ما نعرفكمش

ما نعرفكمش و لا ريتكم و لا ريتوني اما في الذاكرة سكنتولي اصواتكم ما بين ستة مليارات عيطة عيطة نعرفها و كان نسمعها نتبعها لا ريتكم و لا ريتوني اما في الجواجي لصقتولي وجوهكم حمراء مالعياط لا خفتو مالعصا و لا خفتو مالسياط الدم في عينيكم و الهم و اخيرا خرج من جواجيكم و ماذابية واحد وحدة نلاقيكم

ما نعرفكمش و خايفة عليكم خايفة لا يتطربق المنداف و توليو بعد الوجوه اطياف و تتنساوا و تتبلاوا و بيكم الحفر يتملاوا

نسمع في صفارات الانذار و الاسعاف و هذيكة نتيجة الاستخفاف خاطر كيف الجوع يحكي الغل ما يستناش و ليوم نسال و نقول علاش

علاش لزيتونا للتركينة و قطعتونا بالسكينة و خليتوا مخاخنا كيفما جواجينا رهينة في التركينة ? علاش الارواح ما تسواش ? علاش كارنا و ما حقناش? و علاش الغبن ما يوفاش? علاش العظام بايتة تتكسر و المخاخ ما قادرة تفسر ? و العينين شاعلين قدام تصويرتين و موش عارفين الضحكة منين ? مالغبنة و الا علي نهبنا و نسى يجاوبنا كي كلمناه ? تي علاش ضحكة هاكلطفلة ماكيفهاش وسختها يا كلب بالدم يلي ماتسواش ? لا نقلك و لا نقلك عس, عص امك موش خير من امها و لا همك اقل من همها اما فمة ناس همتها ميتة ما ثماش! لا تهمها دموع و لا تهمها شموع و لا تهمها ضلوع مكسرة و ما تداواش!!

ما نعرفكمش و قلبي عليكم و قلبي حتى على اماليكم و نقول علاش علاش ناس تبات في الظلمة و تستنا في الزدمة و ناس ترقد ما يهمهاش?

علاش ما فهمتوش الي الذاكرة ماكينة كي تخدم توقف الكرطوش? و لا عاد ينفع لا كلام مرزي و لا منقوش ? اما قولولي علاش خبيتوا عليا الي العزوزة هاززها الواد و فايقة الي العام موش صابة و عارفة بسفساريها الي بلادها غابة و محللة و كلامها معللة تحليل منهجي علمي موضوعي لاهو خوانجي و لاهو شيوعي الي هالهم ما يلزمهاش ? تي علاش ياخي لها الدلرجة الروح خسيسة ماتسواش كان جينا في غزة رانا ندبنا عالعزة و توة نقولو كريز و لا كزة و الا حصلة كلبة ما حسبتوهاش ?

ما نعرفكمش اما خايفة عليكم و كيفما ما عمري حبيت حبيتكم في قلبي خبيتكم – قلبي عمرو ما كان فيه لا حرس و لا عساس-  و في عينيا وجه وجه خليتكم ...

ثرنتكم بلحق ولاد جبال ما تحبوا الحفر و تمدوا العمر بش الكلب الي تخبى يعيش حر ... ما نعرفكمش اما هزيتوني و حطيتوني و ركزتوني  بلبلتوني زعزعتوني بكيتوني نطقتوني حيرتوني و حتى كي دموعي من لوعي سالت نجمتوا و ضحكتوني .....