لا تاذيني لا ناذيك

يا سيدي بن سيدك احيانا العبد تطيرلو مالخدمة و مالدهك يفلقط يقول خليني نمشي نعمل قهوة و الا كعبات و الا ركعات كل قدير و قدرو و كل واحد و ميولاتو

ظهرلي اليوم بش نطل عالعاصمة ياخي قابلت صديقات السوء يتسكعو و الكلها فادة و موش عاجبها حال قلنا اية نتوجهو لاحد المطاعم ناكلو حويجة و نشربة حويجة اخرى تزهينا و تحلنا الشاهية للحديث و تطير علينا الزمم

كان الامر كذلك مشينا ثلاثة بنات شايخين نتمايلو نتخيلو في اول كويس مع بعضنا اية قعدنا كمندينا سرباونا و ما يروعنا الا و العينين هابطة علينا كالمطر تقول ثثلاثة راقصات في كاباريه بالرغم الي مشينا لبلاصه يروى و يحكى  أنها تلم ناس اقل ما يقال عنها انها قارية و تظهر فاهمة الدنيا

اية سيدك بدينا نحكيو عالدنيا عالخدمة و الباهي في هالنوع ماللمات انو العبد يحكي على الخنن بكثير من التجريد و التعميم مما خلانا فيسع مع ثاني كاس نعملو جوينحات و نطيرو في مدينتنا الفاضلة و المفضلة بعيدا عالتجربيع و التعقريب و ما الى ذلك من سلوكات حيوانية مقيتة الى ان حسيت بزهمولة ورايا و صوت تقول خارج من تحت الارض " ههههه انجم نشعل" النار ما تتشدش مديت البريكية و عدت الى حال سبيلي مطفية الضوء و مستهدية بالطويولة  رجعت نحكي عالدنيا و البلاد  و مافيها  هكاكة و جات كالعارضة قدامي تتبسم و السنين صفرة صديد " هههه محلاكم تشرهو القلب و بعثتم النور في هالمكان" عربية قحة ذكرتني في شبابي  يبارك فيك و درنا لبعضنا شيء باقي العارضة ما تعداتش و الضحكة بدات تنتقل الى باقي انحاء الجسم الشبه منحرف باعثة فينا  رغبة في الهجة  قلنا لا صامدات هنا و حتى كربي ماهو بش يبلبز هالقعيدة المزيانة

اية جات الماكلة بدينا ناكلو هكاكة و  الطاولة الي بحذانا تستعمر و بدا العرض

اية سيدي اش بش نقلكم تقول عمرهم ما راو ياكلو و العينين فينا و الا علينا و المرق تتشرمط كاس في الفم و كاس عالسورية  ضحكة متع كانيبال راء لحمة حية بصراحة فديت طارتلي بدات العكسيات تتكاثر و بدات الماكولات و المشروبات تفقد في مطعمها وبديت خاصة نتحول الى كتلة من الاعصاب قريب تهز البوندرولات و تبدا تعيط اوه علية اوه علا شجيت لهنا

قلت ولا فايدة هانا مروحين ماناش مكملين , ياخي يراوغنا واحد بوكرش " من قبيلة نسمع فيكم يعطيكم الصحة مازال الخير في الدنيا و انتوما كي خواتي بلا بلا" ههههههه و انت بابا و انا المسيح

 و كبش كبش كببببببببش  في الحديث و تخمرو جبدها الكل لينين ماركس انجلس نيتشه غرامشي تخم من المقولات في دقيقات  لين وصل  للكلمة الي نستنى فيها من دريجين الجسد ما نخبيش عليكم شدتني ضحكة هيستيرية  دموعي للقاع

انه لا من المؤسف انو رجال هالبلاد الي يعتبرو في انفسهم نخبتها و طليعتها يمارسوه النوع من الممارسات الرديئة و اللتي و ان دلت على شيء فهي على فرط التيستوستيرون في دماغاتهم و عماهم المفرط الي يمنعهم من ادراك القرف الي ينجمو يبعثوه في مرا بكلامهم المستهلك و كما ا نه من العار و من قمة احتقار البشر لنفسه انو يرمي روحو بطحشو الدازز على طاولة فيها نساء تشرب بش يسيب تخرتيلو و انه لا من المزري انو مواطن يدعي تمثيل بديل من البدائل انو يعتبر من الشرعي و المشروع انو يتوجه لمرا بش يحكي معاها  

و نفس السؤال ديما يراودني انا الي نتفادى هالاماكن اذا كان انسان وانت تعرف و هو يعرف يدعي انو حامل هم بلاد يتشولك بهالطريقة  علاش نستغربو حالنا اليوم

اذا انسان يدعي الديمقراطية لا وسيلة له للتواصل مع مرا الا ديكتاتورية طحشو الدازز اش بش نستنى في الكار و الميترو

المسالة و ما فيها  انهم اشباه او اشباح مزيج غير متناسق بين اصول مسوسة و ثقافة مستوردة فاتت عقدهم ببعض الثورات و الصراعات, ناس حفظت من الكتب اربعة و الا خمسة مقولات و كبشت في اربعة و الا خمسة فلاسفة و اتكات عالحرية و حرية الجسد باش عاثت في نفسياتها الفساد و كي طاح الاتحاد السوفياتي اتكات معاه  و مدت الاربعة و قالت هاذي نوبتي بدات تكعررو تعاود في مقولات مندية مخززة لتلبية الغرائز الاكثر حيوانية فيها من الجنس الى الحكم الى الحكم المطلق في ديارها مع نساهم و بناتهم الي نادرا ما تراهم معاهم لا في المطاعم و لا في التظاهرات الثقافية

ايه بش نشد عليهم المشعل و بش نذكرهم باياتمهم نقلهم  انني اطالب بالمساواة في القعدة في الريستورونات لا تدورو بينا لا ندورو بيكم الا اذا كان الامر متفق عليه سلفا