dimanche 13 novembre 2011

لقيطة شعرية تردّ على سعاد ...

نحّات و عرّات
على السّحاب ترمات
راها مات
سكنو السّكات
غطّاها بعينيه
عنقّها بيديه
صبّلها كاس
حللّها الأحباس
تقطعوا الأنفاس
و هبطوا الزّوز مطر ... العشق قضاء و قدر !!
لبست و مشات
سكاتو بعدها مات
و طلعت مالبركون غناية
زرقت كالشمس عالمدينة ثنايا
واسعين حتى للضّالين رافعين
قعدت ريحتها و تبسيمتها علي الحيوط لاصقين
تقول تصويرة متع غشّيرة ناسيتها الحيرة
و طار الحمام و هبط المنام
العشق حلم و الحان و كلام !
بعد 9 شهور جابت هي بنيّة
وقتلّي هو بالوقت جاب غناية بيها مبليّة
ولاّت أمّ و مضغة في كلّ فمّ
ترضّع و مع كلّ غناية تسمعها تتوجّع
رضّعت بنتها من جواجيها
و كي ضاق الحال هربت عليها
الدنيا زعمة مسؤولة و لاّ خاطيها
نسات آخر مرّة عرّات و عالسحاب تمدّت
و شهقت و مالعشق بكات
نسات و عمرها ما اشتهات كان:
تكون هي الغناية و تزرق هي عالحيوط الدار مرايا !!!
العشق جنّ و مجنون و قلب خايخ يوحّل و ما يصون !!!!
و السّحاب و العراء ولاّو لقمتها
و الرّجال يقطفو الورد من جنينتها
يشيخوا و ينيخوا و لا هامهم حيرتها
لاعاد عليها غناية تتكتب
ما عليها كان الدّعاء يتسكب
و قعد سكاتها منها يتسلب
ولاّت بالصبع منعوتة
وقتلّي كانت في نهار نوتة
كانت موزيكا و شعر و الحان
ولاّت تهتيكة و ضحيّة الوقت الطحّان ...
العشق خدمة و صنعة و ماعون !!
مع العشق بدات برشا حكايات
و ساعات معاه وفات الحياة
و شدّوا الناس زناقي مظلّمة
حيوطها بالبول مطليّة !!
زناقي بعدت عليها الأغلبيّة !!
و كان نهار تفكّروها يعملوا منها : القضيّة !!
و نخلّيها هي تكمللّكم البقيّة :
" حبّيتوا. عرّيت و نحّيت و بلّي عندي ودّيتو. حبّيتوا ! صبّلي كاس حلّي الأحباس ! تقطعوا الأنفاس! شهقت، بكيت، خفت، قلت يحبّني و نحبّو ما فيها باس ولا فيها بليس فيها عشق من غير تدليس ....
شعّلت سيڨارو كريستال مجيّفتو و كمّلت :
حبّيت و أيّام وليالي حبيبي ستنّيت . نسيت النوم و بيه تبليت و كبرت فيّا البنيّة و طال الوقت و غلب المقت و نسيت الثنيّة و كيف عرفتها قالولي : مشى و ما خلّى وصيّة ! عمري ما حبّيت الجبابن و قبوارتها و قرّتها، خلّيت البنيّة و قلت: هو حياتي و انا حياتي معاها مكملّتها... وكثر الكلام و غاب السّلام و كثرت السكاكن و الشدّان بالسّيف في التراكن... قلت هي حياتي مالة لازم عالزناقي المظلّمة الّي حيوطها بالبول مطليّة نهربّها و من نهارتها عايشة نحلم بيهم الزّوز و نستنى في الموت عليّا تزوز ... "
نسمع فيها و بكيت؛ ضحكت عليّا و مسحت بيديها دموع عينيّا و قالتلي :" قدّاكش فينو يا بنيّة مالة كان نحكيلك على بنات 14 و 12 كيف ضاعوا في الثنية تشلّط و لاّ تترمالي مسبيّة؟ " و شعّلت سيڨارو و قالتلي قول لسعاد كلمتين :" كان النّاس الكلّ شرفى مالة يا للّة القحاب منين ؟ «

p.s : que ces mots tombent sous vos yeux Madame SOUAD ABD ERRAHIM et sachez qu'on ne tire pas sur les ambulances à moins d'être sioniste .

lundi 31 octobre 2011

الجواجي تحرقوا


الجواجي تحرقوا
الكلمات مع الدموع شرقوا
غصّة في القلب
غصّة في العينين
الدخّان فيّا شاعل
و النّار ويــــــــــن ؟
في الحلمة الّي كيف تولدت ما عيّطتش
في الحلمة الّي كيف عيّطت ماعاشتش
كالأمّ الّي فقدت كبدتها
و كرشها قعدت تفكّرها بوجيعتها
كالبو الّي يلوّج على دفينة
بش يلقى لكبدتو قبر
يا ريتني انا موش انت يا حلمة الخبر !!!
الجواجي تحرقوا
هبطت الدموع حشيش و ريش
وولاّت الثورات ريق و تقطيع و ترييش
و رجعت الثنيّة حالة عاديّة
الّي يفيّش بانتماؤو لحزب يڨيّش
والّي ينبّر و الّي عل خاسر بكلامو يغبّر
و الّي مقهور لاعارف لا يطيح و لا يثور
ولا عارف ينسى و يروح و قبر الحلمة يزور
رجع التعب بلا حتى سبب
و رجعنا لقلّة النوم
و للصباح الّي بالشمس و لاّ بلابيها مزموم
كيفاش الّي حلم في عزّ النهار مازال يجيه النوم !؟؟
يا أبو القاسم الشابي الجواجي تحرقوا
و هرب بينا القدر
و نشدّوا في الحلم لا ينتحر
و يعيش في البلاد كلّ من خانها
و ليوم فيها بالقهرة يموت كلّ من صانها
و الوجيعة تقول خيّال فينا تعفس بحصانها
يا الفاضل بن عاشور الجواجي تحرقوا
علاش دينهم هابط علينا ساطور
علاش نساو الّي القرآن جنّة و كلّ ماتتمنّى قبل حياة حزينة بين القبور
علاش، شبيك ماكش مع الشيوخ الّي يقراو فيهم ليوم الفروخ
يا فرحات حشّاد الجواجي تحرقوا
تعددية نقابية و المصيبة هي هي
و الّي البارح قتلوك ليوم يحبوّا يعاودوا يدفنوك
امّا ماتوا بعدك عباد و ما نتصوّر نهار الفرحة تدخل ديارهم في الاعياد !!!
يا الدغباجي تحرقوا الجواجي
اجري لذاكرتي الحلم يلاجي
يولول تقول مهبول
اجريلنا و حيّر التاريخ
خلّيه هابط عالجهل قنابل و صواريخ
يا الدوعاجي تحرقوا الجواجي
و تهدّ علينا السّور
هايمين ضايعين كالبكّايات بين القبور
لا عاد قارين لا الكتب لا بين السطور
و كيفاش تحبّ الفنّ و العشق فينا على الشقاء يثور ؟
الجواجي تحرقوا
و في الدموع غرقوا
و الليالي البيض تسرقوا
و الليالي السود بينا شلقوا
منارات فنارات ضوّينا عالبرّاني
و اليوم القلب الشاعل المحروق يعاني
و يخممّ ويقول "كيفاش و أنا رماد نعاود الاسطول ؟ "

lundi 17 octobre 2011

هزّ ...

هزّ
بعّد شوالقك عليّا
هزّ
شبي صوابع يديك في عينيّا
هزّ
شبيك بزاقك يشللّ فيّا
هزّ شبي لحيتك كاشة عليّا
هزّ
ماو لاباس تدافع على ربّي و هو في جواجيّا
هزّ
ربي كبير و غفور و رحيم
كتب شعر ولد احلى مومنين
شبي قرآنك و لاّلي محاكمة غير شرعية ؟؟؟

هزّ
ظلامك و كلامك، هابط نور الحرّية !
هزّ
عينيك عليّا، بدني موش مسرحيّة
هزّ
خلّيني بعد 23 سنة قهر، نعزّ البشرية
هزّ
حتى كلام الشعر لخنتابة كيفي عندو قدسيّة
هزّ
راني مرا تونسية
امّ و مرت الهمّ
حبيبة و مالناس تتذمّ
كان بدات بعشقها مبليّة
هزّ
استعواذاتك و تغفيرك كان ريت كحل عينيّا
هزّ
جنّتك و جهنّكم و اعطيني حلمتي المرزيّة

هزّ
اكحلك و سود الغربان
جيفة قهرتنا كاسيها الذبّان
ريحة موتننا تعطرڨ في قطر و عمّان
هزّ
تاعبة مالدنيا و من راس المال
آش تسوى الدنيا كان يزيدوا يهربوا عليها الالوان
هزّ
يا ولد بلادي سيفك و قبل ما تغرسوا فيّا
اغرسوا في ظلام المخّ الاسود و القلب الحفيان !
هزّ
عييت مالخوف و مالدزّ
هزّ
نحبّ نسكر مع مدينتي
و نهزّها من يدّها و ندوّرها في جنينتي
هزّ
غنّي النشيد الّي غنّاه الشهيد
اشهد عالعلم احمرو من دم
ابيضو دموع لمّيمة
هزّ
سلاسلك السماويّة
واخلاق العبيد التحقيرية
هزّ
نحبّ نحبّ الحريّة
نحبّ نحبّ بحريّة
نحبّ نحبّ
نحبّ ...

هزّ
نحلم نلعب موزيكا في المدينة العربي
من غير ما يتمنيك حتى كربي
نحلم نكتب كتاب
و يتقرى و يتنشر و يتباع
و يولّي الكتاب فنّ و ابداع
نحلم نهار نشطح و نغنّي على الكيّاسات
و ننسى المأساة و نشدّ من حزامها الحياة
ندوّرها و تدوّخني
و كان وقفت عالشطيح
تصيح و توبّخني
هزّ
نتمنّى في برشا حكايات
حكاية فرخة و عروسة و بيسات
و روبةّ مقطّعة مالغمّيضة و التكربيسات
حكاية هربةّ في جبّة ممّاتي كنكرّد الولاد بحجيرات
و حكاية تشنشينة فرادي : "ابعدوا لغادي !! "/"شبيهم على بنتي ؟"
و بنتها شيطانة وراء ضحكتها تخبّات
تحلّت ظفيرتها و ذاق شعرها بنّة النسمة و الحياة ...

هزّ
نحبّ نرجع مرا زعبانة
بعينيها تخلّي الروح عريانة
نحبّ نشعّل النار في عينيّا
و كالفرططّو الحبيب يموت فيّا
نحبّ نرجع بقلبي نقلول فنّي
و تجاوب النّجوم في مرقدها "ياللنّي !!"
نحبّ هبلة و عشق و بوسات
و تعنيقة تطرشق فيّا الحياة
نحب يدّ نشدّه تعرق و ما تجريش
تسري كريحة نسري و الحبّ يزيد !!
هزّ ...

mardi 11 octobre 2011

Fuck Monologue !!

نيكم امّكم الخوانجية الكلّ !
بلحيكم بقميصكم بخواتمكم الّي في الصبع الصّغير !!! وجوهكم تذكّرني بآل قريش و تفكّرني علاش 23 سنة راكحة فين العصا متع بن علي !!! منتن ريحة عطركم المشري من بومنديل الّي يعطرڨ و يغمّ على ريحة النسري و الفلّ و الياسمين المخبّي في صدر ممّاتي الحنين !! تحشيوا فيه ؟؟؟ تصلّيوا في الكيّاسات و انتوما عينيكم على المتعدّين ! كيف نراكم نقول ربّي كبير امّا في خلقو ليكم طلع صغير !!!! نكرهكم بنساكم، برجالكم كيف تتعدّاو في شوارع مدينتي نحسّ الحجر متع الحيوط يبكي و حزين !! مخيب الوانكم الخراوية تفكّروا فينا بالتراب و القبر و الموت يرّاكم كيف بن لادن ماكلكم الحوت !!! تفيه عليكم و على جمعياتكم و مدارسكم القرآنية : حملة استقطاب علنية !!!! و عروساتكم الجماعية و وقتاش البرتوز الوطنية !!؟؟؟
نيك امّكم الدساترة الكلّ !!
و على راس طسيلتكم التجمعيين يرّاني نراكم مصلييّن و مع آلقرودة في قفص منفيّين !!! 50 سنة دمار بحزبكم المعفّط و ليوم 20 حزب نلقاكم وين نتلفّت !! هجّجتوا بن علي خرّجتولنا بورڨيبة و عملتوا مالزبيبة قبّة و نقيبة !! و يستقبلوا فيكم في التلافز و الراديون يلّي كنتوا تلحسوا لبلحسن الميبون!!! مع 14 عاودتوا عذرية و عيّفتوا بلحق في البلاد الذريّة !!! ساندتوا و ناشدتوا و صفّقتوا لبوكم الحنين و ليوم سيّبتوا علينا الطحين !! قريب تقولوا بن علي نحنا خرّجناه و استقلال القضاء و الانتخاب زايد علاه ؟؟!! كنتو لكلّم تتزبّروا بالموڨ و قلبنا للبلاد طايح لوڨ !! كيف تونس عقلتنا و اعترفت لشعبها بالجميل هبطتوا عليه الشعب و هو مازال ما يتعلّم ياقف و في مشيتو يميل !! كنّا نسخايلو عنّا 190000 بوليس سياسي طلعوا 140000 تجمّعي يساسي : قضاة و طلبة محامين و اعلاميين : مخبرين ! يبيعوا في ولاد بلادهم بالتقارير و التقرير بفرنكين !!! منتنكم كيف نراكم على القوايم المعلّقة نحسّ جواجيّا و قوايمي مفلّقة و نقول يا ريتني من هالمسرحية مطلّقة و نفقتي راحة البال و غياب الدموع مالعينين !
و نيك امّكم اليساريين !!
يلّي ترتّلوا كالقرآن في ماركس و لينين !! يلّي بيكم الاخوان و لاّو بديل !!! كرهتكم !! كرهت الاحمر و اصفر النجوم الّي عالدرابوات مرفوعين !! كرهتكم بكتبكم بمجلّداتكم بجرايدكم بحفلاتكم بموسيقتكم حافل تاريخ الشعوب بمنادبكم !! تتشدّقوا بالمواثيق الدولية و انتوما يدّ ضدّ يدّ و هي هي الثنيّة ! تحلموا بالكراسي و الشعب عالحليب و لاّ على فيلم مزيان يساسي !!! تلعبوا فيها شيوعيين و تحبّوا على العسل من زكّ البوفرززّو وو قتلّي الحريّة تعيّط "ايجا حزّوا !!" تكزّوا !!! مخيب طرابشكم المشرية ماحفصية و الي زعمة زعمة تشبّة لتشي غيفارا و انتوما مخاخكم كهف و مغارة !!! حفظتوا مالشعر و الادب و الفلسفة 4 مقولات بيهم تبزنسوا و تبنيوا الحياة و انتوما الوجه الآخر للخوانجية !! فلذا نيك امّكم من هنا الى نهار توفى البشرية !!! كرهتكم و كرهت تصاوركم و شعاراتكم و سرقتكم لأبيات محمود درويش : يا بو ڨلب نيرودا ولوركا و دنقل و غيرهم و ايّ شاعر حيّ ولاّ ميّت في قبرو هبّطتوه ريش !!! كرهت جرايدكم تحت الضبابط و مخاخكم الّي ظهر ينجّم يعفّس عليها ايّ ظابط !!
و نيك امّكم المدوّنين !!!
يلّي ماشي في بالكم جبتوا الثورة و نسيتوا ولاد الشعب تحت الرصاص بايتين !!! صحيح فيكم زوز باتوا في الداخلية امّا الباقي داخلين خارجين و خاريين عليك و عليّا ! مصوّرة و مصوّرتين كلوة و كلمتين و فيدوات و كيلوات مالطّحين !!! هجرتوا المدوّنات و سكنتوا في الاعلام الڨونات و بعتوا بزوز فرنكات و اليوم همّكم شكون يشريكم بعد ما كان همّكم شكون يقرى و يكومونتيكم !!! تتلاهفوا على الجوائز و استعراف الغربيين و انتوما في بلادكم بين اهلكم مذمومين و اتعس متغرّبين !! تلعبوا فيها صحافة و اعلاميين و تتساءلوا شبيهم المعطّلين باقي بطّالة مترسّمين ؟؟ فيكم و عليكم صحيح و ما نمنّع منكم كان كعبتين امّا اغلبكم بترمكم مبليّين و ترمكم تحبّ عالكراسي و هذاكة علاش تدوانو مع حقيقة و لاّ حقيقتين !!! كرهت مناظركم الممدودة في التلافز و اصواتكم في اراديوات و كرهت معاكم بنفس الدرجة روحي و عفت التدوين الّي بلا بيه راهو قلبي ميّت بعد ما كان حزين !!!
و نيك امّك يا انا !!!
كرهتك تاكل في السبّ و كرهت قلبك الّي مالحبّ تكبّ و كرهتك كيف تبدى تبكي قدّام الاخبار تقول عندك بانكة و مالنفط آبار !! كرهتك تكتب بدموع عينيك الغير يتفرهد و انت القهر ماليك !! كرهت تصاورك الّي اخترت تعمل بيهم ماسك و كلامك الّي عاملة بيه لروحك كاسك !! و كرهت خاصة انّك ما وصلتش تكره!!! يلعن دين والديك !!! كرهتك عزوزة و انت فرخة مالدنيا و السيستام منبوزة !!! و كرهتك تقرى في الكتب وحدك و يفوّح فيها معاك عصير العنب !!! كرهتك خاطر يا "انا" تعرف اكثر منّي آش نحبّ و قد ما نغلط تهزّني من غير ما تسبّ !!!

lundi 10 octobre 2011

مالسفساري للنقاب : يا حبيبي عالخراب


هيّا مبروك عليكم العورة متع 14 جانفي المجيدة الّي في بالنا مبيدة للفساد و الجهل و الخريان على العباد ... ماراعنا الاّ بعد هالعورة الاّ بجريان جوف يا حبيبي خريان في الكيوف : منين نبدى و وين نوفى ؟؟ اية سيدي ساعة مازالنا ماتهنّيناش على زابا في فرشو في جدّة و ماراعنا الاّ زحف هجوم تتار متع غربان تغرغر ملّي وصلت للمطار و غنّينا و الدموع في عينينا غناية الفنّان الثوري الملتزم الرّابور "كركدن" : ينعن ز* امّ هاك النّهار الّي عفست فيه ساقيكم المطار و بدى من وقتها الدّمار !!!
كارثة تجيب في اختها وصلنا لكارفور خايب خلاص : يا سفساري يا نقاب !!! ما فاتكمش الي فمّة زوز زهمولات كحل مشاو لجامعة سوسة بش يقيّدوا ههههه انا حسبتهم مشاو متطوّعات شكاير بوبال !! ياخي ظهروا ناوين يقراو !!! و قالولهم لا و جابوا اللحي و دارت حرب و ماكم ريتو بعينكم .. نحنا هكّاكة و خلط فيلم بيرسيبوليس الّي جسّد الذات الالاهية هههه و كأنّي اللغة موش تجسيد للذات الالاهية ... الأكيد موش الدقيقتين الّي المخرجة تصوّرت فيهم ربّها و الّي زيد على محلاه هوما الّي قلّقوا ... الّي قلّق هو انّو عزايزنا في الارياف و وليداتنا الصغار تفرّجوا في الثورة الايرانية على حقيقتها بريشها، بحشيشها و تفرّجوا في الثورة الاسلامية و يمكن يكونوا فهموا انّي وقت الدّين يدخل في السياسة و يحكم الحاكم بالشريعة الاسلامية لا عاد فمّة اعتدال و لا عاد فمّة بوس و لا جيب و لا بروتال فمّة كان السبّان و المشطة و الكفّ آلخرتال ...  
و مانيش بش نطوّل و هالبورڨة ما نفختليش كرارز مخّي برشا على خاطر تأكّدت الّي الشعب الكريم من شمالو لجنوبو تفرّج في الفيلم و حصلت الفايدة ... امّا الّي هبّلني انّي ريت اليوم نساوين عاملة تظاهرة اسمها "لا للنقاب !!" امّا اقترحت كبديل ثوري السفساري !!!! الشفاعة يا ڨبّاعة !!! يا بو ڨلب صلب هاو الضرب ! هاي المصايب !! آش يحبّ يقول : أصول ؟؟ عادة ؟؟؟ تقاليد ؟؟؟ هويّة ؟؟  لا هذا و لا ذاك : شعب طلع ديّاك !! ماهو فاهم والو !! و ما عملش الثورة  هذاكة علاش لا يزّي  ركب عليها و زاد توّة يحلب فيها !!! الردّ على النقاب و المنقوبات الذاكرة و الذات و الهوية هو ردّ بسيط و في عمقو انساني : رفض اختزال المرأة لجسد يلهّب كرارز بولحية المڨحوط !!!
مالنقاب للسفساري و انا نحاول نجاري و نحاول نفهم في بلاصة التقدمية في هالعورة التاريخية !!! نحّينا بن علي بش نمجّدوا بورڨيبة !!! نتعاركوا مع البوليس وجبنا بولحية العتاريس !! نحّينا التجمعيين و عملنالهم مالحزب عشرين !!! حرّرنا الاعلام بش نمدّوه للنيابة العمومية الّي "يعطيها قصبة طرية مع التجمع ز*ها بارك و مع الفنّ جهلها حارك ...." !!
الحاصل تفكّرت لا خمار لا خموّري انا حرّة في فرفوري ههه و توّة نقول لا سفساري لا نقاب نساء بلادي موش ق*** ماعليه كان بولحية يعمي معاميه الغراب !!!!

https://www.facebook.com/photo.php?fbid=204693766265666&set=a.143379579063752.30020.143330995735277&type=1&theater

ثورة الياسمين؟؟

رابورات عساكر كرظونة موزيكتهم تقول ڨونة / مدوّنين عالدّوانة دازين عصابات موش متلثّمين / اعلاميين الغلبة و الطحين تقول مازال موجود الزّين / الزوّالي مازال جيعان يعاني و حزين / و المثقّف مازال بعضوو يوقّف / جايزات عالمية على الشعب متهاطلين و المواطن يدزّ بش يهزّ كيلو سكّر و لاّ ثنين : ثورة الياسمين؟ / ثورة البكّ و الحرّيقة لا خلوق لا خليقة !! كاميراوات و ميكروات و العباد مازالت تتبعبص في الكيران و الميتروات / المسارح مهجورة و الافكار مأجورة يرّاني ياجورة نفلّق الرّوس الملحّمين / تحبّ تكون حنين امّا يا حسرة منين ؟؟
كذب و تنوفيق و خطابات و ريق و الشعب خاشش الغريق / تلموّا عليه النخب و شعلوا في جواجيه النار و يقولوا منين الحريق ؟؟؟/ يتعاركوا على الكرسي و يلوموا عالسبسي و الشعب لحمة فوق التبسي / آلاف الصحفيين عالموضوعية دازين : وين كنتوا كيف كان دمّ الشعب يقطّر و التراب منّو حزين/ آلاف المناضلين عالثورة راكبين يحلبوا فيها و هي مازالت ترضّع و يلوموا عالمبزّع / وحدة مسكّرة فمّها بسكوتش و تحبّ دستور تڨعّد ! عالسكات الشعب ثار و الشعوب بش تثور / لاخر عاملّي شفّة تقول قفّة و منين البوس مع هالخنفوس الّي لا يتكّل لا يتلعب بيه / و لاخر عامل مرايات وفات على والديه الحكايات و يحبّ عالتعريب تي هاو في بلادو على اولادو اغرب مالغريب / يا ولدي الشباب لهنا "اين" شي ماعاد يملالو العين : يحبّ عالموزيكا و على لمّة و تفريكة و ضحكة من غير تتريكة !!!
و يا بو ڨلب هاو الضرب : متنقّبات بزقوا عالضوّ والحياة و يحبّوا يستعمروا الكيّاسات و الجامعات قالي نقلّك حريّات / تخرتيلات !!/ شدّ دارك خبّي عارك خمسين سنة فولارة في شارع بلادي تنحّات و طلعت مالفرحة للمرا صياحات / اسراب و بولحية كالغراب تقول"حرية" يهبل كالمجراب الّي يهمزو نفاقو / شلابق و كفّ و السبّان بندير و دفّ ياريتني على الاحناك خفّ / هذا يصيح و هذا يصيح تملاو وذنينا بالنبيح : سيّبونا نسمعوا شعر و موزيكا و نشطحو و نغنّيوا و وين تهزّنا الشيخة نروحوا و ما نولّيوا !
ثورة الياسمين ؟؟ منين ؟؟ ريحة الجيفة تكفّر المومنين / من 14نستنّاو : مشى و لاّ قعد الزين ؟ بعد قصبة واحد و ثنين/ و بعد حكومة و لاّ ثنين : وحدة ظلّ و لخرى تطّل/ و بعد تاسيسي و استفتاء قبل ما يبدى بطل و الشعب كطاجين بونارين منّا مكوي منّا مشوي كلّ شيّ ولّى رزين / تي هزّ تڨعّد فزّ يزّيه الشعب ما تركز مالكرز ماللّكز يكُتّ يبُزّ دمّ ولاّ فلوس ديما الشعب منبوز عايش يحلم وسط الزبلة بنوّار اللّوز .
ثورة الياسمين؟؟ تي هاي بعد ريحة الجلود، ريحة المخاخ شايطين / و علينا الفيالق دازين : اعلام و حقوق و الشعب لتوّة بفرحتو مخنوق / غرب بعد ما استهال فينا الضرب يصنعنا في الرّموز و نحنا البريمة فينا مازال لتوّة مركوز !!/ تي فكّ تلمّ رضينا بالهمّ و توّة جاوا من جميع البلدان يعلّموا فينا في القيم : نمّ ! / لغة حيّة و لاّ جواجي محروقة و مشوية !! / سمسرتوا بالقضيّة و دنّستوا النشيد و الوطنية نحّيتوا : فلا بدّ ان يستجيب القدر باهي مالة الشعب بش يكونلكم قبر !

jeudi 29 septembre 2011

قلبك لاهو ذهب لا هو فضّة !!

يصير اليوم :
يسرقولك ضحكتك و يضحكوا عليك
يسرقولك ثورتك و يقولولك ستنى العيد تو يجيك
يسرقولك قلبك و يقولولك الحبّ صعيب عليك
يسرقولك حلماتك و يطيّروا النوم عليك
يسرقولك كلماتك و هوما يكذبوا عليك
يسرقولك وجيعتك و يحاولوا يفرهدوك كيكدس الهمّ عليك
تحبّهم ماك طالب شيّ
مادام بحبّهم قلبك حيّ
قبل ما يسرقوك و ينزلوا عليك بالكيّ !
تعطيهم بش الّي سرقهم قبل تنسّيهم
امّا لا ما عينهمش قلبهم ما عطاهمش
و سرقوك وقتلّي كانوا ينجّموا يقتلوك
ما خممّوش دموع الدمّ ما شافوش
و حتّى كان شافوا ما يرحموش !
ناس حاربوا ما عاشوش كيفاش تحبّهم ما يسرقوش !؟
و قلبك لاهو ذهب لا هو فضّة !!
 
قلبك لاهو ذهب لا هو فضّة !!
قلبك كبر بالكبّة !!
قالوا عليه شيوعي و يخون و ما ينجّم يصون
قالوا عليه ليبيرالي و في عشقو استغلالي
قالوا عليه متخونج و راعيه الظلام
قالوا عليه ملحد ما يمّن و ما فيه امان
قالوا عليه شاعر يسكر ويبيع كلامو: داعر !
قالو عليه فنّان خوّان يسحر بوخوخو بالالون !
و قلبك سرقوه ولا هو ذهب لاهو فضّة !
قلبك بنيتو بدموعك مع كلّ سبّة !!
و يامة قالوا على قلبك كلام
هابط عليه كشكارة سميد على خدّام الحزام !
سرقوك و خلاّولك الوجيعة
خلاّوك لا خلقة لاخلوق لا صنيعة
سرقوك و خلاّوك للهمّ بير
متّكي لا تضحّك لا تبكّي كالزّير
خلاّوك ياقلب بعد السرقة ضرير !
لا خافوا عليك مالكيّاس
لا خافوا يهبط ظلامهم عليك فاس
ما خافوش عليك سرقوك و هجروا و تركوك
و يمكن كان نهار يعرضوك ما يعرفوك
خلاّوك حافي و ڨرسان و جيعان
تطلب تساسي من ايّ عينين شوية الحان
يمكن في هالبرد تموت علقلية شبه فرحان
امّا الّي يسرق يغلب الّي يحاحي
هو يشدّ ثنيتو و انت تولول في البطاحي
و كان قلّقت الناعسين يمكن يرجموك
يا قلبي لاك ذهب لا فضّة امّا احلامك هلكوك !
 عندك الزّهر يا قلبي
مازال عندي مالدموع مطر
تسقي و تنبّت
الزرّيعة في التراب تثبّت
و تو يطلع نوّار البوڨرعون
أحمرو فيك يسيل و يطيّر الهمّ
كان سرقولك آخرة قطرة دمّ
عندك يا قلبي صفحة بيضة
اكتب بيها الوجيعة قصّة للكبار
فكّرهم كيف كانوا صغار
يحلموا يطيروا للڨمرة في عزّ النّهار !!

mardi 20 septembre 2011

العروسة


زغردوا يا نساء و صلت الصبيّة
متلحّفة سفساري و مسبيّة
خلاّت قلبها و جات المبليّة
و الليلة هاي وصلت،
عروستكم هابط عليها عزاء
قلبها خلاّت و قدّام حبيبها ركعت وصلاّت
و عليه حفات و دمات
هجرها يرّاه مات خير ما تقتلو كلّ ماتلقاه مع مرا اخرى بات !
اضرب عالطبلة يا طبّال
غطّي على عياطها
غمّ على اصواتها
هاتوا الحنّة زينة الجنّة و زغردوا يانساء
جهنّم فيها نيران رشّوها بالزّهر و الماء
العروسة ماتت في هالليلة السعيدة بالحيا
مدّت يديها هزّت ساقيها
تصبّ حبيبها في جواجيها
و شكونو الغريب الّي بش يسقط عليها ؟

عرس و طبّال : عالم هبال !
كسكسي و علّوش : تخم المخاخ قبل الكروش !
تاي و حلو : و مرّ يتعدّى العمر !
و تفرّقوا الثنايا و ياما هدّوا ولايا
تلقى روحها متصدّرة على جبل !
متلحّفة الأمل يهرب بيها اللّيل في صحراء كي جمل !
زغردوا يا نساء استروا فضيحة قلبها الّي هوى
هواء
خنقة
شنقة ،فلقة : تبسيمتهم و حارقة فرحتهم !

عروسة في همّها مغروسة
عروس نبّت في وجيعتها الزّروس
بخور و عجعاجي وجيعتها تلاجي
جاوي و كمّون و الفمّ كاتم مغبون
حنّة و حرقوس و قلبها كالقوس :
قوس باب الخضراء، بالوقت تترمّم و تبرى
قوس باب بنات، هذا الوقت الّي عليه عاركت و عيات
قوس باب بحر، كان هجروا الموج ازرعوه زهر..

ضحكت العروسة بليعتها
قلبها تباع ملاتو اوجاع
امّا خيالها ليها
يخطفها و يهرب بيها و يلهّيها
طفى الضوّ، دموعها نوّ
و هبط الغريب كالصّاعقة عليها
رجّها رجرجها و لا لحظة هيّجها
ترمى فيها كالشكارة في البحر


غطس عام يرّاه يغرق
كيفاش بعماه يرى الشمس تزرق !

هي تدزّ و هو يهزّ
في بالو في نفسها حزّ
كان صاب نفسو راهو عزّها
و على النقمة و الوجيعة ما لزّها
بكات الصبيّة ولاّت مرا
مهمهت تنهيدة و غنّات للفجر :
أمل حياتي يا حبّي غالي
خبّيني في جنبك خبّيني
و سبني احلم سبني
ياريت مماتي ما يسهّرنيش "
نسات امّ كلثوم و بدّلت كلماتها
كيف ما قدرتش تبدّل حياتها !
شهّدت : اشهد ان لا الاه الاّ ألم موت الحبّ في الحياة
و أشهد انّ الله شاهد على اغتصاب شهدي
و شاهد على موت الاحساس فوق نهدي ... "
و جبدت كتاب و قرات : "
ولا تتعجل فان اقبلت بعد موعدها/فانتظرها/ وان اقبلت قبل موعدها/ فانتظرها /ولا تجفل الطير فوق جدائلها/ وانتظرها/ لتجلس مرتاحة كالحديقة في اوج زينتها/ وانتظرها ..."
ستنّاها ما تزربهاش و سايس عليها لا ماتدزّهاش
ستنّاها ما تطيّرش حمامها ما تهربّهاش
بالشويّة تو تلقى الثنيّة ستنّها ما تسبقهاش
و كان وخّرت ماجاتش ما تلومهاش
ستنّاها، لحظة تمنّاها ما تعيّطلهاش
تي علاش ؟؟ خلّيها تسرح و كان تحبّ
ستنّاها و لا ما تتستنّاش !


p.s: certains mariages sont heureux mais le bonheur ne m’intéresse pas !

vendredi 16 septembre 2011

سهام

الصباح بكري و انا نعمل في قهوة في العاصمة ريت حكاية هاي جاية !!
ريت سهام بحذا لونيفير
على طاولة هاززها النّوم
لا هامّها حسّ، لا هامّها شكون بيها يحوم
سهام رقدت على طاولتها
باتت تخدم على عيلتها
ولاّ الدنيا خدّمت عليها حيلتها
برّة لوّج على حكايتها
يامة سهامات كلاتها الكيّاسات !!!
سهام خدمت بالليل
في الصباح ظلّها ثقيل ذليل
من فوق الطاولة تهزّ راسها: مستحيل !
حاشمة من كلمة مسّخة الي ترميلها فيها العينين !
فوق طاولتها دبدوب ــ صدّق اولا تصدّق ـــ مندوب
كيف سعدها على خليقتو مكبوب !!
سهام و انا راقدة هي مرقدتش
تتكبّ على لقمتها تحت الطواول بين السّراول
سهام و انا نشرب في قهوتي هي ماشربتش
كان الكاس الّي يسكّت وسواسها الخنّاس
تعدّى القهواجي صياحو يلاجي
"سهام فيق سهام قوم !! "
ماهياش راقدة سهام بالنّوم
اليّ مرقّد سهام ليلها تنهيدها المزموم !
عاليمين في لونيفير صحافي
هزّ عينيه مالجريدة و ترشّف و عاود غطس
عاليسار ڨاورية عريانة حمراء كيف التريلية المشوية
مدّت وذنيها لعلّ لغة العكري تلاقيها و تفهّمها آش صار
للمواطنة التونسية الثورية الّي جابت للعالم شهيلي الحرية
ثورية يا والله مسرحية ويني الثورة تجيش تقيّم هالمسبيّة ؟
سهام قوم سهام فيق ! "
هبط عليها القهواجي صياحو يلاجي
حبّ يستر عليها يعرف خدمة الليل آش تهدّ امّاليها
مدّلها يدّو لقى بيّاعة الهوى
لقّالها صدرو حسّ بسخانة الفناء
تصرّعت سهام: تخميرة !
بابا حيّ بابا ميّت بابا كواني بدات تعيّط !
دبدوبها لابّو العرق : عرق الفضيحة !!
سهام كيف تتخمّر تولّي قبيحة
للمتعدّي للمتهنّي كلامها طريحة !
"سهام قوم سهام فيق !!"
سهام موش انت الدنيا قحبة !!
نحنا الغنم و هي الرحبة !!
هي السكّين و نحنا اللّحمة !!
تو يطلبولك الرّحمة !!
و الاّ يرجموك و يحرقوك كالفحمة !!
سهام ما تفيقش علاش فايقة
الدنيا ظلمة ...

lundi 29 août 2011

تدوّر ورقة

تدوّر ورقة
تلفّها في مخّك
الكلمة تحسّها
تحبّ تحبّر
امّا تلقى روحك تشعّل
الكلمة تتكتب و ان تتجيّف !!
تي وضع يعيّف
سليانة سيدي بوزيد الرديّف
البلاد الكلّ تخيّش !
حبار غبار حشيش
الورقة تهبط ريش
سيّب عليك مالتبربيش
تترصّيك تشوتي الشّيريف
و بوب في الكوليس يتفرّج عالبوب البوليس
لا عند ودستوك عند نوت اون بلوك
وراق معبيّة بحكاياتك و وراق تدور تقصّرلك حياتك!
سيّب عليك مالغنجة راهي تعمل مرجة
بعينيها السود تطيّحلك عينيك
تنسّيك اما تورّيك الي النّور فيك
تدوّر ورقة
تلفّها في مخّك
الكلمة تحسّها
تحبّ تعبّر
اما تلقى روحك في الاحباس
يموت الاحساس ؛ تهرب عالنّاس
تشدّ الكيّاس بينك و بين العالم ورقة
وهالامّة لن ترقى و لا تقرا
و تذوب الورقةحشيشة في دمّك
و على العالم تلهّيك !
و الورقة تذوب و عيشتنا القحبة ما توب !!

samedi 20 août 2011

شقّان الفطر

مشيتلها
تبعّت خطاويها
فارغة، خالية من امّاليها
ساكتة
تستنى في صمتها تتمنّى
في هاك الوقت شكون يزورها و شكون يلهّيها
ريحتها : ريحكة كانون و مرا تنشر في صابون
و مشموم معيّن يستنى في شقان الفطر في بركون
شوارع خالية
و انا نتخيّل
انا نتبسّم و هي تميّل

عبّاوها بزبلتهم و تركوها
لا صانو تركتهم و لا نهار بش يحبّوها
جرايد، اوراق، شكاير بلاستيك
يا مدينتي معاهم شنوة التكتيك ؟
نصب، الميزيريا في الشوارع قبب
و انا هايمة لاعرفت نحبّ لا عرفت نسبّ !!

روايح منتنة طالعة مالحيوط
وكان تهرب مالريحة تطيّحكك الزيوت
ملاها مدينتي من هجركم العنكبوت
امّا الحرّة عمرها ما تموت
شدّت على يديّا
و هزّتني في ابهى ثنيّة
تحلّتلي و عملتلي هديّة
و هزّيت عينيّا للسماء
مقوى غزرتها يعطيها عزاء
رخام و فايونس و توارخ مرشومة
يعطيها الذاكرة قدّاش مشومة
مشيت في باب سويقة
شعلت في الجواجي حريقة
بلاصات خاربة و ناس عايشة في الشقوق
و سقوفات طايحة و ناس ما خايفة الموت
جرابع تتناڨز في كلّ تركينة
و قالك من سمة البلاد ياسمينة !!!

المدينة العربي
قهواجي يسربي
ريحة كانون
سرّ و كمّون
شوارع المدينة ولاّت سفينة
و رحلت بيّا لباب بحر
يا واللّه زهر
صبّت المطر
جاني الخبر
المدينة ليك شوارعها ثنيّة
هيم فيها تعرف البقيّة !!!
المدينة حوم و لاّت خيم
في باب بنات اعتصامات
مقتضيات الحركات !
قالوا ثورية !
يا ناري فيك و يا نارك فيّا
زعمة الكلّها ناوية عالحريّة !؟

بلاستيك و شكاير و كرظونة
و اتلال و جيش و عصافر ممحونة
و عييت و قعدت في ساحة الحكومة
يلعن بو الحكومات و خططهم المرسومة
آش مدخّل الحجر في الكلب الّي غدر
في الحبيب الّي هجر
المدينة عزوزة
شقوقها هوما جلودها
حفرها هوما جدودها
و زبلتكم هي خيانتكم !!

الّي عالحيوط بال وقال : هبال !
الّي عالحيوط كرطش و قال: فوشيك !
الّي عالخيوط مخط و قال : خطّ !
الّي عالحيوط بصق و قال : خمج فينا لصق !
الّي عالحيوط بات و ولّى مع حشيش حجراتك نبات !
الّي عالحيوط لصّق حبيبتو و ضربها و قال مقحبها !
الّي عالحيوط لصّق حبيبو و باس و قال لاباس !
الّي عالحيوط تكّى و بكى و تخنق و قال : غاز !
الّي كيفي على حيوطك كتب من غدوة تفسّخ و تسبّ!
يا مدينة يا هايمة
عنّقني اعشقني لا انت و لا انا عليك صايمة !

شقّان الفطر
نفذ الصبر
اخرجوا بخطاويكم آلمدينة زهّيو
غنّيوا و باصواتكم المدينة عالحزن لهّيو !!
سيّبوا دياركم و اهبطوا للشوارع !
المدينة مع الخوف وحدها تتفارع !

يذّن الامام و يتخبّى المشموم
وجنوب بلادي بهمّو مهموم
انا في القصبة و وجيعتي في بقايا نصبة
هو يكبّر و انا في روحي نصبّر
الّي يقاتل و المقتول يخمّموا في شربة و لاّ في صحور ؟
خمّمو في قهوة و لاّ في بخور ؟

آذان ...احزان... قلبي بهالمدينة مليان ...