ميسالش ما نعرفش

ميسالش نقول الي انا ما نعرفش? و ميسالش اعرفوا انتوما اعرفوا الجن وين مخبي اولادو! اما انا روحي ما نعرفش عليها وين  ميسالش انا مازلت نخمم ? تنجموا تعتقوني نزيد نقرا شوية ? و انتوما ميسالش كان خممتوا و كملتوا و عرفتوا و اخترتوا و رفعتوا و صفقتوا و عيطتوا و ناشدتوا انا ماذابية نزيد شوية شوية وقت لين الفرخة تولي بنية و لين البنية تولي مرا حية تتنفس و ما تتخباش تشهق و ما ترجعهاش لا لتالي لا لقدام تعيش توة خاطر غدوة ما يحياش

ميسالش? ما تراوش مانع كان نزيد نضيع? راهو بطبيعتي ما عندي ما نبيع و ما نيش نخمم بش نطيع!!

ميسالش كان نقعد لاني هنا لاني غادي? موش خطة استراتيجية اما رغبة في الانتقائية تعبر على نوع مالسكيزوفرانية

ميسالش ماهو نزيد نصب كاس?  و ما تخافوش راني لباس و مانوليش  ابن الغفاص الي يعربد في الكياس ماذابية كي نسمع المقياس نشطح مافيها باس ميسالش ماهو

ميسالش ماهو  نتذكر و انتوما انساو? نتذكر في بلاصتكم و الغلبة ماكلتكم و الهم فيكم اما  ميسالش تو نتذكر الي فرحات حشاد نقااااااابي موش نِقابي و نتذكر معاه و مع اياماتو اللغة و الصرف و النحو و حتى المحو موش محو الامية برك محو الذاكرة زاده في بلاد باعت ذمتها لسيدي بولبابه

ميسالش نصرّف  الافعال بما لا تشتهيه الرياح ? ميسالش نصرفلكم مستقبلكم في الماضي و ماضيكم في الي تعدا و الي  فات و موش بش يرجع ! و يمكن في وقت  ما نلقلوش وقت و انتوما اهوكا صرفوا الحاضر و الماضي و المستقبل و الي مشى و الي جاء و الي مات و الي حيا في الوقت الي تحبوه... اما فعلي انا اعتقوه, نفسوه, سيبوه

ميسالش نبكي و قتلي انتوما تضحكوا? و انتوما دليلكم ملك و كان تحبوا اخر قرار اخر قرار ماكم تعرفوا المسامح كريم وا نا راني ما عنديش كاكتيش نقعدكم عليه تي اوووو ما تمشيوش لبعيد  موش باهيلكم اقعدوا حدكم حدالقاع نقصد ما تخافوش من شوكي و لا من شبوكي ههههه لا اكثر و لا اقل

ميسالش نجبد الريدو متع بيتي من غير ما نخمم في الهم و الغرم  الي وحلنا فيه ? ناس غارقين للجواجي و ناس تصطاد بش تنجم تلاجي!!

ميسالش نزين من غير ما نتدين حتى كان انأ بدين ? و انتوما اهوكا في بلاصتي غطيو كاموفليو و قولوا ميسالش الي انتوما شرفاء و خليوا كبار الحومة طرفة اما ما تنساوش كي تقدموا الاخبار الي الباء تفتح موش تتكسر خليوهم يرتاحوا في القبر كي في دنيتكم ما بقالهم اثر

ميسالش? راهو ما فيها باس جماعة تسكر و جماعة يصليو و جماعة تغرغر و لخرين يغنيو.... ماهو العنين المطبسين الي في القاع واحلين لاصقين يلزمهم عينين حمر و شاعلين يذكروا الي موش بعد كل كلمة امين و موش ثنية الدنيا السراط المستقيم ثنية الدنيا دورة و دورتين كفم يتبسملك ويقلك ما نعرفش لوين ماشين اعرفوا انتوما ميسالش نحنا ضايعين و على التيه اي التيه قابلين مصادقين لحظة تهز و لحظة تجيب و دنيتنا ماهاش في الجيب اما ساعات نادرات لهبلتنا تستجيب

ميسالش انا نسال و انتوما جاوبوا ? اما واحد واحد من غير ما تتناوبوا خاطر المجالس يتعايبوا و شكليتهم المفرطة جابت لكل واحد فينا كم من مصايبوا

ميسالش كان انا ما نعرفش و اننتوما تعرفوا ? اعرفوا الجن وين حط اولادو اما ما تعرفوش الانس و وسع بلادو

ميسالش نعرف نرفع و قتلي انتوما تكسروا? يكسر حروفكم ! و يخليكم بلا افعال !و ميسالش نضم و قتلي انتوما تحطوا الشدة اي نقصد تتشددوا ?

ميسالش!!  انا ما نعرفش و انتوما اعرفوا !! و بيعوا المعرفة و دجلوا بيها و كان لزم ادفنوا اماليها !! اما انا خليوني ما ننساش بش غدوة في المراية كيف نرا روحي ما نبصقش و نقول قداكش ما تحياش!