كيفاش قلتولي؟

كيفاش مالة كيفاش مالة الحب حرام يا و لاد الحرام ؟
كيفاش مالة العشق زناء و بغاء و فجور ؟
كيفاش قلتولي؟ و تحبوا تقنعوني ؟الي المرا عورة و الي الدين تحرير و ثورة؟
كيفاش العينين يلزمهم نقاب و الحب للتراب؟؟
كيفاش باش تحب الناس لازمها تتخبا؟
و الشفايف تتهرب خايفين مالسبّة؟
كيفاش قلتوا؟ يلزمنا عُرف و عرس و شاهدين و ماذابيهم ذكورة يا جبورة ؟؟
كيفاش المرا بش تطيع يلزمها تتضرب و تتسب و تتهان بش عضوكم يطمان؟
يلزم عينيها تدمع و الدمعة تاقف ما تهبطش بش ما تتسبَّطش ؟
و تقلولي عقيدة و ايمان؟ و تحبو قلبي يطمان و نعلقلكم نيشان و نهبط عينيّا و نحرِّك وذنيا و نطبِّس راسي و نقول امان!!!! كيفاش بأنا وسائل تحليل تحبوني نشرَّع للتضليل و لممارسات الحمير؟؟
غلَّبتوا عليَّه بنفطكم وجواريكم و موعظتكم و ارشادكم للي حواليكم!!! و غلَّبتوا عليَّه بشَريان التراب و بيعان الهمة و التفاني في عقد القمة!!!
قمة منا و قمة غادي و مجلس هوني و مجلس دوني و اجتماعات و متابعات و نحنا بينكم كالضبعات و رسائل و مراسلات و تحيات و تجليلات و اكبارات و انا نعيط و نقول هزوا علينا الخراواط !!!
فلِست معاكم! و فِلْست لغتي بيكم و الي ما يهزكم يلزم يجي نهار و يضحك عليكم !!
كيفاش يا اوباش؟ و زاده علاش المرا و الراجل عندكم الحرية ما يستحقوهاش؟ جبتوها من عندكم بش نشريوها عليكم!! ياخي نسيتوا اصلكم و مفصلكم و حجركم و منافيكم؟ يا خي نسيتوا شحرقتوا و اش كسرتوا و اش خربتوا بش تقولوا نحنا الكل في الكل ؟ حرقتوا الي ما يتمسّش الي الرب بيدو عليه يتغشش بغُلّْ مغلّلِين, ناقمين, عالدنيا بازقين, و تحبونا وراكم عساكر كرظونة متصففين!!
كيفاش المرا ما تسواش و يلزمها تكون النُصّْ و الا بلاش ؟  
 ياخي نسيتوا الي بلا بينا راكم انتوما ما ثماش و تقولولي تكريم تتريم ايه اما تكريم يبطى شوية ترمتوا المرا و الراجل و عملتوا منهم زاني و داعرة وقتلي عينيهم تخطف و نارهم ما تهداش
تفيه علي ما يسواش و عالدود البرباش الي ينغش في لحم الجيفة العيفة الي باعت ذمتها اخمج منوا و كيفوا ما تسواش وقت الرسمي الكلها تكسكي لاسيادها الامريكان و يحبونا نحنا نلبسوا سلاسل و متاعنا عريان يا والله زمان
ناس تقَدم و ناس تخلق و ناس تبدع و في العالم تَفْلِقْ:  كتب, تصاور, قصائد و مجلات و فنون و رسم و ابداع و نحنا في العراق ليوم بدينا!!! عملناه بيدينا و كانو البارح ما ثماش!! و فلسطين و قتلي القنابل هابطين عالحيين و الميتين الاخوان يحرقوا في القهاوي خاطر شوية نساء فيهم راكشين !!هذا اذا تصوركم للدين؟؟ ايه مالة يرحم اللادين و الملة و الناس الرافضين لافكاركم العلة !!!
كيفاش الفلسفة ما تتقراش؟ و العلوم ما ثماش ؟ يا مفتي يا فرفاش تلوج عالخندق يا برباش!!  متكتّلين عالغرم متوافقين تحبوا تعملوا حصن حصين على عقول المؤمنين و تحميوهم مالمفكرين و الادباء و المعلمين ماشي في بالكم سلمتوا و سالمين؟!
كيفاش علمتوا الصغار تحفظ و تحيا و تموت و صفحتين ما تقراش؟ نسيتوهم في الحلاّج و ابن الرومي و كل دقيقة تفكروهم في عذاب القبر بش يرضاو بالذل و يعيشوا راكعين خاضعين 

وجوه زرق كيف النيلة و لحي تتدلدل و ما بيدينا حيلة,,, كروش دازه كالدلاع و سنين تقول انياب الفاع و خطاب عادم  مستعدم عدمي يحرق الجواجي و كالافيون يعمي المخاخ و العيون و يخلي الجربوع يحس في روحو فرعون!!!!!
كيفاش مالة؟   ممنوع التدوين
                               ممنوع الحب
                                        ممنوع التمثيل
                                                           ممنوع التزيين
                                 ممنوع الغناء و التلحين                                  
                   ممنوع التفكير

كيفاش؟ خلِّي في الجنة خير و اليوم ندزوا عالشخير؟؟
كيفاش؟ من منتصر للمهدي المنتظر؟ و ار قدم يا مواطن سر لا تشارك بل فبَارك ؟
كيفاش قلتوا؟ و كي نحِبّْ نبوسوا اش نعمل؟ نستنَّا الجنّة؟ نعرفوا بزناس و غادي بش يكثروا الجواري و الهلواس اي عاده!!! خليوني نفرح بيه ولد الناس!!!
و كي نحب نحبوا؟ يلزمني اش نستنى و كي يموت و  يفوت الفوت و نمشي لجهنم و يمشي للجنة نقعد ميتة مكوية و حية نستنا ؟
باهي و الكاس قولولي يا ناس نبزعوه و يضيعوا الجلاس و كيفاش تحبونا ننساو هكاكة ابو نواس و ننساو بالشيخة هزت الانفاس؟
لا لا كيفاش و لا علاش!! ميسالش ما بيناتناش البارح انتوما اما اليوم ما عيناش لا بيكم لا بلِّي راعيكم لا بلا مستقبلكم لا بفتاويكم و لا بفلوسكم و لا ببترو دولاركم سيبوا ترابنا و شِدوا دياركم!!!  نحنا نحبوا الافيون متع بودلير و نحبوا معاه لو سياكل و الاخوات ليميار!!! و نحبوا طرف جبن و مشتقاتو تحت التور ايفال الابراج العالية و الا الواطية قليل فينا شكون يقراها على اعمدة الصحف !!!
هزُّوا طقوسكم !!! خمسين سنة لتالي في بلادنا تنحَّاتْ فولارة موش توَّة بش نرجّعوا للروس في شكارة!!
خمسين سنة لتالي النساء قرات فلسفة و موش ليوم بش نقوم انا نِمّن بالهلوسة!!
خمسين سنة لتالي و نحنا من عام لعام بتوالي لا عاد عنَّا ممثّل و لا عاد عنا والي الكلها لا تبالي تو كي يِجدّْ الجَدّْ حتى البيرة تو تلقاوها كانت و لن تَعُد