انا البلاد

انا البلاد الي ماتوا عبادها و تحرقوا ولادها و تشدوا احرارها و فيهم الي باعني و باع اسرارها

انا البلاد الي على كل لسان كالشعرة و تخليك  لا تعرف تحكي لا تعرف تسعى

انا بلاد البطالة و الزطالة الي ماتوتوا في البحر و كلاهم الحوت و ولاو خبر

انا البلاد الواطية الي كيف نولد نهبل و الي القلوب كيفما اليدين نكبل

انا الي ما تسواش الي حبيتها و ما نعرف كيفاش و لا حتى علاش انا البلاد الي ما ثماش

انا الديناروقراطية الي معبية حسابات البنوك الاجنبية و ناسية خيركم و عرق يديكم

انا البلاد الي تاكل في الغلة و تسب في الملة و عاملة في قلوبكم الف علة

شرعت التقفيف و ضربان الخفيف و ابدعت في التتليف و التزييف

انا البلاد الهايمة الي احلامها نايمة و جواجيها عايمة بالغربان و الاحناش, بلاد جيفة عملت الريحة و لغتي على جلد اولادي قبيحة و الا نرضى لا بحب و لا بمجرد تركيحة نحب الكف و التكفيخة

انا بلاد القحت و المجون السياسي و الشجون الفكري و التحرر السخافي شعارات و اعتبارات و هيبة و وقار وقت القرارات بفضلها الناس ما تستقات

انا بلاد الجوع و البرد في الضلوع و الحبيب فيا يا ميت يا موجوع و الشاعر داعر يبيعو في كلامو للبيران  كيفما الي هدا جلدو للنيران

انا هيا الي ما حكاتلكم الدنيا عليا يلزم تشوف بعينيكم  و تتحرقوا عليا انا هي بلاد الاسياد و قهرة العباد العبيد العابدين المستعبدين الي على اي قرار مستبعدين

انا بلاد الخبز الي يتباع بالدرقة و القمح فيا ولا سرقة و لا عيب و الا موش حلال ماهو من هنا يبدا الاستغلال و الاستفعال فيهم و الاستنكار منهم

ابن بلاد الالغام بلاد كانت فيا انغام ووليت غنام سارحة تحت الزيتونة و تعيط زيدونا!! على ترامينا!!! على دين والدينا !! العيب موش فيكم فينا !

انا بلاد الطبرنة و الهم طفرنا ايه بهالتجوليغ موش عاجبك اعمل تبليغ اللغة موش انا الين صيغ !!

انا بلاد الدموع الي تتدحنس مع الجوع وكبت سعد معنى لا للخضوع بعدا لميتها يسار و خوانجية و شوية ماركسية على طرف لحي مكسية

انا البلاد الي طردت راجل و بعدتو على مرا و كي حبتوا ما قالتلوا و قالت كيفاش يا اندرا ?! و كيفوا برشة و كيفها مازلت بش ترا... لموا حوايجهم و الوحش مارجهم و خلاو اهل البلاد في البلى و لا عاد همهم لا فيها لا ضو و لا ماء هوما الرجال و احنا يعطينا داء

انت البلاد حبيناك و ما خليناك و عطيناك  و ما لمناك و حتى كي شويتنا, ذليتنا, كبيتنا حرقنا رواحنا و ما حرقناك ...

واحد شعل بالنار و لاخر حرقوا بالوا المحتار و لاخر حرقوا النضال و لاخر حرقلو كبدتو شراب بودينار و لخرا حرقلها وجها بش ما تزهاش و كي حروقها ما ثماش و لاخر شعللها نارها في كنينها و سرق النار و هجر الدار عمالها معاميها و كرهها في بدنها و اماليها  و فما الي حرق اما غرق و ما الي حرق و روح للحبس الي يلوح و فما كتيبتي تحرقت خاطر وجيعتي تخرقت من كثر اللمبالاة الي ما عندوش سقف وين تحبوه يبات ? ماهو خليولو شوية شعر و ابيات !!