samedi 26 février 2011

غاز .... !!!

غاز .... هيا نخروجوا .... غاز .. كوكا ... حليب ... ماء ... برشا اصوات و نفس الداء ... عميتونا يعطيكم عمى و سخطة مالسماء !!!  غاز اجري !!! علاش لا عندي ما نبيع و لا عندي ما نشري !!؟؟؟  نحبّ نحكي نشكي نبكي نفهم نبهم !!! سيبونا خنقتونا !! ما كملّناش م تفهمناش !!! لموت غدوة ارضيّة ولاّ كيفاش ؟؟؟ غاز .... بوليس... موش بوليس .. زلاّط ... عياط ...شكون يحمي .. شكون يحبي؟؟؟ شكون يحبّ ؟؟ شكون نحبّ ؟؟ شكون ندبّ ؟؟؟ و آش بينا قد ما عطينا باقي ما فهمناش ؟؟؟ علاش يا تونس كيف انا نحبّك ما نسواش ؟؟ فسّرلي بحيوطك بعنكبوتك!!!!!!!!! فسّرلي !! انت المدينة الحزينة الڨزينة !! فسّرلي انت خاطر كلامهم مخلّط مجلّط في قلبي ما يسواش !!!! لا يا تونس فسرٌلي موش عبّرلي : التصاور ريتها امّا ما شفتهاش !!! احكيلي انت بحجرك مع فجرك مع ظلامك ما يهمّناش!!! شكون  ضربك ؟؟؟ شكون حرسك ؟؟؟ شكون باعك واطي ما يسواش ؟؟؟ قلّي احكيلي !! كان نحكيلك يمكن ليلتنا ما توفاش !!!!!!!!!!!!!!!!!!!  انا عندي قلب و جواجي خوذهم كان ماتحبّش تلاجي !! حلمت بكوبا وقت تشي غيفارا و تحت بن علي و هاك ليوم تحت انزاد النبي !!! و  هاك بعد عايلة البراكاج تتساوم مع الفيراج يا آندرا انا فشلت و الاّ انت طحت مع اوٌل باراج ؟؟  انا عندي ليك وصيّة غالية و بالدمّ من  دمّ الفاضل ساسي مبنيّة: نحافظ عليك و انت نقّص الدّموع من عينيّا !!!

jeudi 24 février 2011

يمكن انا ...

انا النّجوم و انا الغيوم
انا الريح و الهوى المغروم
بيك، بحركة يديك

انا الزنقة كنت الخنقة
و ليك اليوم الساحات
و في صحرتك انا مليون الواحات
و على حيوطك الشاّيطة آلاف اللّوحات

انا النجوم و الكون فيّا تولد
و فيّا الجزر و فيّا المدّ
و ماعليك كان تعدّ
و اذا تعبت على شوافر عينيّا تمدّ

انا النوم و بيّاع التراب المشوم
ترقد ونحلالك ما تقوم
انا الحلمة الّي تتولد في الظلمة

انا كعبة البيرة الّي تسري في عروقك
كالجيش وقت الڨيرة
ديراكت لراسك من جواجيك
و كان ثقلة الحكايا ايجا نخبّيك

انا اي انا نوّار الدفلة و حرّيقة
كي نمسّك تشعل فيك حريقة
تتلهب و تتشوى
و تحبّ شفايفي على جلدك دواء

انا الشارع الممدود
لّي واقف عالحدود
يستنى في قدّك المقدود

انا القهاوي الّي تكبر فيها الشهاوي
انا طواولها الّي شهدت عل حكايات اليدين
انا المادّة الّي حسّت الرعشة في الساقين

انا الماء و انا البحر
كان تغوص تنتحر
و كان عالحرف تاقف : الموت تنتصر
انا الّي فيّا تسري و انا في عروقك نجري

انا نكتبلك و ما ناوية نسلبلك  
لا وجيعتك لا النجوم من عينيك
كلامي قافلة شكر منّي ليك
و كلامي اعتصامي في الحلمة الّي تبنات بيك
شعري احزابي

احزابك احزاني
و بياناتك تتباين مع نثري الصاين
الّي يعاين لا الّي عينو فيك الّي شاهيك

mardi 22 février 2011

عييت ..

عييت .. بلحق عييت ... كلّيت، ملّيت و غليلي مالطاغية العربي ما شفيت ... يدوس فينا كالماكينة لاهامو اهلنا لاهامو آش قاسينا !! عييت و بجرايمو تبليت ... كلالي مخّي، نهشلي نومي و لياليّا، ضحّكني عليه وليوم نضحك على استخفافي بحماقتو الوحشيّة ... راني عييت : ريت العجايب وهو زايد ما تايب ... الّي عفّس و الي رفّس و الّب البدنّات غفّص و الجهامة هايمة مبهّمة ما قادرة تتنفّس ... عييت مالحاكم و الحكّام الّي كرطشوا عالحمام و يتشدّقوا بالامن و السّلام ... عييت و تهرّيت و من كلّ الانظمة تبرّيت : الكلّها بايعتنا و مكبّلة همّتنا و  كي تمرّدنا باعتنا عالدولار، عالآثار، على قواعد الاستخبار و نحنا داء العار !! عييت من خطابات التهديد و الوعيد و عييت مالخوف عاشعب الّي حقّو يريد !!! عييت و تعبت و دمعة ما سكبت و نكتة من بحر الغلّ ما كتبت !!!
عييت مالغنّوشي الاوّل الّي حكم و سكت و شارك و ليوم عالثورة بارك و الثاني الّي حرق و هرب و كي شعلت لنار في جلد البوعزيزي هبّ!! عييت ماللّجان و تقصّي الحقائق و الرشوة و الفساد و نحنا نتبّعوا ضاربنا الكساد : لا حزب و لا جبهة تمثلّنا ما فمّة كان تحالفات تعطّلنا !!! عييت مالجثث المتهاطلة و المخاخ العاطلة عن العمل، عن الامل !!! عييت مالدمومات ڨلت في الشوارع، و القنّاص البارع !!! عييت مالسياسة و من غياب الاخلاق فيها و عييت من كلمة انا على كلّ فمّ آش بش ينحّيها ؟؟؟؟ عييت مالمقالات في الجرايد و عييت من غياب الغناء و القصايد !!!! عييت مالراب و من تخونيجو و مالعباد كي يسمعوه كيفاش يهيجو !! عييت مالإعلام الّي نكّس الأحلام و متمادي في سياسة التبهيم ماشي في بالو مازال الشعب زكيم !!
عييت مالمفاهيم الجامدة الّي تبرّد القوايم و الّي تبرّك العزايم !! عييت مالخطابات الخشبيّة الّي تستنزف في الذات البشريّة قتلة فيها ايّ ابداعيّة !! عييت من بعض الاصوات الّي تجري و تلهط من ميكرو لميكرو، توصل للمحطّة و يفوتها الشعب كالمترو !!! عييت و ملّيت مالحملات الأناـ تخابية و نحنا مازالنا ما بديناش الثنيّة و غيرنا يحسب فينا في الصناديق الاقتراعية !!!! عييت، كلّيت، ملّيت اما من حبّ الحرية لا ني بش نشفى ولا شفيت !!!!



عييت مالخلط في المفاهيم : المسلم موش اسلامي و المسلم موش ارهابي و غيرهم لاهو طحّان لاهو كافر !! الشيخ موش بشيبو عاقل و موش بالضرورة خاطر ما قالش عقال امّا اكيد يحضّر في معتقل جديد للعقل و للّي عليه ناوي يحيد !!! يحضّر و هو ينظّر لديكتاتورية في شكل جديد : كلام منزّل مالسماء كيف يحكم في  الارض يولّي قفص حديد !! وعييت مالاطراف الّي من غادي تزايد وتزيد و تخوّن و تثوّر كيف العادة في النداوات من بعيد لبعيد !!! عييت من بدني خاطرو يتعب و عييت من تعبي نحبّو يبعد؛ عيت نحبّ الشعب بعد الهمّ شايخ و سعيد و نحبّ القصبة تولّي مطرح عيد للثوّار ، للاحرار !!!
علاش يسيل الدمّ بش يطير الهمّ ؟؟؟

vendredi 18 février 2011

عبد اللّه ڨشّ ـــ تونس ـــ ليوم ـــ كواليس الثورة او بدايتها !!!!

                                                        "آية، فاطمة، سنية، منية، غفران، رحمة، الكلّكم حضّروا رواحكم الجماعة جايين !!! " ...

 هبطوا البنات، كحّلوا، صوّكوا، زيّنوا، تعطّروا و ريحة مسك خارجة من جواجيهم جيعانة، عطشانة، ماذابيها تلصق على جلدة راجل جاي هالمرّة ياقف قدّام عراهم موش بش في درج يهواهم و كيف يخرج مالباب ينساهم !!! 
جلدة راجل جاي بش يمنّعهم، بش ياقف حاجز موش بش يجتاح و يحسسّهم بريح الثورة و ينسّيهم همّ العورة !! ياقف كالسدّ من غير ما على فرشهم يتمدّ، يوقّف زحف الهمجييّن الّي يعتبروا رواحهم "خلفاء راشدين" و منين جاهم الرشد منين ؟؟؟ وقتلّي الصبيّة فيهم قبل ما تبلغ سنّ الرشد لقات روحها لحمة بين السنّين و تتعلّم تعيّط و تنين بش تخلص و يروّحوا الاسياد متهنّين ؟؟؟ 
و عيّطوا البنات و الانهجة باصواتهم تملات و السمّاء رعشت من هالصياحات و خرجت رحمة مالشبّاك عريانة قلم، مادّة بدنها الّي تاكل و تذمّ هازتّو كالبندرول : شعارها ضحكتها !! شطر صدرها عريان!! و حمّيرها تقول رمّان و هي تتمسخر على ريح "التحرير" الضّرير !!!  هي خرجت و طلّت و العينين كالصحفة تحلّت و الّي لعن و الّي سبّ و ياما ياما هاك التفّاحتين اشتهى !! فكّرتهم يا هول مصيبتهم الّي الانسان جسد، و الجسد رغبة و لذّة و الشيخة هي مالحياة و علاش الحياء ؟؟  و هاج العياط " داعرة، فاحشة، عاهرة ، حسبنا ... " و ضحكت رحمة و عيّطت " اي قحبة و موش كان انا!! الدنيا في قحبها زادة فنّانة !!! و شكون الّي ما باعش ؟؟؟ انا بعت بدني و قلبي ليّا و مخّي فوقي مانيش بالجنّة مبليّة !! كليتوا منّي بش نوكّل!! و اليوم تحبّوني نتوكّل بش تحرقوني و بوجيعتي يتنكّل !!!! "
و هبطت رحمة و طلّت نور، قديمة في الدومان مستانسة بالضرب و الدزّان، عينيها شاعلة و الغّل لابسها ؛ عمرهم ما حسبوها وياما رجال حبسوها و بالسّيف شدّوها ابدى من بوها و كيف شكات خواتها و امّها طيّشوها في الشوارع كانت صغيرة و ما عرفتش تفارع و كيف ضحكلها راجل تحت السرد ماهو هزّها لزنقة هي عالسيمان و هو عليها تمدّ !! و ليوم جايين هالغربان يحبّوا يعملوا منها فدية و قربان و بزقت عليهم و جاها الردّان و هبطت !!!! 
شعّلت رحمة سيڨارو كريستال ، ستانست بيه و ستانس بيها ياما شعللّها شويّة ضوّ في لياليها و يا ما طفّى حرقة في جواجيها !!! و غزرت لساقيها و حلّتهم و وشوشت لجواجيها : " شبيهم قحاب زرقون ؟؟ كالسحاب يتعدّاو لاعندهم حبيب لا عندهم شكون !! عندهم بدن هازّينو موش هاززهم ! الرجال عاملينوا حمّام فيه ينظّفوا شكون حاسبهم ؟؟ شبيها القحبة؟؟؟؟ ماذابيها راهي مديرة و قادرة و بقدرها كبيرة!!امّا الدنيا نيّاكة عطاتكم و خلاّتني هكّاكة!!!! شبيها هي موش و انا شلاكة ؟؟؟ شبي عمروا ما سمعني حدّ و كلامهم ليّا و لاّ عليّا كيف الرعد!!؟؟ طحّانة ماشي في بالهم فرحانة بخلايق وجوه اللّوح، يابسين عاكشين مافيهم حتّى روح !!!!"
"البنات وينكم ؟؟؟ غدوة الكلّكم لهنا ، يا نحنا يا هوما !!! "
عبد اللّه ڨشّ ـــ تونس ـــ ليوم ـــ كواليس الثورة او بدايتها !!!!

mercredi 16 février 2011

au gré du temps ....


Cotonneux ce ciel gris et lourd qui pèse sur ma vie comme un souci en éternel retour et ce soleil cramoisi qui se dissipe au vent, me laisse  figée comme un vieux pendule dans un salon ! Et cette terre meurtrie qui de  ses racines m’obsèdent, faisant de  mes nuits une errance d’ascète !!  et ces présences silencieuses violeuses et castratrices s’acharnent à creuser mes cicatrices !!
Et ces étoiles qui vrombissent  au premier coup de tonnerre, ont-elles appris les hymnes des pierres qui illuminent et les rêves et les chimères !!!
Absurde cette soi-disant  communion, soudaine puis vilaine annonceuse de prochaines distorsions sur les branches dont les fruits pourris iront s’accrocher et dont les fleurs seront des roses prêtes à décorer le marbre froid recouvrant  les corps que la vie a délaissés !!!
Boueuse cette chanson crapuleuse qui se voudrait panseuse des blessures infligées et qui ne sait au bout du compte que les plaies ré- ensanglanter !!! Scabreuse chanson qui mord le bide et vous ouvre le front ! Quelques sutures !!!!!!!!!!!!
Congestionnés sont les discours enflammés !! Le sang n’y circule plus et les écharpes de bois en reflux, l’auditoire en est couvert et le politicien prolifère une satisfaction  adultère !!! Les maux circulent dans la cité et le docte dans sa tour installé, continue à théoriser ! Sophisme quasi chiite, une sorte de transe verbale placide  qui fait du peuple une étendue aride, une sorte de laboratoire-dépotoir où certains s’amusent à jeter tous les déchets des échecs historiques avérés !!!

mardi 15 février 2011

تاريخ بلادي

تاريخ بلادي تَكْتِبْ في الكتُبْ و تباع في النّصُبْ ! تاريخ بلادي تحرّف و تزوّر و حتّى كيف تصوّر تكدّست عليه الغبرة في ارشيف الوزارات !!! و تسرقت منّو النضالات و الإعتبارات !!  و ولّى كمية في البارات !!! وكانت  مع البيرة تحيا و تموت الڨيرة !! و تطير البلاد مع الاكسبراس كيف كلّ ثملة في قهاوي على الكيّاس!
تاريخ بلادي كان مدفون، صوتو كان مغبون، لا عندو جواجي لا عندو عيون !!! هالتاريخ كان مهمّش، كان على روحو مكمّش !! كان هشّ كيف القشّ !! لا يشدّ لا في الخاطر، لا في البال !! تاريخ بلادي كان لابس كاميزول و بايع ذمّتو لأصحاب البترول و خلاّهم يشريوا التراب و خلاّنا أغراب، ضايعين، مضيّعين، على أصلنا صايعين !!!
تاريخ بلادي كان يتوثّق في لجان طحينها يتدفّق !!! وثايقو تحرقت و احرارو منّو تبزقت و الّي منهم كيف حشّاد تقتل مازال يتشقلب في القبر !!! و لتوّة لا نعرفو لا الّي عذّب لا الّي قتل !!!
تاريخ بلادي كان دروس عالكتب و موش في الروس !! كان كلام يتنسى و قتلّي آلاف عليه قلبهم حفى !! تاريخ بلادي كان في قطيعة و كان زاده حملة شنيعة متع استخفاف لمناضلين ماتوا و زدنا قتلناهم كي عملنا منهم أطياف !!!
تاريخ هالشعب ليوم تغيّر !! و بالدمّ تصاغ و تحيّر !! كتبتوا النار في جلد الثوّار و اصوات المواطنين الأحرار  !! و كتبتوا الأمّ إلّي دفنت كبدتها و الّي عايشة مع دمعتها !! كتبتوا الشوارع الّي تخنقت بالڨاز و الكرطوش الّي نقبلها جنابها و طيّح عبادها !!!
تاريخ ليوم ماهو موزون، من كثرة الكلام مهموم لا عارف يفرز بين الّي حبّوا و تكبّوا و بين الّي غدوة ناوي يخون!! تاريخ بلادي في الحوم الاكواخ و الكوم و حتّى زادة في الدهاليز و الأحباس !!!! موش حصّة تلفزيّة و خطابات هابطة عالروس كي الفاس !!! تاريخ بلادي يحبّ نفس و يحبّ سكات بعد الحسّ !! التجلطيم و التجوليغ ماهو قادر عالتبليغ و لا قادر حبّنا يصيغ !!! تاريخ بلادنا موسيقى و فنّ و أشعار موش تنديد و محاسبات و استنكار !! تاريخنا : تاريخ احرار و ثوّار موش نقمة و ثار !! تاريخنا اصوات عذبة، تعذّبت موش اصوات داعرة صدّقت و زكّات و قدّام قهرتنا طبّست و إتكّات !!! تاريخنا يلاجي؛ موش عارف منين يبدى بش يتكتب و غدوة كان دارت الأرياح ما يِتْنكب و على خلايقنا يتكبّ؛ يكسّرها، يشوهّها، يفسدّها، يزرّقها و بالندم و الوجيعة يحرقها !!! تاريخ بلادي ليوم فينا ينادي و يعيّط و يقول يا أولادي !!!!!
الّي باسمكم يتكلّم و الّي فيّا ليوم يلوّن ما تخافوش غدوة يخوّن ؟؟ الّي فيّا ليوم يصوّر ما تخافوش غدوة يدنّسكم بش وجه واحد يتنوّر ؟؟ الّي اليوم باسم الشعب يحكي و الشعب ما حكالوش، ما تخافوش غدوة يفسخّكم، في حباري ينفخّكم و يكمّل زاهي ما على بالوش ؟؟؟
و سكت التاريخ و الذاكرة تصيح امّا شكون بش يسمعها و سط هالنّبيح ؟؟؟؟؟

lundi 14 février 2011

عيدك حبّ

عيدك حبّ، عيدك ثورة، عيدك تكبير موش تقزيم لعورة !! عيدك كرامة و بعيد عالدعارة الفكريّة، الثقافـوسياسية!! عيدك نوّار و قلوب ثُوَّارْ!! عيدك اسرار موش مسابقة عالأخبار !! عيدك فنّ و أشعار لا شعارات واهية قابلة بعد المرحلة للإندثار !! عيدك ورد و زڨوڨو !! و بوس و شماتة في الزّنوس: المتلحيّة، إلي على شيختك متنحيّة !!!!
 كلّ عام و إنت للّة عاملة في قلوب الجهّال ألف علّة !! و إنت محمّرة، مصوّكة  و في حلوق الكلاب مشوّكة !! مدڨدڨة خطابهم و بقباحتك بمرصادهم !!! كلّ عام و انت الحُبّ في الشوارع، في السماء و البحورات و الغيِبْ! 
كلّ يوم و انت مكرّمة و ماكش مسلّمة و أعدائك مترّمة !!
 كلّ عام و انت عادلة و على الغلبة فاعلة و قادرة !!!       
 كلّ عام و انت متمسّكة و لياليك نقاشات شباب وشابات متلهّفين لسهرة متع عشّاق تحت الياسمين !!!              
 كلّ عام و انت لينا و خيرك مالينا و ماهو ناسينا!!!

samedi 12 février 2011

كي تسكّر عينيها

 نحبّك بش نمدّك ... "نحبّك!!" كلمة خاطر ما نڨدّك !!! مخّك واسع و عريان و انا راجل نحبّ الامان !!! بدنك شاعل و مزيان و نحبّ البدن المتزيرف و العطشان مهما نعطيه يحسّ روحو مكسي و شبعان ... نحبّك تكنيك ... نحبّك تتناك... نحبّك ستراتيجيك... نحبّك ستراتاج ... الحبّ قبل و لاّ بعد الثورة بياج و ممكن بعدها اقرب للزناء مالستراتاج !!!
 كيف تتمدّ المرا : الراجل يحسّ روحو قدر و قرى ... ما يعرفش ... ما علّموهش!!! الّي المرا كيف تتمدّ تسرح و ما ما تقدرش تمدح !!! ... ما علّموهش الي بدنها خريطة و ما هياش قادرة على أي تفريطة في أيّ ركن مالأركان بش يتمكّن سيادتو مالإستيطان ... 
     و كيف اللّة تاقف، سيادتو ما ياقف، يحسّ روحو خافق و موش  قادر عالنجاح ، علّموه ملّي صغير الإجتياح !!! و قرّاوه موش عالحبّ اما عالنكاح !!! ومن غادي كثر الضرب و الصياح و من وقتها لا من فينا عارف يرتاح !!!
نحبّك بش نهدّك موش لأحلامك وردة مفتّحة نمدّك !!! و هالفكرة لا يلزمهالا اصلاحيين و لا ثوّار !! هّالفكرة يلزمها رجال احرار !! و الحريّة لاهي انقلاب و لاهي مرجعية: هي فكرة تولدت معانا و فيك و فيّا ؛ فماّ اليّ تنكرّلها و فمّا الّي كبّلها و فمّا الي كالبيان سرّبها امّا جلّنا نسى يعبّرها، يعبرّلها !!!!
 نسى يقوللها يا للّة وقتلي تبات تحلم و تستنّى!!
نسى يقوللها يا عمري و قتلي الأيّام تحتو تسري !!
نسى يقوللها مزيانة و قتلّي الأيّام خوّانة !!
نسى يقول وقتلي بان سكاتو يخون و كيف تكّلم ما صان و كيف سكت خان !!!
المرا يا سيدي كيفك بالظبط جيعانة وِهْمُوكْ الّي هي شبعانة و ماورّاوك إلّي هي في صحرتك عطشانة!!!  وزعمة دوري أنا ؟؟ إنّي نصوّر؟؟ إنّي نحوّر؟؟ إنّي ما نخوّن: وقتلّي كيف اللّة تتمدّ الشمس تتحوّل و اللّيل يصير نهار و الّي في النهار عار و كان جاء الليل يصبح دمار؟؟؟  
و السؤال يتسأل : علاش حبّ الراجل للمرا كيف تشيب و تعمل كرش يولّي سُلّْ ؟؟ هو بالعهد يخلّ و هي تتسَلّ ؟؟؟ هو يتجاوز و هي كلّ جوازات السفر ممنوعة و عايشة مقموعة !!!! هو يحتلّ و هي بكرهو و نقمتها على روحها تِعْتَلّْ !! تولّي كالكسرة بعد حرف جرّ لا قادرة تتفتح و لا قادرة تتضمّ !!  و كان عملتهم تولّي غلطة و تولّي هي سبب الجلطة، وقتّلّي اللّة كيف تتمدّ ما كانت  تحلم بحدّ: كانت تسكّر عينيها و تتفكّر لياليها و قتلّي كانت تحلم بيه و تسأل روحها : ليوم آش بقى بيني و بيه ؟؟؟؟

jeudi 10 février 2011

ما ترحل يا ريّس !!!

الى الريّس و ان كان كلامي موش كويّس و ما يحلاش! حترحل يا ريّس يوم، يومين شهيد، الفين ما يهمنّاش !! حترحل بعيد و يعيش الشعب سعيد ! حترحل يا ريّس و ان كان غرامك كَرَاسي و كلامك وجَعْ لراسي !! يا ريّس دا كان خبر رحيلك الف عيد و خطابك يدلّ انّك عنيد بس الشعب اعند و حيققّ حلمو بدمّو اكيد ! ماترحل يا ريّس و تخلّي الصبايا تولّع غنايا و زغاريد ! كفاية يا ريّس !!
حترحل يا ريّس و تتحاكم أكيد !! دا أنت مجرم و خاين و عامل فيها لآخر لحظة عبيط !! حترحل و نغنّي و نشيد الأغاني !!! و تبكي لوحدك في زنزانة و تبقى كلابك بعدك جيعانة !!! اصحى يا ريّس شعبك فاق و ملّ كذب و اماني و نفاق !! شعبك حُرّ و لو ذوّقتوا الف مُرّْ!! 
 يا ريّس كفاية دمانا و خناق و دموع !! ما دموعنا صارت في الاسكندرية ملايين الشموع !! و ضاقت بينا البَلَدْ تحت حكمك و  اعتصمنا من ظلم ملكك !!! ما ترحل يا ريّس !!!

شبيكم ؟؟


شبيكم ؟؟ آش صار عليكم ؟؟ ثورتنا مزيانة شبيكم خّرجتوها في هالزمان عريانة ؟؟؟ شبيكم ؟؟ آش صادكم ؟؟؟ كان العشق بمرصادكم ؟؟؟ شبيكم دوّرتوها عرك حِوِمْ؟؟؟؟ و قتلّي كانت حرب كرامة و قيم !!! تي علاش هالتركة ما صنتوهاش و خلّيتوها كلام و ريق أحناش ؟؟؟ تي شبيكم ؟؟؟ آش صار عليكم ؟؟؟ الثورة حلمة قريب تردّوهآ كابوس كيفو ما ثمّاش؟؟؟؟ يا خي تبيعو في الوهم للشعوب بش تخلّيوهم للعيوب الّي نرى فيها و ما نجمّتهاش؟؟؟ تي شبيه الصّحافي محامي ؟؟؟ و الحاكم ولّى قاضي و القاضي يحبّ وزير و الوزير ما عينّاه ؟؟ آش بيكم تصدّرتو و الأهل ما شاورتو ؟؟؟ و العروسة في بالها و لاّ ما فو بالهاش ؟؟؟ آش بيكم ؟؟؟ آش تحبّوا : تزيدوا تكبّوا دمنا الّي سكبناه تي علاه ؟؟ مازّاكمش ؟؟ ما كفاكمش الوجيعة الّي عششّت فينا و ما خطاتناش ؟؟؟ علاش تحبّوا اصواتنا تولّي حدث و قتلّي الجرح ما جفّ؟؟؟
منين جيتوا ؟؟  منين خروجتوا ؟؟ و شوارعنا وجوهكم ما تعرفهاش ؟؟؟ ولّيتوا ثورييّن بعد ما كنتو مشّريين بزوز فرنك يا خمّاج !! ولّيتوا متحزّمين وقتلّي صفقّتوا ل"بكل حزم!!" و قهرتنا ما حسبتوهاش !!!
شبيكم ؟؟ آش تحبّوا ؟؟ قحبكم هزّوا بعيد علينا و الطحين ما يعنيناش !!! وجووه معروفة تحت الغاصب عورتها مكشوفة و لاّت اليوم تحكي : "ما نِمِّنْ كان ما نشُوفَا !!!""  و العصا كي كانت تخبط، تحت الّي ناشدتولو، ريتوها و لاّ ماريتوهاش!! البوعزيزي مات و دموع امُّو ما صحات و الذيب رجع يعوي و الكلب لا هرب و لا فات ... لا سلمنا منكم مسالمين و لا سلمنا منكم ثوّار و لا سلمنا منكم طايحين و لا سلمنا منكم احرار و باقي متمادين في نهب المعنى و نضال الشعب الجبّار و كي غلبكم اليوم بطريقة اخرى تحبّوا تهبطوه غبار!!!! 
آش بيكم ؟؟ ما بيكم شي !! انتوما المكينة و السكّينة و اصل الكيّ !! انتوما الّي زكّيتوا و ما فكّيتوا تناشدوا و ليوم توصّلوا في الثورة لكلّ دار !!! انتوما السيستام، انتوما اكبر بلاسفام للحريّة و حقوق الانسان !! فاعلين، قادرين تشعّلوا حرب اهليّة بش مالكم يطمان !!
اعلام مخابراتي تقول ولد السرياطي و مستشارين شرسين كانوا ماكلين و توّة يحبوّا الشعب حنين !!  حنّبعل بالأساس حاسّتها تهدّ في الساس و لعلّ خايفة مالاحباس !!؟؟؟ صوت الشعب الّي يحبّ اللعب و حتّى الثورة تتعفّس و تدناس اذا الباعث ما تشفّاش !! آش بينا فيسع نسينا الّي الشارع ملكنا و لينا في صورة الوضع ما حلالناش ؟؟ آش بينا سكتنا و تلهينا بالقشّ و التفشّ وقتلي دمّ الشهيد تحت التراب ما نشفّ!!!!!!! 

Un instant ...


Un instant
Accorde-moi un instant
Tu sais la vie
Ce n’est que des moments
Accorde-moi cet intervalle
Je cesserai ma bataille navale
Et j’accosterai sur tes côtes
Un instant
Accorde-moi le temps
A cœur
Ou à contre raison
Un instant
Que j’éternise ta voix
Tes faux serments
Que je me glisse
Contre ton corps
Patiemment
Un instant
La distance est supplice
Et le manque est crevaison
Tes traces virtuelles
S’immiscent dans ma peau
Un ultime tourment
Un instant
Reste encore sur ma page
Un instant
Que je chante
Que je danse
De t’avoir un instant
Délimite les territoires
Que tu habites un instant
Tout le monde t’imite
Ça en devient consternant
Je cherche en toi une fuite le temps d’un instant
Mais l’instant passe vite
Je m’en vais le reste du temps
Un instant
Viens donc un instant
Et prends en moi le ton
De tes futures aventures
De tes potentiels égarements
Un appel à venir
Une envie d’abandon
Un instant
Chavire
Mais  ne peut  un beau renversement

mercredi 9 février 2011

le Vin ...

le vin me boit car en moi il trouve un ultime refuge, je l'exprime dans un langage cristallisé qui vacille sur un océan de poésie qui lui même déverse dans le grand lac de l'Humain ....le vin me boit, le vin me noie, le vin me fuit des fois!!! le vin s'étouffe avec mon verbe acerbe, aigre-doux, tendu-mou !!! le vin se déverse en moi, et je suis sa coupe de cristal car le sens est sens, plusieurs, sans aucune guerre navale !!
et puis quoi !!! je suis le  vin j'enivre les lèvres qui m'effleurent et je monte à la tête douce comme une chaleur  !!! et puis pourquoi pas ?? je suis cette alcool éphémère qui fait que le rêve inconscient se libère et prospère !!! je suis le vin, fruit de la terre pressée sous les pieds des  chimères, conservé dans un tonneau d'os et de chair !!! je suis le Vin, le sang d'un fruit  qui perd son écrin pour faire du bien !
et toutes les opiums me consomment car jamais je ne somme aux plaisirs de se taire !! l'euphorie ainsi que la jouissance, prennent en moi naissance  car je suis sans prestance face à la chaleur du désir qui avance dans les recoins de mon corps assoiffé, d'amour, de vie et de Liberté!!
le vin m'appelle quand la raison m'interpelle, il m'exhorte à désinhiber les fins fonds de mon être qui chancelle sous le poids d'une Histoire-Machiavel !!! le vin me percute, si par erreur, j'exécute les ordres de la foi !! plusieurs ordres à la fois !!  
le vin me boit, il s'enivre de moi!! mes veines coulent en lui pour mieux le disperser tels des slogans de vie dans des rues assiégées !! et il se mêle à mon sang pour s'accoupler et donner naissance à une légère gaité !!!
je suis le vin qui danse dans les corps et qui souvent panse en silence les têtes comme les cœurs !! je suis le vin qui s'échoue au seuil de l'absence et qui rend fugace toute présence !! et qui s'acharne à dévoiler quand la mode est au voile et qui libère les beautés des regards prédateurs lancés en rafales !!  
et  Je suis le Vin quand ce dernier dans son élan m'emporte et quand étouffée , il m'a ouvert des portes de rêves, de plume et de passion ... je Suis le vin et je le suivrai et peu importe où la vie me mène, enivrement je serai, avec les maux de tête et les gueules de bois, peut-il y avoir feu sans qu'il y ait bois ??? je suis le vin et le vin pour exister a besoin que je le bois, que je le transpose sur du papier des vers , ou sur ta peau des baisers de lumière, et que je m'amuse à gueuler :
" je suis Saoule et j'ai envie de danser, sur les tombes, sur les bombes et sur tous les pavés, j'ai envie de mourir à force d'aimer et quel est l'amour qui ne sait s'enivrer ??? je suis la jouissance d'une liqueur enchanteresse qui transforme les pires détresses en muses qui tressent les mots aux maux et aux soirs en papiers , fragiles aux ratures hystériques et obstinées et sensibles  aux marges où le sens se laisse échapper !!!!!! "



mardi 8 février 2011

il y a des jours ...

il y a des voies sans lumières
ils imposent le "que faire"?
il y a des routes- barrières
qui explosent du laisser-faire

il y a des jours où tout prospère

mais y en a d'autres où on galère
cependant, impossible de satisfaire
les magies des espoirs et le désespoir de la misère
alors il y a des jours à faire

il y a des jours parfois des tours

la vie est un jeu de poker
on peut tout miser sans un retour
on peut tout gagner sans calembours

il y a des jours où tout est clair

où tout se dissipe dans un doux air
quand tout est fade, que se dessine la dégringolade
reste à partir vers l'ultime escapade
faire ses valises sous cette douce brise
rejoindre des villes grises, où nos corps sous les ponts gisent

il y a des jours où on doit oublier

le plus tendre souvenir, falsifier c'est ce qui reste aux massacrés!
la mémoire pourrait être une hécatombe
une odeur emportée fera qu'on tombe

il y a des jours où on nous pousse à nous exiler

en grande force rarement par nécessité
atteints vieux et jeunes de la maladie de la cessité
  cœuraveugle, esprit conditionné
il y a des jours où on doit s'oublier
arracher les racines et nous calciner nous les machines

rebrûler Rome et Carthagène sans aucune gêne

refaire l'Histoire sans les faux slogans de la solidarité
brûler les vieux livres de prière qui détériorent la vie sur terre
inviter le vieux Darwich le camarde à déclamer notre nouveau hymne de la liberté

remettre à plat les manuels où le pays est une ritournelle

de salauds et de salopes affamés du sang des tourterelles
massacrer l'hymne national qu'on oublie dès qu'on se refait le mental
parce qu'on ne s'est jamais appropriés les pierres des terres des oliviers

il y a des jours où on devient une injure

alors on doit se raturer
où juste se gommer pour pouvoir comme des godasses usées roupiller
dans les coins sombres et la poussière
couverts de boue, ouvrant la gueule comme le corps qui pestifère
il y a des jours où l'enfer est nous et la terre

نحبّك !!

نحبّك !! تقول كسكروت كفتاجي في جريدة كلمة كيف العزى لبعيدة !!! نحبّك، بالسّيف نشدّك : عرّي، البس، ارخف، اكبس، انا نخممّ و انت نفّس !!! في بالنا الخرمة وفات و يمكن توّة بدات : عاليسار و عاليمين كلّو يلزّ للطحين !! نحبّك ؛ سكّر فمّك، حلّ ساقيك لا نحّيلك والديك !!! نحبّك : زوّر تاريخك، تحلّ على مشاييخك بعد بلوماتك ّناعسين !!! نحبّك كيف تترشى و نحبّك تتنسى و ما نحبّك بمبدئك فايقة و ريشتك تدغدغ في الربّ و تتدحنس عاللّوطى!!!  نحبّك تسكر لين تهتر و عبادك تستهتر! ما نحبّكش تسكر و تشيخ و تغنّي لمارسيل و الشيخ!!! نحبّك جاهلة تولّي ساهلة و دخلتي ماهلة و القوّات مالامن لليسار متساهلة !! نحبّك ساكتة مبلّعة ، راضية بالهمّ و الهمّ ينظّر عليك، خارج من عينيك بش غدوة يدخل من جواجيك !!!! نحبّك انا بش غيري ما يحبّكش و زينك و سرّك ما يتكشفش !!! نحبك ليّا ملكيّة مفكوكة و موش بالعزّ مشريّة !!!
نحبّك مدنكسة، خشمك يحكّ في السيمان بش قلبك يسكت و قلبي يطمان !! نحبّك تطيّب في ظهورات الطحّانة الّي خلاّو بحوراتك عطشانة لشهقة زوز عشّاق في الماء !! نحبّك تغزر بعينيك و تعمي قلبك بش متاعي ياقف فرحان و ترابك  يقعد جيعان !!! نحبك، كفريكاسي معبّي بالزيت يسقّم الجيعان و يتّاكل تحت حيط !!! نحبّك كيف غلّة مارشي البحري مزيّنة مالبرّة و من داخل دود يغلي !!! نحبّك ليّا و إلَّا نردّك تكيّة و لا قطعة اثريّة في دار الماطري الهارب متروكة و منسيّة !! في الحقيقة ما نحبّكش ؛ الحبّ بعد الثورة ما يجيش خاطر الثورة بالحبّ تجي و ما تولّيش !!! نحبّك و نهبّطك ريش !! نحبّك مهمّشة، فيّا مكبّشة، نصرفڨك و ما تبكيش !! نحبّك مطيعة، صنيعة مريعة للذوات المترهّزين من ضحكاتك الغالين !!
نحبّك محجّرة، نحبّك مهجّرة و أولادك يفناو عليك قبل ما يجي النهار و يزهاو فيك! نحبّك محاصرة و انا نزايد و نزيد عليك و نحققّ في رجوليتي كي تبدى السكاكن تخيّط فيك !! نحبّك و نبول عليك، في بلادي العشق ستراتيجيا و تكتيك !! حبّي ليك مراحل و خطط و بعد التجربيع سياسة القِطّْ: الخطفة و النهبة بعد التدحنيس و تدحنيسة قبل التخبيش !!! نحبّك، ايجا نبيعك و "الكرسي" يحميني و يكويك !!!

samedi 5 février 2011

23سنة

      23سنة ميزيريا، كانوا قلوبنا سيبيريا: لا نوّارة و لا عصفور، كان البرد منين تدور... 23 سنة غمّ، كنتوا علينا كالكفن، دافنينا بالحياة، قطعتوا علينا الهواء، 23 سنة سمّ، سريتوا في المخاخ و شلّيتوا البدن ... 23 سنة سكات، صاحوا فيهم الأصوات كان في الدّهاليز و تحت العصيّ و الصياط ... 23 سنة نسيان بإسم الأمان و صلوا المخاخ للعصيان ... 23 سنة تصفيق و تلفيق و قلّة الهمّة و التنوفيق و بعد الضيق و التزرزيق خلاّوا الكرامة تفيق ... 23 سنة فرد لون، صنعوا مالفنّان مجنون و نسّاوه في قوس قزح الروح و العيون ... 23 سنة ترهدين و معاناة مالتلحين و الكلام الحرّ ذليل حزين ... 23 سنة نسيّتونا في السماء، عينينا لاصقة القاع و القلب ثاير ما طاع ... 23 سنة فرد صوت كي يتكلّم تحسّ روحك مكبوت و تسكر و تروّح خيوط و كيف تتعب تقلب الفيستا و الكبّوط ... 23 سنة تشدّقتوا بالحرية و الإرهاب و النساء و قطعتوا الخبز و قصّيتوا الماء ... 23 سنة ضرب و   لا عاد فاهمين لا الشرق لا الغرب، عملتوا منّا كببّل عشقهم مكبّل، لا أصل و لا مفصل، و كان الفلقة كانت تَفْصِلْ... 23 سنة شادينا بكيفكم و بسّيف علينا و قلبتوا علينا اهلنا و إمّالينا، إلّي اليوم كرطشونا و لتوّة، لقبيلة يحروقوا فينا .... 23 سنة : بزقناكم و ما عاد عينا في لقياكم، لا في وزارة، لا في حكومة و لا في لعبة محسومة ... 23 سنة خرّجناكم خاطر عمرنا ما إخترناكم، و لا نهار شاورتونا و نصحناكم و ليوم بكلّ حزم كيفما تحزّمتوا الشعب بش يستأصلكم و ما يخشاكم ... 23 سنة تدمير و تسمسير و لعب بالمصير و حقّ الشعب في التقرير موش ليوم بش تجيكم صحوة الضمير... 23 سنة نتشرّف مواطنة ما عارفة تتصرّف: الشعب يعسّ و الحاكم يخرّف .... 23 سنة كمّلتوا نهبكم و في كلّ دار عزاء، سقيتوا الهمّ بالموت و الدموع كيف المطر في الشتاء ... و تحبّوا تقعدوا لهنا ؟؟ هاذي ارضنا و احنا سيادها و لا نحبّوا لا بيع و لا شراء ...
   23سنة لا بسبور و لا بطاقة تعريف و كلّ البلدان تغزرلي حارق و موش ضيف و انا عيبي عيّاش و شايخ و خفيف... 23 سنة في بلاد داموس و باقي ما فهمتوا انو لا نترشاو لانتشراو لا بوعود, لا بفلوس : 23 سنة نتشرفوا و كان تحبّوا نتعرّفوا : نحنا الكابوس متع ثورة جانفي و بش نجيبوكم عالمذهب الحانفي !! بش تخلّصوا دمّ البوعزيزي و دموع حبّي و عزيزي الّي حرمتوه منيّ في برد الشتاء !!! بش تدفعوا الضريبة غالية و رهيبة في حبوسات بنيتوها بش تصفّيوا معانا الحسابات !!! 23 سنة قمع شجّعوكم و ما علّموكم، إلي كيف الشعب يتلمّ ينزاح الغيم و الهمّ و يهجّ السارق و يبقى لأتباعو العظم ... 23 سنة ساكاج و فاوا ب"ديغاج" و ليوم بش نعاودوا حصّة "راتراباج" لمرّة هاذي بش نسكّروا الكياّسات و المطارات و نتقابلوا عالساحات ... البوعزيزي خلّى منّوا مليون و لاّ مليونين و تو تفهموا الّي لا يفيد لا حرق و لا تعيين و الحلّ هو : تقولوا "أمين" كيف الشعب قبل ما ينطق، ينين ...

jeudi 3 février 2011

عندي رغبة


عندي رغبة في البكاء، عندي رغبة متع استياء 
عندي رغبة في الضوّ، عندي رغبة في السحاب و النوّ!
عندي رغبة في الحياة، و عندي رغبة في الإختفاء
عندي رغبة في التجودير، عندي رغبة في التذبيل
القلب كيما العنين !!
عندي رغبة في الساحات، عندي رغبة في الحانات
عندي رغبة في القدر، عندي رعبة مالقبر
عندي رغبة فو بحر مالأسرار، و رغبة في الإقلاع موش في الإبحار
عندي الرغبة و ماعنديش؛ حياة وحدة ما تكفينيش !
عندي رغبة نولّي أمّ من غير ما يتسكرّلي لا بدن لا فُمْ !!!
عندي رغبة استقرار تضاهيها رغبة متع فرار !!
عندي عين و عندي فم
عندي كلام ما هو كلام ؛ يذبل في النهار و يحيا في الظلام!!
عندي احلام ماهي احلام؛ تنسّيني ديما في السَّلاَمْ !!
عندي الحان ماهي الحان؛ ما ينجّمها صوت فرحان!!
عندي رغبة في التمثيل، عندي رغبة في التنزيل
و لانكون خالق و لا نكون رسول، عقلي ينسخ و قلبي يملي و يقول !
عندي رغبة في القبول، وماعندي رغبة في الأصول !
عندي رغبة في عينيك ، عندي رغبة بش نلاقيك
عندي رغبة نكتبلك، عندي رغبة قلبك نسلبلك
عندي رغبة ، عندي رعبة
رغباتي هوما صعوباتي ، هوما موتي و هوما حياتي
عندي رغبة في التعبير ، عندي رغبة بالشعير
عندي رغبة متع تأويل، ما عندي رغبة في التفسير
عندي الرغبة و ما عنديش: ورقة وحدة ما تكفيش !
عندي رغبة بش نتڨرّع، رغبة زادة بش نتبرّع
بالآيات البيّنات، بكلام المدوّنات
بالعشقات المسروقات ...موش كافي بش ناس تستقات !!!

mercredi 2 février 2011

مُدوّنة دوانت !!! 1


ايّة سيدي ڨلنا السلام بش نبدا الكلام. بعد هالثورة  المجيدة و العظيمة الي شاركنا فيها الكلّ ـــــــــ و كلّ قدير و قدروـــــــ صارت تحوّلات منها الملموس و منها المنقوص، منها إلّي أرضى و منها إلّي بعبر النفوس. و الحال إنّو ولّى المواطن الزوّالي رهينة طفح جارف مالتحليلات السياسية و المجتمعية طغى على جلّها نوع من البسيكولوجيا البوسط ـــــ 1917 هههه الحاصل الكلها ولاّت ثورية و الكلها تتلاهف وراء منبر إعلامي بش توضّح موقفها : و عشنا اسبوع كامل بعد الثورة "دموع و خنانة" شكّيت بعدهم الي انا في كابوس و الا في مسلسل تركي بودورو، لكن بش ما نكونش ظالمة و ديكتاتورية و ما ترصيليش في جدّة، نعترف الي فما ناس وخرت لتالي موش خوف، موش جريان جوف اما فقط بش تفهم و تحدد موقعها وسط هالواقع الجديد !!!
ايه ندخلوا في الموضوع بالساق ليسار بش نقيموا و الاّ نسبوّا الّي صار !! اليوم عآلصباح ـــ على وضوك يا سي خليفة ـــ سمعت حصّة علي اكسبراس اف ام : حصّة مخصصّة للمدوّنين ( على فكرة نعرف فقط زوز منهم  ) الحاصل فهمت الي سليم عمامو كاتب الدولة لدى وزير الرياضة و الشباب هو في حدّ ذاتو محور بما إنّو كان موجود في الأجزاء الثلاثة مالحصّة!!  باهي هنا فمّة سؤال يتطرح : علاش ديما هو و عزيز ؟؟  (الزوز ما نعرفهمش على فكرة سخصيّا !!)
1 ـــ بوغوس ؟؟ ايه نيجم يكون اما شعرو طويل احلى و فمّا ما احلى دونك موش سبب مقنع ! نتكّيوه !!!
2 ـــ عندو فلوس و ولد عيلة ليكس ؟؟ ههههع عندو كاتريل و ماهياش ليكس بلكل !!!
3 ـــ عمل ما عمل من نهار على عمّار الى  الآنونيموس : فمّا غيرو و عملو اكثر منّو لا ربّما و فمّا الّي اقدم منّو الخ
4 ـــ نتمنّى فهمتو الي انا نخمّم معاكم و مانيش نعطي فيكم في اجوبة
5 ـــ شدّ الحبس : موش الاوّل و سبقوه و الخ
هاذم اسباب سميتهم خاطر اكيد فمّا شكون خمّم فيهم !!! و في الحقيقة نتصور انو هالاسباب الكلّ في الظرفيّة هاذي و مع قبول سي عمامو الدعوة انّو يولّي كاتب دولة، ساهم في تواجدو بصفة موش مصددّة و الحقّ يقال كبعض وجوه اللوح، لكن ولينا نسمعوه اكثر !!!  و بالطبيعة ولاّت آلناّس الكل عندها ما تقول فيه و عليه و آخرها "عميل" هههع مسهل العمالة عندنا !!!
لكن اذا اعتبرنا الي نحنا ديمقرآطيين و اذا عترفنا على الديمقراطية كما الآتي : حريّة الاشخاص و احترام قرار الاغلبية الي تطلعوا للسماء ولا تهبطوا بعد ""ديغاج!!!!!!! ""كانت صامتة نظرا لغياب آليات ممارسة آلديمقراطية فانو سليم عمامو حرّ!!! حرّ !!! يا دين الربّ حرّ!!!! حرّ!!! و شدّ هو الحبس و موش انا و هو احق مني و انا بنت طراد نفوضّلوا حرّ!! حرّ!!! عطاوه و قْبِل !!!
و ما راعني الاّ المسائلة الخشنة و قلّة الاحترام الّي صاحب قابل بيها صاحبو و نعتو ب: طمّاع و بهيم و عفس فيه كيفاش قبل بشهريّة و الخ !!!! هنا قلبي وجعني و فهمت الي السياسة لعبة قذرة قد يلعب فيها شبه المعارض دورا اقذر من السياسي الي هو في السلطة علاش ؟؟؟
1 ـــ اوّلا لان معارضة الحكومة مسألة مبدئية نظرا لأغلبية التجمع فيها و هنا كان من الضروي تفادي اي شخصنة حتى و كان حبيبي فيها
2 ـــ لانّو سليم عمامو عمرو ما قال اليّ  هو يمثّل المدونين التوانسة لاهو لا عزيز مثّلوا قناعاتهم ايه للّخر و كلّ واحد في تريبو و الحصّة تدلّ علي ذلك !!!
3 ـــ  مادام ما انطقش باسمنآ حرّ !!!! و ماهياش حكومة الأغلبيّة هاذي حكومة حكومة انتقالية !!!!!!!!!!!!!!!!
4 ـــ سليم ولىّ كاتب دولة في ظروف موضوعيّة معيّنة اصبح فيها الرمز  يتجاوز فيها الواقع بأميال و دخول سجين رأي للحكومة تحبّوا ولاّ تكرهوا حاجة حتّى الأدب و الفنّ الثوري ما تصورّهاش !!!!!!!!! ذنبووا ؟؟؟؟؟ لا !!! زهروا اي !!!!!!!!!
و ملّخر يشد الحكومة يشدّ بيروه موش مشكل : وين المشكل بالنسبة لبنت طراد ؟؟؟ إنّو  المدوّن يدوان هذا المشكل لأنّوـ و من باب الديمقراطية نقبل انّو البعض ما يوافقنيش ـ  من المفروض انو المدوّن فوق هذا الكلّ، فوق الإعلآم و فوق آلسلطة: المدوّن بالنسبة ليّا هو المواطن الموجود افتراضيّا ليبيّن انو كل اشكال التنظيم و التنظّم واللمّة فشلت في استيعاب الذّات البشرية بخصوصياتها و بخاصياتها!!!! المدوّن هو انتفاض الذات الحرّة من ايّ رقابة !! يعني نظرة بنت طراد للمدونين كانت أكبر مالموقع إلّي البعض منهم بلوكا روحو فيه مع العلم انّي استوعب او احاول استيعاب الاختلافات بيناتهم !!!!!!!
هذا الجزء الأوّل مالتدوينة و هذ علاش حبيّت التدوين خاطر كيف عيني ناقف ناقف !! تو  نكمللكم و بلحق تغششّت !!! ايه نجّم نتفلق اما انت زاده تنجم ما تقراليش و هذا علاش نحبّ التدوين: ماعندي مانبيع كان جواجيّه !!!!