الزبلة و وين القبلة?

ضحكة صفراوية اما بعد

جاتني ليوم, الرغبة موش حاجة أخرى, مونستها رعشة غضب رهيبة باش نكتب هالكليمتين الماسطين كيفما مولاتهم (نستبق في التعاليق متع الي يحبوني يا أخي أنا دوني هعععع )على التونسي و الزبلة !

من غير ما تبداو تتكومكو على خاطر سي بوبال راهو مخترع دخل اسمو في التاريخ و بصراحة تكون بوبال خير من تكون الزكالبارغ هععع واحد  ساهم في جمع الخرم و لا خر ساهم في تفشيه و كان جاء فايسبوك  بالريحة راهو ما عد يحلوا و الا يستعملوا حد.... وزيد تحليل محتويات الزبلة البره في بلاد الافرنج راهو تحول الى علم: الببولوجيا

ايه سيدي: سي بوبال نهار مستركش, جاتوا!!  اما هو الفكرة, انو يصنع هاكالسطل الكبير إلي من المفروض انو البشرية جمعاء مالهند للسند اتفقوا على استعمالوا : جمع الفضلات !

أما في بلاد العجائب و المعجزات حيث الجرابع تضل و تبات لم يكن الأمر كذلك و رفض التونسيون بدعم من حلفائهم من محبي الروايح الجيفة و حطوا الفيتو بش ما يقربوش من هالاختراع الرهيب!!

نتائج هالقرار حددت و بصفة مباشرة مصير شوارعنا و ولينا  أول بلاد – أش بينا الله الله أش بينا خمسة و خميس علينا- نمثلوا شعار" يلي خامج مالبرة مانتنك من داخل "

الصباح و انا خارجة زاهيتلي في النوار, عرضتني الزبلة شادة راس النهج. عرفت روحي بش ناكلها و بش يتبعبر صباحي. لا مجال لقيت روحي كطارق ابن زياد نوخر بش نوصل امخر "مستحيل اليوم بالذات" و الزبلة امامي.... جربوعة محاصرة...  "امامي الزبلة و الروايح يرتعون"  تشجعت, تقدمت و انقضت عليا الريحة: تاكل من هنا, مقص من غادي, النوار الي في مخي ذبل و بدات الكلبة بنت الكلب تطلع.... بونية عالخشم و تسربت الوجيعة في مصارني حسيت نفسي على وشك الغثيان... لين فقت الي الزبلة خليتها ورايا على بعد خمسين ميترو و بديت نسب و نلعن فيها على بعضها و ما نقلكمش وين وصلت بالسبان خير شيء يرعب !!!!

و قعدت انخمم بلحق!!!! سعود ناس تخمم في البيرمود و ناس تخمم في زبلة الجار يا والله عار !!

 قلت ياخي توه انا نحب عالفن الحر و التعبير المتحرر و تنوير العقل اييييه اين نحن من كل هذا ? اذا شعب ما فهمش كيف يستعمل البوبال يراه مزبل كيفاش تحبوا يستعمل مخو و لا قلبو و لا كلوتو كان لزم ???!!! ايه الكلوة مهمة لانها تصفي الدم و يوصلك هذا  للتبول بارتو سي دايور  العطر الرسمي لشوارع العاصمة !!!

تحليل بسيكو-بوبالوشي يفرض نفسوا هالمناظر الي تتسلوس في الليالي بش تفرت علينا خمجها و تورينا اش عندها في مصارنها بصراحة راهي عندها ميحاض تنجم تخرا فيه هذا اولا

ثانيا ان دلت حالة الشوارع على حاجة راهو عالدود الي يتبلعص فيكم و الي دايور نجح انو يقضي في اي جربوعستاني اصيل الغرام الوحيد من احساسو الغريزي بالجمالية متحولا بذلك الى جيفة عاملة الريحة تعشق الفضلات و وين يجي تبول و عاملة مالبلاد توالات

كل يوم نخرج زاهية نلقى روحي بعد خمسة دقايق بالضبط لاهية في موضوع منتن يبعث كياني للحضيض و  البوكل تبوكلات هل من خرية اخرى ?