mardi 29 mars 2011

بنت طراد و شيت ليبر حبّوا يحكيوا .....


 احكيلي ما تشكيلي خلّي كلامك فنّ تشكيلي !!


 نحكيلك من ورا البيبان، من غير ما إناديلك ، نحكيلك حكاية الانسان


الانسان الّي في عشقو خرّج قلبو عريان !!! و لا خافو يتبلّ ولا خافو ڨرسان احكيلي يمكن نطمان


منين نبدا الحكاية ؟ أنا ناس نساتها الغناية ، عشقت السكات ، لعبت بالكلام ، تكلمت ، تألمت، وما قالتش . بردت و ما حكيتش . نجي عندك نتخبى ؟ تحكيلي عالمحبة ؟ تقلي زعمة علاش ؟


و انا منين نعرف لعلاش و لاّ الكيفاش ؟؟؟ انا نعرف كيفك ، يمكن، كان اللّيل الڨرّاس الّي في قسوتو على كرايم العشّاق عفّاس !!! اما كان تحبّ تجيني ايجا و جيب كلامك فاليجا اذا ڨرسنا نعملوه غطى و نتخبّيو بيه عالسماء !


نبداو الحكاية بريحة النسري ، نصبلك قهيوة تنسي ، والزهر في روايرينا خليه يسري ، اسمعني :

نحكيلك على الفليجة ، معبية أسرار الترهويجة ، فيها تصاور أبيض أسود ، فيها نصدق وفيها نكذب ، نحكيلك :

نحكيلك على عشيري ياسر :

في دشرة منسية ، عاش ياسر ، ومات ياسر . وفي قلبي قداش ياسر حي . ياسر الأبكم ، فهم الدنيا على بكري ، بلع لسانو ، غار على كلامو ، ما عطاه لحد . يقولوا عمرو ما تكلم . وياسر ياما تألم . جاء من بلاد بعيدة ، حد ما يعرف أصلو ، وكل واحد فصللو قصيدة . ياسر يتكلم بالتنهيدة . تغزر لوجهو تهزك التفرهيدة . حطيتو قدامي ، نعرفو مش كيفهم ، كيف نشكيلو، يفهم إلي بيا . قتلو :

ياسر خويا ، نعرفك تسمع فيا . إلي بيك راهو بيا . ما نعرفش حكايتك شنية ، أما نعرفك كيفي ، طوالت بيك الثنية . آش تهم الحكايات ، التفاصيل تتغير ، والمحاين هي هي .

فتكلــــــم وتألـــــــم ولتمــــت في الكلمات ....
 
يا سر كلام في الظلام و يا سر الظلام غماق للي راقد و للي فاق !! لاعاد نور و لاعاد آفاق ما تلقى كان المشتاق !!

المشتاق لغزرة و دموعو غزيرة !!! المشتاق لكلمة و كلمتو اسيرة !! المشتاق لحلمة و هو الحيرة !!


ولقيتك فهمت الحكاية ، من غير ما نطول ، ياسر هاو حذاية ، ساقيه مزروعة في التراب ، حذا راسو نبتت شجرة غريبة ، من هاك النهار تضلل علينا ، كيف ما نلقى شكون يفهم كلامي ، نمشي لياسر ، شجرتو تعرف تجبر بالخاطر ، وكيفها كيف ياسر ، من غير ما 
 تتكلم ، حنينة .

jeudi 24 mars 2011

بين البينين !!!

بين القهوة و القهوة ... لهوة ... سهوة ... ننسى نهوى ...
بين الكاس و الكاس ...كيّاس... افلاس ...وجيعة راس...
بين النوم و النوم ... يقظة ... نبضة ... حريقة قبضة ...
بين النهار و النهار ... استشعار ... تغيب الاشعار... يهدّ العار...
بيني وبيني ... لا كلام و لا سلام مواسيني .. و شوافر هاجّة و عاشقة تجافيني
بيني و بينك .... لا عاد نسأل ... لا نقول فينك ؟؟
 بجهلهم نافينك و يا ريتني منفاك !!!!
لا تِسئل ... لا تقول بيني و بينك ... لا تنسى هاك البوسة على جبينك !!!
و في المنفى ما يولدوا العشّاق ... و كان زهاتلك الدنيا : ما تنسى و الحبيب تشتاق !!!
بين العشقة و العشقة ... تطرشيقة كفّ ... و لاّ طلاق ... يموت القلب الخلاّق ...
بين الذكرى و الذكرى ... تحيا فكرة ... مع السكرة ... تموت السكرة نولّي في الذكرى أطياف ...
بين الصفحة و الصفحة .. مرّة نسكر... عشرة نصحى و الباقي لغة تهزّها الارياح ... الصياح...
بين الكلمة و الكلمة... تموت الظلمة...  تطفى الشمعة .... تضوّي الدمعة .... و الحبار دموع ولاّ للواقع زيّاف !!
بيني و بينك .. لا عاد نسئل ..لا نقول فينك ....ماهم فيّا نافينك و اذا انا  المنفى : مرحبا بيك في الاوطان يا صانع الاحزان و مغيّر الحزن في همّو فرحان يا والد الالحان في جواجي الاوطان !!!!

samedi 12 mars 2011

نجي نبكي عندك ؟؟؟

نجي نبكي عندك ؟؟؟ نجي نهبّطهم حيار  دموع فرحة موش دمار !!! نحبّ روحي تخرج من بدني في دموعي من جروحي و تهبط على ضلوعك ضلوعي !! نحبّ نسقيك و تحت شوافري منّي للدنيا نسربيك !!
و كان تجفّ جنينتنا مالجواجي نسقيها بش حلمتنا بالدمع نلاقيها !!
ستانسنا بالدّموع كالظلمة و الشموع : نور في الظلام و فاصل في الكلام و كلام تحت الحزام و علاش الملام ؟ مانا خدّام العشق و العشق مالينا و فمّا حاكم بلا بينا ؟؟!!! يا عيني كيف نشعّلوا في الليل بدنّا مع جواجينا و تتصفّف النجوم بش تحمينا و ترخي الموجةخطوتها بش نِفَسْنَا  يزهّينا !! و يتمدّ الرمل تحتنا حبل : من هنا الملام من هنا أبنّ منام !!!

و تتحلّ السماء و تهزّنا ماللوطى لا حجر و لا عصا : العشق قدر العشق قضاء !! موش لازم محامي !! بيك بش نحامي على روحي، على جروحي، على نوحي و بيك انت بش نوحي و نقرا و نقرّي الشعر حبّ و نورّي و نبوح للوقت المجروح بقوّتنا كنهبطوا عالليل ــــ البحر، بابور لوح !!!!
و تغوص فيّا و تجبد آثار منّي و من جواجيّة و نمِدّهُمْلِكْ موش مزيّة : في الظّلام كيف يوفى الكلام انت الثنيّة ؛ انت الكلّ و حتى البقيّة !!!
حبّني مالدنيا هزّني و  خلّيني نبكي عندك موش عيك : دموعي همّها انّها تسقيك و تبعّد الشياح عليك !! شياحك ما يميحش مع ارياحهم و عشقنا اقوى من سلاحهم !!! 
نحنا هوما القضيّة و الهيئات و المجالس التأسيسية : نحنا العشق فينا لقى ثنيّة و من وقتاش البشرية بعدت على العشق بش دافعت عالقضية ؟؟ نحنا كلمتنا مش مبليّة و هذا الحدّ و هذا الجزر و هذا المدّ : غوص فيا و تمدّ!!! بلا بينا ما يحيا حدّ !!!!
لاتقلّي سياسة لا تقلّي قضاء؛ لا تقلّي اعتصام لا تقلّي بقاء!!! مادام في بلادي مسلّط عالعشّاق عصا و يلزمهم بش يحبوّا يتكبّوا و ساعات ،بعضهم، كيف يكمّلوا يسبّوا !!! ماثرتش اذا في قلب حبيبك ما ثمرتش !! الثورة عشق لامتناهي موش حركة و كلام ساهي !! 
نجي نبكي فيك ؟؟؟ و بدمعي ترابك نسقيك ؟؟ نجي و لاّ لا ؟؟ راهوا الشتاء خرج و الصيف جاء !! اختار قبل ماتحتار راهو دمعي ينجّم يولّي ثار و منار !!! نجي نبكي عندك بش دمعي ياقف و تبقى بعدي واقف كيف تتفكّر المرا الّي كساتك بدمعتها و كي روحها عليك سالت لا خبّاتها ولا قمعتها !

le texte lu :) no93od CHOUKA fi 7AL9KOOOOOOOOOOOOOOOOM !!!

vendredi 11 mars 2011

sourire-larme ...

un sourire à moitié en larmes
une larme qui sourit quand elle surgit
une fleur tant pis si fanée
je fus une rose quand ton sourire m'a serrée
je suis fumée et des fois je deviens brume
je crois être un songe quand le réel dérange
je crois être une figurine quand au loin tu dessines
tes rêves et tes chimères
tes rires et tes colères
ton bonheur et ses lumières
je me défragmente pour n'être qu'un personnage de conte
je me décristallise pour qu'aucun moment te monopolise
je veux t'être légère, volatile comme une prière
je veux t'être éphémère, éclairante comme une lumière

je suis une palette de nuances:
nulle douleur mais un épuisant bonheur
je suis une conséquence de fous espoirs en partance
je veux être une caresse de l'idéal qu'on délaisse
ce que je suis n'est pas que mon choix
ce que je suis c'est un peu toi, les autres, les sans-voies
je suis le mot que tu crées et pour être je dois rimer
je ne veux pas être un sonnet qui agace le seizième c'est pas ma tasse
je ne veux pas être un vers en prose, les mots y posent!!
je veux être un verre libre qui te monte à l'esprit qui t'enivre
je crois être une image décalée de ce que je suis dans la cage*

je suis des pages que je ne saurai écrire sans toutefois maudire
peut-être pas une page
la marge où c'est vide
où toute l'ignorance de la fragilité se dévide
peut-être pas une marge
la charge où on puise
où l'oubli est et tant pis si je me vide
et alors? et alors? 
forte, aucun vent ne m'emporte
déterminée, aucun risque de trébucher 
on me pense somme de clichés
je pleure face à la beauté d'une fleur
je suis en transe quand la musique danse
je pense quand le sommeil t'invite pour ne rien gâcher
je range mon bordel intérieur pour qu'en moi tu oublies les heures
je fouille mes archives poussiéreuses pour te sortir une pensée chaleureuse
pour toutes ces raisons d'être je suis ce sourire épuisé
et que je suis sans le vouloir ce regard aiguisé
  une incompréhension si on ne prend pas le temps
  une défaillance si on abandonne l'espérance
je voulais être un sourire juste pour le plaisir d'offrir
offrir un coin illuminé qui a su contre vents et marées se préserver
je voulais être une caresse pour la pure sagesse de la folie passionnée
je suis, ce soir, une larme qui parle pour ne rien dire
mais je suis, à cette heure, un sourire qui tente de rectifier le tir
j'expire le pire pour te garder au mieux
j'inspire la vie pour te souffler en mots
je te pleure pour mieux sourire et je souris avec épuisement en te voyant partir
je ne retiens pas les gens parce que secrètement en moi je les tiens
je les pousse à partir, à s'envoler parce que j'aime les gens en liberté
tu pars, oui, mais en moi s'est ancré ce que de toi t'as bien voulu donner
je suis une suffisance de ta présente absence
je suis une existence que la vie balance
je suis une éternelle errance d'une défaillance à une défaillance
je suis ce que tu ne sauras jamais parce que l'égocentrisme atteint ses apogées
je suis ce que tu as perdu parce que tu ne voulais guère me gagner
si seulement tu avais su, j'aurai tout pu même être le pont vers l'Être désintéressé



p.s: cage c'est la cage thoracique c'est le coeur et du coup ttes les émotions

lundi 7 mars 2011

نخمّم فيكم

نخمّم فيكم في كلّ وقت انتوما سلاحي ضدّ المقت .... انتوما البديل و يمكن حتّى بعد الثورة السبيل بش قلبي يحبّ و يميل ... نخمّم فيكم صباح و ليل و نعرف إلّي مستحيل مدام انتوما يعيش الشعب ذليل !!!
نخمّم فيكم مع القهوة : تحت بن  علي انتوما الزهوة و بعدو الصحوة !! انتوما شعب المستحيل انتوما الخيل لا سرج و لا فرس انتوما السّبيل ! انتوما الأمل الّي عاش و ما مات ذليل!!
نخمّم فيكم و بالكم لاهي و انا بيكم قلبي  زاهي بعد الفشل زرعتوا فيّا كونت كونت الأمل و منعّتوني مالحبل و سرحة كلبة وسط جبل !! منكم جبدت الأنفاس و بعدكم أنفاسي أحباس !!
نخمّم فيكم و نبوحلكم و قدّ ما نكتب مستحيل نصورّلكم و لا حتى حبّي نصونلكم !!! غدوة عيدي يا رجال و كلامي ليكم موّال : انتوما الحال و انتوما الأحوال !!!
نخمّم فيكم  و يجي نهار و المرا تحيا بيكم بعد ما كانت في قربها بعيدة عليكم !!!
نخمّم فيكم مع الكاس كيف نبدى شايخة قاطعة الكيّاس و مدن العالم تعيّطلي و تقلّي : ايجا ما فيها باس !!! و نقول لا : شعبي شعب كبير شعب حنّ و ما نسى الخير و كيف جاتو نهار صحوة ضمير لا تنكّر و لا فكّر مشالها فرحان و بفرحتو سكّر من فلسطين للصّين !! انتوما الشعب الّي مدّ يديه قبل السلاح و حاسب بش يرتاح !!! انتوما فتقّتوا القوانين و هبّلتوا المؤرّخين و خلّيتوا طاغية شعوب القهر ينين : لهذا نركعلكم و نقلّكم على قرارتكم قادرين و آمين !!!  انتوما الشعب الّي هزّ و بكليمة دزّ !! فهمتوا علاش قادرين ؟؟؟ صالحتوا الكاتب مع اللغة وفكرتوه في ذهب قبل هرب و ما قدر يصوغا !!! انتوما اللّغة متع ثورات القرن الواحد الالفين انتوما البداية و النهاية و آخر حنين !!
نخمّم فيكم تاعبة كيف نرتاح، كيف الهمّ بكلامكم وضماركم ينزاح و يصبح العشق موش منكر امّا مباح !!! كيف المرا ترقد عريانة على صدر حبيبها للصبّاح !!
نخمّم فيكم ... هوني و لاّ بعيدة عليكم انا كلامي سخرّتو ليكم و انتوما آش عليكم ؟؟ سبّوني ارعبوني اهجروني و ما تحبّوني ماني طالبة شيء: طالبة يسكن قلبكم ضيّ العيون و هبال القلب الّي بحبّكم مجنون !!

vendredi 4 mars 2011

سيدي الشيخ ..

سيدي راشد الغنوشي تنجّم تحطّلي سكينة على عنكوشي اما ما تقدرش تسكّتني و فكري "توشي" سيدي الشيخ عليك نشيخ كيف تبدى تهدر و تصيح و تردّ الديمقراطية نبيح في وسائل الاعلام !!! و انت تحب تهزّ المخاخ للاستسلام و تحب تهبّط على الاحرار ظلام !!! الكلّنا البوعزيزي و مستعدّين للفناء بش تحلي الحياة !!!
سيدي الشيخ يحب اربعة نساء و ماذابيه بكاكش و صايدهم العمى !!! كي هو عينو ما يقولووش لا ، لا يمهّدهم بطريحة تنسيّهم في السماء !!! 
سيدي الشيخ داه في طحشو يحب المرا في الفلفل"تَحْشُو" ههه !!! سي بولحية شاهي يحيا علا كرايم سيادو النساء ماشي في بالو الشعب نسى يعطيه خازوق و عزاء !!!
سيدي الشيخ يحكي في الثورة ههه يعطيه عورة، في عينو، موش منّو مل واطي الي توّه راكش في جدّة : قوّاه !!
سيدي الشيخ نساء البلاد عندهم وصيّة : اذا بعد الثورة بش تجيب الرجعيّة تنجمّ تروح للسعوديّة !!!
سيدي الشيخ يحبّوا بلّوشي هذاكة علاش سكّر الماخورات و يظهرلي كان عامل انخراط !!! يعطيه بلحاط دمنا ما شاح و هو جهلو برّاح مظلّمها علينا ليل وصباح !!
سيدي الشيخ بش يقننّ البيرة يحبّ على ڨيرة !! يحبّ يحرمنا مالعنب، سيّب عليك تتعِبْ! شعبنا شيّاخ و زبراط لا يحبّ العصا و لا الموعضات !!! سيدي آلشيخ تحبني نصيح : " لا تخونيج و لا رجعية هزّووا علينا هالبلطجية !!"

jeudi 3 mars 2011

يا عيني عليكم ...

يا عيني كيف تجيو لبالي تزهّيو الليالي بدمعتين و برشا حَنين ... مشتيو و خلّيتونا حيّين مكويّين لانا عارفين نشطحو و لا على قبر نهّبطوا دمعتين ...
 يا عيني كيف وجوهكم تتعلّق فوق حيوط دموعي و تدفّي ضلوعي الباردين !!!  شهداء نحنا بيكم اوفياء ... انتوما الشمس و انتوما الماء بلابيكم ما ثمّاش لا وطى و لا سماء .. انتوما كفن دفن العفن و انتوما التراب و روح الوطن .. لا شعارات و لا استثمارات انتوما الصوت و العياط روّضتوا السياط !!! ...
 يا عيني كيف النوم يهجرني و حبّي ليكم يحيّرني و من سكرتي يفيّقني و نلقى روحي نهوم بين القبورات الوجه الآخر للثورات نلوّجلكم على فقرات قادرات على تفسير الخنقات و تحويلها لقرارات شعرية ثورية تحررية ما عندها حتى قضية كان البشريّة !!
يا عيني كيف نسمع فيروز و مالشباّك نستنى نراكم في نوّار اللّوز .. نحبّ نراكم توحشّتكم ! نحبّ نراكم و نعرف باش حاجتكم !! بالذكرى و لاّ بالفكرة و لاّ بصوت يقرى في قصيدة هاربة عليه كان حكات على ليوم خايفة من غدوة عليه !!!
 يا عيني كيف عقاب الليل تمهمشوني و تفكّروني فلّي فات وماعادش يرجع و فلّي كان فينا يقمع و ما ريتوهش ليوم يقبع في المنفى و الشعب ثاير فرحان !!!
ياعيني عليكم يا الحيين يلي فيقتوا الاحياء ــــ الميّتن !!! في لبلاد ثمّة مسيرات لا تاشير و لا استرخاصات !! الاحزاب بعضها مرخّص واغلبها ديما  مرخّس اما انتوما ادرى !!! في لبلاد فما صراعات فكرية و ايديولوجية مازالت ما شدّتش الثنية اما عندها القابليّة !!!
يا عيني عليكم كيف تهدّوا عليّا و تتملّكوا صوابعي و حباري و عينيّا تسيّلوا الكحُل و تفتّحوا الكلام على الاوراق نوّار فلّ يفوّح الغلّ و يخليه مالشبّاك يطلّ و يرى نوّار اللوز و يسمع فيروز ويتفكّر الّي فينا الكنوز !!!
يا عيني كيف فيّا تطلّوا و الخوف فيا تذلّوا!! تهدّوا الإلهات و تحلّولي السماوات و نتفكّر الّي بيكم الزيتونة و الكرمة حيات !!
يا عيني عليكم ...

اهداء لرفيقة و صديقة غادرتني قبل عامين و ثورة !!