم
هديتلي اوراق و بلومة و هربتلي بالحبار
كتبتني موزيكة و طيشتني عقاب كاسك كالبحّار
قرّبتني مالنجوم و دفنتني تحت الهجر مطلع النهار 
... العيب و الغلط و الخايب و الصعيب و الحرام ... انّك لمّيتني مع بقية الأسرار



قبل ما يوفى الكلام ... كليمتين ...

قبل ما يوفى الكلام ... خلّيني نقول كليمتين :

كان وفى عليك الهبال تفكّر ضحكتنا 
كان تقصّ عليك الهوى تفكرّ شطحتنا 
كان هرب عليك الخيال تفكرّ حلمتنا 
و كان وفى عليك الكلام ... أسمع غنايتنا 

إذا الدنيا ظلامت تفكرّني نقول صباح الخير 
إذا الصباح مسّى تفكرّ هربتنا عقاب الليل 
إذا الليل توفّى تفكرّ الي عشقة بين النجوم خير 
و كان وفى عليك الكلام ... أسمع غنايتنا 

كان الساعة تولّي سنين تفكرّ العمر في غزرتنا 
كان الدهر يولّي رزين ما تنسى النار بين يدينا كيف شعّلتنا 
كان الوقت يولّي حزين تفكرّ الوجيعة بعد الهجر كيف سكنتنا 
و كان وفى عليك الكلام ... أسمع غنايتنا

قبل ما يوفى الكلام ... نحبّ نزيد كليمتين :
حييت في كلامك نجمة و نسيت كلام الليل مدهون بالظلام
عشت في أنغامك وردة و تناسيت إلي بليغ وفى بين الهجر و النسيان
ولّيت بين ضلوعك نسمة و خبّيت على روحي إلّي ضلوعك بهوى آخر مليان
كبرت بين أيامك حلمة و ريت الحلمة تشيب كيف هرب عليك الكلام




حبّيت نقول كليمتين ...
 للنجوم الّي تسأل فيا ياخي هالسحاب منين ؟
للياسمينة الي إتّكات عليّا و قتلي ريحة هالجيفة منين ؟
للخطيفة الي طلّت عليا و سألتني جيتك في ربيع هالصقنطري منين ؟
للألحان إلي هجروا جواجيا و قالولي شبيك قبر بارد، مهمّل و حزين ؟

 ....غنايتنا طفات شمعة في دروج كيف يتفكرّ ينين