أية سيدي أي وڨلنا السلام : نهار الاثنين, نهار رزين بطبيعتو و دايور لا بد من المطالبة بسحبو رسميا من الأسبوع, نهار تبدا ما عينكش فيه من اساسو يعني تقوم تخرج تمشي من ذي بدء فادد و الدجاج لحكل يشطح فيك
أية و أنا في هاك الحالة مشيت نخدم خدمت تعدات الصبحية . جاء وقت "البوز ديج" مشيت شريت ما تيسر من سموم و زيوت و قلت نبعد عالبيرو ما عيني في تجغجيغ زايد مشيت بش نغسل يديا نلقا التوالات كي المرشي سونترال قاع كحلة خامجة مزرزقة تقول غسلو فيها الفرارش, بهت و سبيت و تعديت, خاطر في لخر بديت نستانس بالنظافة متع العريبة ههه مزين من بره ومدوّد من داخل ايه و انا متعدية من كولوار مالكولوارات و لا يروعكم و لا يوريكم أش لقيت و أش ريت
دخت حسيت العرق لبني و السخانة طالعتلي لجواجية, تمسمرت في بلاصتي و قعدت نتفرج: كمشة مالناس تصلي في كولوار. و فتكم بالحديث الراديو محلولة في الخدمة الكل و ماريا كاري تقول لدرا شكونو كان تعطيهولي نعطيهولك يا ولدي نلقا روحي في جلغة المدفع اما تيلمون المشهد شوكاني لين وقفت نتقرج أربعة رجال جهامات حاطين سجادات, كبطيت من تالي زوز فيهم بالبوصلة مقبلين للقبلة إلي جاي منها العرض المغري متع ماريا كاري و يكبو و يقعدو
يعني ريت انت كي تبدا متعدي تراهم في بوزيسيون ماهياش كونديسيون و تجيك تونتاسيون للشاتويمون من تالي اما خممت الي انجم نطرد للتحرش الجنسي خزيت بلادتي و تعديت لكن تشوكيت بالرسمي ربما لاني اول مرة ناس تصلي هكاكة مع خصوصية الخدمة متاعي تشوكيت بالرسمي و حسيت بداء ما عندوش دواء لعدة اسباب:
اولا للتعدي الصريح على بقية الديانات المتواجدة بيننا معنتها غدوة يجي واحد يركز على طاولة و يشعل شمعة و يقلك نصلي لاخر يقبل لحيط و يبدا يندب و ينجم في اي وقت كل واحد يقوم و يعمل الي عينو فيه اما انا زعمة عندي الحق نطرشق كعيبة هينيكان مع الكسكروت المزبل و نشربها ما نتصورش إلي غلّب علية و حرقلي جواجية, هي الموقع الاستراتيجي الي اختاروه هالرباعي: موقع متع ريتني تفرج فية لا زيد ثبت فيه شوية راني نصلي راني نعبد في ربي... يا أخي هذا حقك ولا نقاش فيه لكن حقي زاده إني نتعدا في كولوار خدمة و إني كي ندخل لتوالات نلقاها نظيفة خاصة و انو من الممكن ترجيع الصلاة في وقت لاحق.تي شبينا الله الله تي شبينا البهامة علينا, وصلنا لها الدرجة من قلة الاحترام لبعضنا و من قلة احترام المتدينين لديانتهم و ما يحكيلي حتى واحد حكاية يعملولهم وين يصليو!!! فمة جامع على بعد ميتين ميتروعلاش ما يحلوش بار في نفس السياق? اما الغاية و الهدف واضحين دعاية و تعبية علاش الحرية متع الفكر و التعبير في هالبلاد تولي كالشيكلي في الجلغ المنتنة كان وقتلي الامر يتعلق بالدين بصراحة زاد نهار الاثنين تكب سعدو و مشى الي الابد للحضيض في قرارة نفسي المبعبرة
هههه وفات غناية ماريا كاري شنوة يجي بعدها اي كيسد او غرل (i kissed a girl !!!!!!!!!!!!!!) : تعددية ثقافية تبعث عالسكيزوفرينية و تخلي كيانك الشبه منحرف ينحرف و يولي خليقة و فار حبوسات و تبدا تسب في النهار الي تبعثت فيه عالبسيطة, كملو صلاتهم هزوا خراواتهم و سلموا على بعضهم فرحين و هبطوا يسمعوا في الفن الراقي تاركين في ما تبقى من ڨباعتي المثل الشهير" بعد ما عطا حق ربو مشا ياخذ في رب حقو"
كان تشوف الحاله في الاطار الجامعي
RépondreSupprimerآخر ما لاحظته في اتوالاتات فما جموع تتوضى بل كلاصت !
معنتها وصلو إلى قمة النتانه
يبل كلاصتو و يدخل يقرأ
لكلام هذا ما يخرج كان من عبد مايصليش . وباش ما يحسش بالنقص على خاطرو يحب روحو خير من الناس لخرين. وبسبب الكبرياء إلي حرم إبليس من الجنة يتكلم بالطريقة هذي علمصلين ويحاول يشوهلهم صورتهم في قرارت نفسو قبل مايشوه في عيون الناس لخرين .وممكن على خاطرو عمرو ما صلى ومايعرف حلاوة الصلاة .
RépondreSupprimerومتنساش يا صاحبي إلي الناس الكلهم يغلطو .ولي المصلين يغلطو زادة .ببساطة المصلي هو انسان عادي كيفك بضبط ينجم يعمل كل شي حلال و حرام أما خير منك بالصلاة . علاش تحبو تغزرلو انو ملايكة.
أما السبب واضح إلي التونسى لسانو طويل كان في أعراض المصلين ولاخر في نقد كلام ربي قال شنوا شبيه ما فماش مساواة في الميراث ولاخر يقولك الحجاب تخلف ولاخر ....... فيقو على رواحكم وإذا انتي خترت باش متصليش وتعيش حياتك خلي لعباد إلي تصلي تعيش حياتها وبالله كل واحد يتلهى بخنارو خير . وربي يهدي مخلق
لكلام هذا ما يخرج كان من عبد مايصليش . وباش ما يحسش بالنقص على خاطرو يحب روحو خير من الناس لخرين. وبسبب الكبرياء إلي حرم إبليس من الجنة يتكلم بالطريقة هذي علمصلين ويحاول يشوهلهم صورتهم في قرارت نفسو قبل مايشوه في عيون الناس لخرين .وممكن على خاطرو عمرو ما صلى ومايعرف حلاوة الصلاة .
RépondreSupprimerومتنساش يا صاحبي إلي الناس الكلهم يغلطو .ولي المصلين يغلطو زادة .ببساطة المصلي هو انسان عادي كيفك بضبط ينجم يعمل كل شي حلال و حرام أما خير منك بالصلاة . علاش تحبو تغزرلو انو ملايكة.
أما السبب واضح إلي التونسى لسانو طويل كان في أعراض المصلين ولاخر في نقد كلام ربي قال شنوا شبيه ما فماش مساواة في الميراث ولاخر يقولك الحجاب تخلف ولاخر ....... فيقو على رواحكم وإذا انتي خترت باش متصليش وتعيش حياتك خلي لعباد إلي تصلي تعيش حياتها وبالله كل واحد
nader saidani نادر السعيداني يتلهى بخنارو خير . وربي يهدي مخلق
@ Shah :
RépondreSupprimerالشيء الي نحكي عليه ما يبعدش غرام و الا صانتي علي تحكي فيه شكرا لمساندتي في رايي
@ nader saidani chouhira anonyme :)))
انا ما قلتش ما يصليوش يصليو و قلت الي فمة جامع على بعد ميتين ميترو فيه ميضة و زرابي و مكان جعل للخشوع اما انهم يصليو في مكان خدمة هاذي راهي ما تجيش خاصة الي فمة ديانات مختلفة في نفس المكان اية شعملنا كان كل واحد يحب يصلي في وقتو حسب ديانتو نسكرو الحانوت لا قول نسكرو البلاد جملة وحدة و زيد علاش ترا في رايي قلة احترام و في سلوكهم احترام انا نقول الي يؤمن و الي يصلي و الي يعبد بينو وبين الي يمن بيه موش فرجة و عرض خاصة انو كان فمه بلايص مستورة و محمية اكثر من كولوار الا اذا كانت النية المبيتة شوفوني تبعوني هنا عاد تتحل حرب اخرا لا فائدة من الحديث عليها فالكل عالم بما يجري و يا ستار يا جبار لا اكثر و لا اقل