mercredi 17 novembre 2010

عمار يا عمار

يا سيدي من مدة اتفق المستفعل فيهم من مستعملي الانترنت اطلاق اسم عمار على الصنصرة الي تمارس فيها الوكالة التونسية للانترنت و بدينا نسيبو في كل الشعارات المتاحة من سيب صالح لشدونا منو معانا الهوتسبوت الخ
  شيء تواصلت المهزلة و طالت صفحات و مدونات  على روحها لا تنفع لا تضر و بدات السيتات خاصة المشهورة منها و المختصة في تحميل الفيديوات تطير الواحدة تلو الاخرى و نحنا كل مرة مبهمين قدام كارثة اسمها عمار لين نهار قمنا و لقينا الي حتى المقالات الي ننشرو فيها تصنصرت  بون هنا باختلاف الموقع تختلف ردة الفعل بين الي ينادي و يقول يا اولادي عيب شلكتونا رانا ماشين و نوخرو كي بول الجمل و بين الي وخر لين و ما يعافينا جاتو في الظهر و فمة شكون قال ستوب للدمار سالغي عقدي مع كل الوكالات و كان حاجتي يخلف عالويفي و عالبيروات 
حكاية التصنصير هاذي معضلة فعلية لاننا لتوة منعرفوش علاش و كيفاش هذا يطير و هذا يقعد و خاصة انو اكتشف البعض منا انو بعض السيتات البورنو تخدم لباس ياخي كي سمعت ليوم اني مثلا معادش انجم نستريمي بحكم صنصرة ميغافيديو سكرت عينيا الزوز و تصورت الي عمار قدامي
يا حبيبي يا حبيبي اش بش نوصفلكم الشعر اكحل توتة تقول فحم و الراس الكلو لحم و الحناك بالشحم تشتهى فيهم كف كالدف الشفايف تعمل طنجرة قلاية و الخشم يجي جراية قبلت لا هالفطشاطة شعلت سيجارة و ابتسمت والو فريجيد  قلت خليني نسالو على دين والديه شيء فرخ كبول لا اصل لا مفصل جاء من حيث لا ندري  قلت باهي اكيد تو كي نسالوعلى  شهايدو تو يجاوبني خليني علقليلة نعرف هالجثة الهامدة منين جاية قال قراء و وصل ماجيستير طحين و تصفيق  امممممم بديت نقرب و بدات التوالات متاعو تتسرح قلت ايه نلعبها ماعلى بالي و نسالو كالسؤال المكرز شنوة لونك المفضل يا ولدي عيط لين بزيزو طلع و بصاقو تناطر محذثا فياضانات مرعبة في جل الجهات بنفسجيييييييييييي و احمر قان و يحيا فلان و تحيا فلتانة و كلنا هذاكة و بره هكاكة  بدا يلوي و يصفق  ههههه بديت نفهم قتلو بربي يا عمار ياخي في بالك الي فمة جماعة قالتلك سيب صالح يا ولدي جهل تقول سبيتلو والديه و بدا :
كلاب و طحانة و ما يفعلوش و يسبو فيه و في دين والديا و يحبو يبيعو ويشريو و يعيطو لهاك الجماعة بش يجيو و يخططو بش شوهو سمعة البلاد و يحبو يعملو البنوك و يستفردو بالاعلام و الخ و راهو جاتو صفة دياري لا اراكم الله مكروها حاشاكم شلالو للسقف سكر العزى
قتلو باهي ما عليناش فيهم اما انا شو محلاني و راسك ما حاجتي بشيء شوية افلام و دوكومونتار و راني طموحي في الحياة دبوزة ماغون بلا كريدي لا اكثر و لا اقل
تعرف عينيه حمارت و دموعو طلعت و بدا يفسرلي كيفاش هو خايف علية مالاغراءات قتلو نموت عالاغراء قالي نخاف عليك من المواقع الاباحية قتلو اش عليك راني نحب الاباحة الواقعية و التحكحيك موش في اصل دين والديه قالي اي اما نخاف عليك مالخوانجية قتلو ما تخافش راني سوكارجية و ما يحلالي شيء من غير هالكشيخة الناموسية  قالي باهي نحبك لية تنمية للوطنية هههههه ضحكت و قتلو نمي انا للوطنية ما ظهرلي راني مؤمنة بوجاهة المراحل الاستعمارية اوووو جهل خرج من صينتو و بدا يصفق و يعيط يحيا هذاكة و هاذي البداية و مازال مازال و يا تونسي يا  حاوي الخ الخ  بهتت قعدت حالة فمي طاقة و عينيا كالصحفة مبهمة في الي قدامي و طلعتلي كلبة بنت الكلب قتلو اسمع الي يشدوه بالسيف ما يتسماش بيبون  انا هكاكة و جاء صالح ههههههه ما نحكيلكمش سليت روحي و خرجت و قعدت نسمع من وراء البيبان و كي الخبط يقوى نكليكي جام
قعد صالح و خرج عمار و هاو يرتع من دار لدار و يديك فيها على بعضها كبار و صغار جهار و بهار ليلا نهار
و انا ما يجي علية كان المثل طحان و فرحان خاصة وقتلي بش نخلص للتليكوم و لبلانات

2 commentaires: