mercredi 1 août 2012

ما لقيتش عنوان على خاطر موش نصّ !!

ما انتن زبلتك ! ما امسخ شوارعك ! ما اصفر اشجارك ! ما ا تعس اخبارك ! ما ابهم عبادك ! ما ارخص دماياتك ! ما اخيب بنياتك ! ما ابشع حكآياتك ! ما اطول ايّامك ! ما ارزن ملايكتك ! ما اكثر سرّاقك ! ما أندر عشّاقك ! ما ابهم رجالك و ما ابهم نساك ! ما أقلّ هواك ! ما أصغر خيرك ! ما أصعبك على غيرك ! ما أخمج بيرانك ! ما أكذب جوامعك ! ما أسقط جامعاتك ! ما أجشع معاملك ! ما أخيب موزيكتك ! ما أكحل قلوبك ! ما أقبح وجوهك ! ما أكثر لحيّك ! و ما أقلّ الّي مقدّسنيك ! ما اكثر الّي مركّعينك ! و ما اقّلهم الّي زيّنوك ! اكثر الّي عشقتهم خانوك و اكثر الّي عشقوا هجروك: حرقوا، سرقوا ، غرقوا ، تكّيفوا ، تجيّفو !!! ما اكثر مصايبك و اعظم بلاويك ! 
هي : ــ نحبّك
تحـــــــشي فيه
! غدّارة ! للعشرة نكّارة ! للعشق متنكّرة ! على الهبلة مسكّرة ! عالنّور متحجّبة ! عالفرحة محجّبة ! كذّابة ! سرّاقة ! ساقطة ! واطية ! قلاّبة ! غفّاصة !خلواضة ! بلبازة ! هاترة و مستهترة ! متهوّرة ! مزوّرة ! 
هي : ــــ نحبّك
تحـــــــــشي فيه !

بعت الشعب ! تحبّ اللعب ! سيّب اللعبة ! فسّخ البلايك ! حلّ الحدود ! نحّي الأمن و الجنود! مازل شعبك من طحينو مشدود ! بدّلت الوانك و تغيّر عنوانك ! نكّست اعلامك و حزّنت امّاليك ! مدّيت وذنك ! ما خممّتش ! التاريخ  ما عبرّتش ! هججّت عصافر و سكّتت شوارعك ! سلسلت ساقيك و مدّيت يديك ! في بالي تدعيلنا بالخير ! والله معاك القلب يحير ! بكّيتنا و ما رحمتناش ! و حتى كي فرحنآ على ضحكة مل قلب طالعة ما خلطناش ! نسيتنا و نحنا ما سهيناش ! 
هي : ـــ نحبّك
كان بهذا الكلّ حبّيتك ما تنجّمش ما تحبّنيش
( هنا قلت يا نعمل . يا نعمل ... يا نكمّل الجملة ب نقطة و نحشي فيه و تولّي النهاية :"كان بهذا الكلّ حبّيتك ما تنجّمش ما  تحبّنيش. نحشي فيه."  و من بعد و انا نكتب في هالجملة  هبطت كلمة " آش" موش عيب التكبير في زمن الكوليرا و تولّي :"تكبيييييييييييير . آش نحشي فيه ". لا قصدت تولّي: 
.كان بهذا الكلّ حبّيتك ما تنجّمش ما تحبّنيش. آش نحشي فيه .)


mercredi 25 juillet 2012

عشق البلاد يشقّي !

عشق البلاد يشقّي !

همّ البلاد كلّ ليلة قدّام العينين مسُقّي ! 
تحير و ما تعرف وين حلمك تلقّي !!!
بلاد تفلّق ! بلاد تعلّق ! بلاد حياتك الكلّ تعيش فيها تتسلّق و انت ابد الدّهر بني الحفر !
آي طاح الحلم تِكْسَرْ ! 
بلاد تكسر الخواطر و لا نهار فيها خاطر تجْبرْ !

بلاد الدفاين كثرت فيها المحاين و اولّهم الحبيب الخاين ! بلاد الوجيعة تبنات باللّيعة ! بلاد الغرايب الجاهل فيها حاكم و الحاكم فيها مجهول و الجهل في هالبلاد صار مغزى و مقبول ! يدور الزّمان و يحيا الغول و تولّي القصص مجلس و للشعب منقول ! بلاد العجايب بلاد فيها السعد غايب ! ذاكرتها كالكسكاس منقوبة ما تعرف تفوّر كان الجواجي الّي بيها مغرومة ! بلاد الخندق و الخنن بلاد تفشّى فيها العفن عفنها فلّ و ياسمين بيهم تباع الدمّ و بيهم الميّت تكْفنْ ! بلاد قريب يتمنع فيها الفنّ و كان تسيّب اعرف راهو غبَنْ! بلاد الحسرة و التنهيدة ! بلاد عايش فيها و هي بعيدة ! انت تحلمها و هي تحلبك ! انت تزيّنها و هي يا نهار السعد الّي تزهّيك .

بلاد ولدتني و كان لقات راهي ما سمّاتنيش و راهي ترابها في العروق ما عدّاتليش ! بلاد نكرتني تقول امّي شدّتها بالسّيف !! بلاد عطاتني لون القمح و الشعير و تحبّ بعد طول العمر تحرّمهم عليّا ! بلاد عطاتني شعر و عينين اسود ماللّيل و تحبّني نركش و نعيش كالطيف الذليل ! بلاد هملّتني كيف قلتلها دوّيو يا أحرار نكبروا يا خلّينا نعاودوا كوارطنا نمشكيوا ! بلاد انا نفسرّلها الثنيّة و هي تقلّي باقي بالنجوم مبليّة ! تي هاو يا كازي في اوّل دورة خطفوك ! و شدّوك و على اصلك بعدوك و ناوين يدفنوك و ماهم ناوين يزوروك و كان يلقاو يلامة من على وجه البسيطة يفسّخوك ! قتلك يا بلادي نمشكيوا !!! ما قلقتش منّا نشكيو ؟؟؟

بلاد طفرنا فيها الهمّ بعد مالجوع فينا غرّس انيابو و اليوم يقولو الجوامع تنسّي الجيعان في عذابو ! بلاد تلزّينا فيها للتركينة و كيف هبطت على العظام العصا كانت سكّينة قطّعت الجواجي و رهنت دموع عينينا ! خاطر هالمرّة كيف هالبلاد خانت البطاحي و آش فيهم عانينا هالمرّة لا قدَرْنا و لا بكينا ! موش ما نجمّناش امّا هالمرّة ما عينّاش يزّي ما عطينا و ما خذيناش حقّنا و المساومة هالمرّة ما ثمّاش ! خاطر نهارة يا بلادي الّي نفكّوا و ما عاد نحبّوك نهارها يا بلادي يمكن نحكموك ! مادام يا بلادي الوان و 


الحان عشّاقك صاغوك ما يقدروا كان يا بلادي الّي سوّدوا تاريخك و ايّامك يڨودوك !

lundi 14 mai 2012

كرهتو ربيعكم !

وقتاش يجي الصيف!
 و بعدو الخريف!
 و بعدو الشتاء!
 و بعدو الصيف!
و بعدو الخريف!
 و بعدو الشتاء !
 كرهتو الربيع !!!
 مصيبة و تضبيع و السماح في نوّار اللّوز!!
 عام عندو الكازي منبوز و مرّ و تعدّى عام تقول عمر!!!!
 ملاوه الحنوشة و اللفاعي و الحفر!!!
 و السنّين و المبسم الصفر!!!
 و الشعب الّي كان حرّ ولّى هازز احلامو فوق اكتافو صرُر !!!
 كرهتو انا الرّبيع !!!
جيفة و عيفة و السماح في ريحة الياسمين !!!
 الجوع و القهر قتلونا و ماعرفنا النهار طالع منين !!!
ظهر الأمل تقسم و حمل الآمال ينين !!
 و الشعب الّي قال للقهر لا!!
 اليوم للقهر ركع و قال على الضالين آمين !!
 و الله رضى على شعبي يوم!!
 و نكروا ثلاثة ميا و اربعة و ستّين !
السّماح في ربيعكم ! السماح في صنيعكم ! السماح في صقيعكم! السماح في السماح !
نحبّ نهار الشعب الّي جابكم للنسيان قوافي يصيغكم و يقول شعبي فيكم : "
يلّي صنعتو ربيع من غير ازهار !
 يلّي صنعتوا لوز من غير نوّار !
 يلّي خلقتوا ثورة بلا ثوّار !
يلّي حسبتوا الكراسي و الحكم اقدار !
يلّي ما خفتوا من دمع امّ الشهيد الحار !
يلّي ما حرقتكم  الجلود الّي لهبت فيها النيران !
ما تحسبوا تكفي الوعود اذا الشعب بات جيعان !!! "
امّا انا كرهت ربيعكم على حاجات أخرى !
كرهتو عالزويّ الّ
ي دڨدقتوها !
عالمدينة العايمة الّي ما منّعتوها !
عالجوامع الّي بالسياسة دنّستوها !
عالجامعات الّي بالدّين خنقتوها !
عالنساء الّي بالظلام و البخس و الذلّ غلّفتوها !
و عالرجال الّي بالبونية و الجهل رعرعتوها !
عالتصاور الّي مالحيوط فسّختوها !
و عالفنّ و الغنايات الّي من على الركح هبّطتوها !
كرهتو ربيعكم !! و كرهت نوّار اللّوز و الدڨلة فال و ما عاد لأيّ دار تزوز ...

mardi 13 mars 2012

لا والفت الدمع



لا والفت الدمع و لا شريتو و لا هو طلبني و انا عطيتو ... حاجتو الدمع في زمان الجوع بعينين ، عينيّا عطيتو هو حبّهم و انا الكحل من يومها جافيتو !
لا والفت الدمع و لا شريتو هو صاغني وانا بالقلم خطّيتو ... لا هزّيتوا و لا حطّيتو هو نزل، الدمع، و انا على الورق مدّيتو ! كلمة و متلحّفة بالدمع و القلب بالألم ودّيتو ، ماشي في بالي ثورة كرامة و الذلّ مع شعبي تخطّيتو طلعت كرامة عاڨرة ومن نهارها الفرح ما ريتو ... لا الدمع طلبني و لا انا عطيتو هو عشقني و انا الفرح سجّيتو !
انا الدمع ما عطيتو الاحمر و الابيض...الاحمر و الابيض بالعينين الشاعلة هزّيتو فوق السواعد علم بلادي للسماء العالية مدّيتوا و كيف الدمع الخايف طلب الألوان الزاهية ما عطيتو ... بسود الكحل ودّيتو و يا ريتو السواد في الكحل بركة لا قيتو ... انا الدمع ما عطيتو متلحّفة بهجر البلاد و نسيانها و صدّيتو انا مرا و مسافرة بجفونها و اللّيل بخطّ الدمع للفجر دزّيتو انا مرا و متليّعة و دموع الشوق باروق و للسماء عشق البلاد رسّيتوا انا مرا و بالدمع مصيري لاقيتو!! تلحّفوا بالضحكة الصفراء يا غربان الزمّان امّا الدمع انا ما عطيتو و لّي ما بكى يجي نهار و وديان الدموع تمسح قافيتو
دمعي الغالي!!! وراس الشهيد الّي امّو فاقت في الليالي!!!! و الّي تدزّت و تهانت في الشوارع الخوالي!!! ما عطيتو!!! و حتى كيف الفرح زارني و مع الضحك دمعي خنتو؛ ما نسيتو!!! و بعد الخيانة زدت الدمع حبّيتو ... هو طلب العين و انا بالكحل ودّيتو هو ذاق السواد و انا باللسان و القلم هاديتو !! لا والفت الدمع و لا شريتو و لا هو طلبني و انا عطيتو ... هو في زمان الثورة حاجتو بالسواعد و انا بالجواجي ودّيتو!!! من ثمّة هوما شدّوا الكراسي وانا كرسي للدمع و هو حكم و انا زكّيتو !

mercredi 8 février 2012

برد



برد
القلوب باردة
قلت نطلع للشوّاشين
و نتفكّر ايّام زاهين
صبيّة ماشية للكليّة
تحلم بثورة أدبية تفجّر المعايير الفنية
برد
العينين شاردة
قلت نطلع لباب الفلّة
و نشوف المرشي آش ولّى
ومازالت تتباع ولاّ الغلّة
برد
الشوارع مدنكسين
قلت نطلع للقصبة
و ننسى فيها السياسة و الاعتصامات
و نتفكّر الي ساعات نستحق الحياة
و نرى تونس من بعيد و نقول : مازالت الايّامات !
برد
والاعلام فوق الوزارات ذابلين
قلت يمكن توحّشوا دموع العينين
ولاّ اليدين الّي ليهم ممدودين
يمكن توحّشوا الاعباد الأعلام
و يمكن هوما قماش مبلول و أنا كثّرت مالتخمام ...
سقنطري
الجواجي يابسين
قلت نهبط لباب سويقة
و نتعدّى على البلاص الحزين
طلع البلاص هدّوه وتحتو التاريخ ردموه
تفكّرت روب العيد و الفوشيك
وعرايس الشوالق و البلاستيك
تفكرّي الجري في الزناقي و الغمّيضة
و تفكرّت ريحة الكانون وولعة عزيزي : ايّامات الهيجة !
سقنطري
الناس تقول هاربين
امّا هوما الصبر اثقال هازين
خالية محطة باب الخضراء
و بيّاعات الدرع مكشبرين
يغزرو للبرد و عاكشين !
سقنطري
قلت نمشي لباب سعدون
لعلّ تحت القوس نلقى شكون
تايه كيفي و لاّ نوّارة بوڨرعون
تفكّرني الّي بعد الشتاء لازم الربيع يكون
سقنطري
قلت ناخذ الترينو
و من برد الذاكرة قلبي الله يعينو
نخل محمّد الخامس و دار التجمّع
و نهارة طياح البلاكة و القلب دمّع
و كرطوش الجيش في السماء
ربّي جرحوه و هاو اليوم يبكي ثلج و ماء
سقنطري
و الترينو يسري فوق الماء
والدنيا فيلم لميازاكي مزيان
و كيف حكايتو ركّاب الترينو لاملامح لا ألوان*





برد
لا دفنوا ولا زاروك
و انت تكلّمت و هوما خوّنوك
و زوّروك !
لا هجروا و لا صانوك !
و الّي خانوا ليوم عشقوك!
برد
هبطت مالترينو
و الدمع في البحر ماعينو
نازل كالمطر و محارم الارض ماعاد رافعينو
شعلّت سيڨارو و تهدّيت
مالمشي و البرد عييت
لا عرضني مبسم و لا لاقيت
غير الذكرى و ما تهنيّت
برد
طفّيت السيڨارو و تعدّيت ...


* : le voyage de Chihiro - Miyazaki

dimanche 5 février 2012

اقسم !!

مرا و ديمقراطية و شدّوني مالشيوعية تو تشوفو خازوق الامبريالية داخللكم في الرّداء و الريّة ! و سيّب عليكم من ريق الحملة البرنوسية متع مؤتمري الجمهروية كان جاء ينفع راهو موش مالنهار الأوّل عرفوا الوقتيّة و شنّوا الحملة العلنية ! مرا و ديمقراطية و شدّوني ماليسارية تو تشوفو المجالس الخمرية قدّاش كيف تصحى تولّي ثورية هههه ماشي في بالكم تكربيسة ولاّ تطبيسة قدّام الأئمّة السلفية ! الشيخة طريق لليقينيّة ولا حاجتها الشيخة لا بموزة و لا بلحية و بلا تسمسيرة قطرية ! حاجتها بماغون و عنب البلاد يصون و في جواجي الاهالي شعر يكون ! مرا و ديمقراطية و لّي موش عاجبو عليه بالدولة المازمبية خاطر هوني ههه القصبة للامارة السلفية هههه
مرا و ديمقراطية و عشقي ما يمنّ كان بالعلنية لا يعرف يتستّر ولا يعرف تحت نقاب يغتّر ! عشقي قبيح يحبّ الشمس و البوس و الترنيح ! يحبّ السِكرة و يموت على الفكرة الّي مع القافية تصير ذكرى !!! مرا و ديمقراطية ! قحبة قالوا !! قلت اعطيهم دروس في الرحمة !!! فكّرهم الّو موش التونسي للتونسي لحمة هههه ياخي فهمت الّي التونسي للتونسي شحمة يڨريس بيك الكيّاس بش يوصل للمجالس و يتفادى الشعب العسّاس و ياريتو شعبي في مصيبتو حسّاس !!! مرا و ديمقراطية و شدّوني مالوطنية !! تو تشوفوا كيفاش الوبنة النوفمبرية تتحالف مع الكتلة النهضوية و ينقضّوا عالنضالية و يقولوا الحبوسات هي الشاهد عالوطنية و الّي صار فيها خدعة فوتوشوبية ! يا عيني كيف تولّي بلادي رهينة الثورات الرقمية؛ تولّي حياتي ثقبات وجودية!!!!! و يلعن بو المرا الديمقراطية
مرا و ديمقراطية عاشرت النصوص الاغريقية و عرفت الحضارات جميعها : يهودية و مسيحية و اسلامية و ماعرفتش هالخرمة الغنوشية !! و الديانات الكلّ قريتها و هي كلّها الاهية !!! و ربّي الّي خلق السحاب مفكرّك بالاصحاب ما ينجّم يردم مرا مدفونة في التراب !!! وربّي الّي خلق المطر ما ينجّم يغمّ النساء تحت الشوالق ويقلّهم عينكم خطر ! مرا و ديمقراطية و في سكرتي نحكي مع ربيّ وساعات نزيد النقطة عالراء و نقول يا ربّي !! مرا و ديمقراطية و بالهالبلاد مبليّة وتونس ولاّت في جواجيا قوى استعمارية في اغلب الاحيان نكاحية و انا مش موافقة امّا برصيد الذاكرة مشرية ! و آقفوا يلّي تقراو عالجملة الإخرانية :" وتونس ولاّت في جواجيا قوى استعمارية في اغلب الاحيان نكاحية و انا مش موافقة امّا برصيد الذاكرة مشرية ! " توصلّت لفكرة مأساوية : حبّ البلاد قوى اغتصابية معتصمة في ذاتي للبشرية و الحمد لله الجميل انّي مافيّاش مجالس تأسيسية يدعو فيها شورو لصلب المعتصمين و نبقى مرا و ديمقراطية !
قطر !
اقسم بالله العلي العظيم ! اقسم بدم الشهداء العليّ العظيم !
يا قطر !
اقسم بدمع امّ الشهداء العليّ العظيم ! يا قطر!
اقسم بحق النيران في جلد بني وطني العليّ العظيم! اقسم بعلمي العليّ العظيم !
يا قطر !!!!!
اقسم بوطني العليّ العظيم !
يا قطر!!!!
اقسم او ربّما أُقْسَمُ أَنْ لا عدوّ لي بعد اليوم الاّك يا قطر !
فأنت مشروع احتلال عليٌّ عظيم !

قصيدة غزلية في سيادته خدم الخوامجية !

وهرة و دجاج يكحّ
و مالغزل الصوت بح
و القلب طاح تبطح
عفت الملاوي الّي كليت منها
و كول الملاوي من غير ما فطشاتك تصورّها
عينيك حمصتين من قاع الطنجرة منطرّها
و الحمدُ للمرايات الّي خفّفت من وحش منظرها
و ربّي العينين على هالفطشاطة يصبرّها !
برنوس خرواي و بخور و جاوي
صاحب الاعمال، صاحب البلاوي وكّال الملاوي
مبسم صفراوي عالتبلبيز ناوي ....
القلب ملّي شافك ما تهنّى
و الادغال بعد طلّتك ولاّت جنّة
يا صاحب البرونس آش عملنا ؟؟؟
بعد خشم الزّين المنكوس آش صورّنا ؟؟؟
رئيس لابس برنوس ومن اوّل خطاب خذلنا !!!
يا المنصف شكون في اللبسة ينصح فيك
الڨري الجربوعي موش مواتيك
و الشيتة في الشعر ما تغرّ بيك
عينيك القلب ما تحملّها
و كان شفت تصويرتك العين في الليل ما نسكرّها
يا حليلي عالزين الّي فيك!!!
براد بيت خاف على انجولينا وتحت النقاب سفرّها !!!

يا صاحب البرنوس مؤكّد النظرية الدروينية
قائد الأخطاء الديبلوماسية
صاحب الخطب الاسهالية
أين أنت مالحقوقية يا حليف الظلامية
حامي حمى النقاب و اللحي السلفية
آش يقربلك بوتلّيس ولد عمّك بليس النزيس ؟
حددّ ميولاتك الملاوية يا صاحب المضغة العتروسية
الحناك حناك فكرون!!
 و آش يقربلك الحلزون يلّي تلعب بالتليفون باش تاخو كم من مليون !!
(انتهى و البقية تأتي)

mardi 17 janvier 2012

رابعة


 صور الطالبة "رابعة خوجة " مرسّمة بالسنة ثالثة فرنسية بعد الإعتداء عليها من قبل الطلبة الإسلاميين و من ساندهم في إقتحام الحرم الجامعي هذا اليوم 16 جانفي


سال الدمّ على خدّيها
خلط الدمع يمسح فيها
رابعة ما لقات كان كلام رفيقها يواسيها
شعرها مسيّب يتعارك مع الظلام
لا هاب الشوالق و لا سيوف الأنذال
رابعة على عرش العِلْم تتربّع
وكان هدّوا العِلْم هي تضبّع
تزدم و حبّ البلاد ماليها
و حلمة الحريّة في الوجيعة تواسيها
رابعة سافرة امّا وقت الرسمي ما سافرتش
تصدّات للجهل و عتاريسو و ماوخّرتش
سال الدمّ على خدّيها
و نبت الورد في عينيها
و فاحت منهم ريحة الحريّة
كيف مسك الليل عقاب عشية
سال الدمّ و زاد الهمّ
و رابعة كبرشا نساء احرار تتذمّ
هبّت نسمة على خدّيها
حبّت البلاد تواسيها
و تفكرّها و ما تنسّيها:
"مهما الظلام يطول
يجي نهار و يزول
مهما الظلم يصول و يجول
يجيه نهار و تتلقّالوا الصدور
كان ولّى كرطوش الموت ماتهابوش
كان ولّى احباس تبلعوا الحلمة و الانفاس !"
تبسّمت رابعة و الدمّ على خدّيها
احمر و بالكحل في عينيها وهرّت اهلها و امّاليها !

lundi 16 janvier 2012

عشقتك



عشقتك
في قلبي ياسمينة وفلّة طرشقتك
عشقتك
على حيوط قلبي الخاربة أزين تصويرة علقّتك
عشقتك
عمري ما بعشقي خنقتك
عشقتك
و حتى كيف خنتني صدقّتك
عشقتك
و لا نهار خمّمت وطلقّتك
عشقتك
بدموعي و ضحكاتي رشقتك
عشقتك
على اعرش احلامي صدرّتك
عشقتك
خضراء و انت صفراء
حرّة و انت عرّة
باهية و انت ساهية
متمرّدة و انت من حقوقك مجرّدة
ثايرة و انت سايرة
قافية و انت غافلة
عشقتك
و على اوراقي قصيدة دونّتك
عشقتك
و كيف عطيتهم الوقت ما داونتك
عشقتك
كيف جبتهم من غادي يحكموا فيّا
عشقتك ...
عشقتك
وقسمت معاك الكاس و هربنا مالاحباس
عشقتك
و ضوّيتلك لياليّا و غطّيتك في برد القمع بدموع عينيا
عشقتك
و كيف مهمتلي حلّيت قلبي و سمعتك
عشقتك
حرقت روحي و ما حرقتك
وجعت و ضعت و ما سرقتك
عشقتك
بصالات السينما المسكرّة
بالمسارح الّي روتانا مركّحة
بالمكتبات الّي بالكتب الصفراء مسلّحة
بالبواتات الّي بالرّيش هبطّت بدنات النساء حشيش
عشقتك
بحيوط المدينة المغلفّة بالبول
عشقتك
بالدرابو الّي بالدمّ مازال مبلول
عشقتك
بجوامعك الّي بالكره مبليّة
عشقتك
كيف تركت السروال باللية و بدلّتوا بقميص اسلفية
عشقتك
و في بدني وجيعة طرشقتك
عشقتك
يا للّة الرجال
يا قاهرة الأمال
يا مبرّكة الاجبال
عشقتك .
 
 
photos de Saif Chaabane 
muzika d trio Joubran / Laytana !!

jeudi 5 janvier 2012

مبروك للظلام سوادو

مبروك للظلام سوادو
مبروك للعبيد اسيادو
مبروك للجهل بليلة عيدو
مبروك للدّموع يفيضوا و يزيدوا
مازال القلب حيّ رغم القهرة و الخسارة
مبروك لليالي السّود غابوا نجومها
مبروك للشمس احباسها و سلاسلها
مبروك للعلوم اغلالها و كهوفها
و مبروك للخدود الحُمر كفوفها
مبروك لحي الجهل سلاحها و سيوفها
مبروك للظلام سوادو
و مبروك للعبيد اسيادو
مبروك للشعوب تخميرتها : فرحة و ماتت في دقيقتها !
مبروك للسّلف بنهار صياحو
مهما كبِرْ يجي نهار طياحو !
مبروك للبوليس كسوتو و برنوسو
مهما ضربنا: الشعب بكرامتو "يعنڨر كبّوسو"
مبروك على الأَعلاَمْ سوادها
و مبروك على الجهّال أسيادها
و مبروك على بلادي دموع احرارها
رغم الظلام هوما نارها
تدفّيها و تشعلّها و تضوّيها
و على من عاداها تعلّيها
و كان حضّرولها شيوخ الجهل اكفانها
يكونوا هوما تعليلتها
مبروك على تونس تصديرتها
غدوة اكيد تكون بالزهو و الطرب دُخلتها
حنّة و حرقوس و فوطة معريّة صرّتها
تونس مرا و متلحّفة بحريّتها ...
تونس مرا و متلحّفة بهمتّها
لا المهر يغنيها
و لا المال يجهرها
تونس مرا و متهمّمة بليعتها
ولادها في شونها ماتوا و ما طلبوها
و مبروك للّي هجروا عودتهم
غيرهم ما هجروا حتّى لو كان البلاد تركتهم
مبروك للعربان ربيعها
و مبروك للاحرار خريفها
الاحرار ما يقطفوا كان الوردة الّي زرعوها
و ما يهمّهم نوّار اذا على شانها الارض باعوها
مبروك على الشوارع حريّتها
و مبروك عليها زبلتها
و مبروك عليها اليدين الحافية الّي نظفّتها
و لا صور ولا كراسي و لا شهاري همّتها
مبروك على البلاد وهم حريّتها
بالوهم ساعات تبدى كلّ البلدان مسيرتها !
و مبروك زرع الحرّيقة و الشوك في جنينتها
غدوة تتسيّج بكرم اللّوز و فيروز تصير من ثوابتها
مبروك على البلاد خطّيفتها
تفكّرنا بالربيع كان السياسة للشتاء هزّتنا
مبروك للوزرة كراهبهم و العسّاسة
ومبروك على الشعب اشاعة القنّاصة
مبروك عليهم قتل الببّاصة
ومبروك عليهم بالمارة السلفية
و مبروك على سجنان مغادرة الحدود التونسية
ومبروك على امير المؤمنين جهامتو
غدوة الشعب يفيق و يبرّكوا على بهامتو
و مبروك لنساوين بلادي شوالقهم
في بالي الفقر والجهل علّتهم طلعوا الجامعة و الشغل نقمتهم
و مبروك عالشيوخ شيختهم
و كيف شاخوا و عنب و شعير البلاد ما زراتهم؟
اللهمّ اذا للجمولة و الصحاري و البترول باعوا ذمّتهم
مبروك عل بلاد عودتهم
لازم الخونة البلاد تشوف دفينتهم !