الله و احد الله و احد و نهار الاحد ما كيفو حد

يا حبيبي اش بش نحكيلكم اش بش نشكيلكم نهار الاحد في ديمقراطية جربوعستان العظمى: حنش على طولو, ممدود ,متكي ,مرخي ,لا ياقف, لا يقعد,فاشل و راسو مدنكس اللوطة, و رد بالك تخمم تكستيه ببورنامج و الا تقلو هيا تي هيا نبدلوا الجو يجاوبك هذا كان جاوبك : ماهاه!

من غير ما تحاول لا تدحنس و لا تمحمس و لا تغني يا للني و لا تمكيج و لا تعري و لا توري و لا تلبس و لا تدخل و لا تخرج راهو زايد رامي القتلة و من رخيتو ما يخرجو حد

الاحد في هالبلاد كساد يا عباد !!!!  الدنيا الكل خانسة الشبابك الكل مسكرة الاضواو طافية ههه اي كي نحكي هكة يمشي في بالكم الي الجو الكل تحت الباطنية كليب شيء والودويو يقعد بعدنا كان فمة منو هههههه و  من وجوههم نهار الاثنين تفهم الي لا فمة لا شيخة لا تزيين

ايه سيدي ايه: تحل تونس ضبعة تلقا متع المواطنين بالخارج كلي تلهاو باللي الداخل هوما بره برك  تبدا تلعن في الوالدين عايشين الغادي و يندبوا على هنا!? تسكر الشاشة و تقول ايه شوية بشاشة هكاكة و  ترا في نهار الاحد طحشو دازز اعوام بيره و هو ممدود قدامك كالعزا المسقي لا تعدا و لا خلى المحل يتكرا

و رد بالك تقلو نعملو حاجة!? ما نعملو شيء?? و اخطاك مالتزعبين غاوي زمم يراه حزين !هانا الزوز قاعدين يا رب العالمين! هانا فادين هيا نلعبو انت اللحم و انا السكين!! رد بالك قتلك!!!!

 يصيح يكش يعيط في وجهك اووووه سيبوني ملة عبودية كان انتوما تحبوا ترتاحو حتى انا ماذبية السبت من تالي بالبيرة داخل فية و الاثنين من قدام و الناس الكل تسب فيه سيبوني نرتاح 

اما كان جات فمة كورة و باندا متع ذكورة ياقف و يوقف طاقاتو الذهنية و البدنية و يا عيني عليه خير مالسبت عشية نشاط و حيوية و طفح من العذوبة السيكسولوجية اوو البسيكولوجية نقصد ههه  اما والو ماتلقاش فيه ثنية خاطر و هو كمل الحصة المسائية يهبط عليكم الاحد الرياضي كالسخطة الحية و يتعدا قدامك و انت غصتك في سروالك

  تفاديا لكل هذه الملابسات اللتي من شانها تعطيل سريان الكيف في الدماغات لابد التسلح بكمية معقولة من البيرة 

p.s: la photo est une affiche du film l'ennui adaptation du roman "l'ennui"  d'Alberto Moravia