الباندي و الا فن التبوريب

وقتلي يجد الجد ما تلقا كان البونيه خير سند.... تعرفوا كل يوم تعدا و بعد ما سمعت سيدي بيمول اقتنعت الي بش تعيش هنا يلزمك تكون باندي اما موش نمبورت لوكال ههه جاي من وكالة و لابس مالفريب و ازرق و شعرك بجال بو ميا و سبادريك اديباس بفففففففففت لا باندي و لا خليقة زوالي انت و ما عندك والي و رد بالك من تالي .....راهو يجيك البلى و انت لا تبالي

بش تبدا باندي فوندو تفعل و ما تدويش اووووه يلزمك جو متع  ڨطاطس فمتلا .... 
كيفما يقلك افرش تلقى ما تتغطى و اكيد في اطار تحكيم الديالكتيك تلقا ما تعري زاده .
الباندي الاين في اياماتنا بصراحة مصروف : يلزمك تحط الحطة و تعمل كرهبة و  رد بالك تكون شعبية رد بالك راهي كرهبة شعبية تخلي كل الشكوك تحوم حولك و تلبس منقالة رد بالك سواتش انسى هالماركة شوف التيسو و الا كان استطعت اليها سبيلا روليكس اي علاش لا روليكس اسمع ما تعدلش عالفرنسيس كي فضحو ساركو كيفاش يلبس هالنوعية من المناقل بفففف ما يهمكش هنا نورمال بعده قالك لامبوسيبل موش تونسي هههه بربي الي يعرضو لامبوسيبل يقلو يجيني عندي ما نحكي معاه و وراس لحنينة ما عندو مناش يخاف مانيش باش نضربو ههههه !!!!
اي و سيب عليك ماللغة متع الباندية بفففف كيتش, معادش اين, ريق قديم متع باب الجديد ( شنحبها كالحومة برغم تكشيختي)

لا الباندي متع توه  الي يحب ينقب الارض من غير ما يؤدي الفرض يلزمو يكون يحكي زوز لغات علقليلة علقليلة جدا زاده مع استعمال اللغة المشفرة من قبيل لول و مورد دو رير و فوك و شيت و بيتش هههه 
ايه و يلزمو يتقن شوية بين زوز صوابع كانو شادد الملح بش يرشو فوق صحين عجة بالمخ يلزمو يفوح كلامو بشوية :  

euhhh, heinnnnn, koiiiiiiiiiii, noooooooooooooon ???? en insistant à chaque fois sur les 'e' des fins de mots ou de phrases !!!

هههه مسكين الباندي متع هالوقت يسخف بصراحة.... حتى من دارو يلزمو يتمرمد بش يسكن فيها: ماذابيه يبعد عالعاصمة ملوثة و تمسخ الحوايج البيض ,عالسيجومي برشا ناموس و عالجبل الاحمر برشا شراب  ماذابيه يختار بلاصة جديدة هكاكة يوري الي يحب و يخبي الي يحب و يعمل لروحو فيرجينيتي فمتلا...  بصراحة علاش ما يتلموش في شكل عصابة اووف قصدي نقابة الباندية و انا نساندهم في القضية و كان يرضاو بيا نعمللهم ومضات اشهارية تنسيهم في البشرية

بلحق راهو انك تكون باندي ماهياش حاجة ساهلة يلزمها برشا جهد و عبد يعطي من روحو, يعطي روحو و الا زاده روحو تعطيه ...
انا نتصور الي التبوريب قطاع مثمر ينجم يجلب الاستثمارات في جل القطاعات مثلا الباندي ينجم يسهر عالعتبة في الليل ما يخافش ههه و ياكل القلوب في الميترو و يبزنس على بنية في الشارع و كي تقلو لا يسبلها والديها و ينجم يكتب غناية يسب فيها بنات امهم و ينجم يقول للمرا نحب ثلاثة عليك و نحبك تشد الدار ههه و فمة الباندي متع سيدي بيمول هذا باندي ولا وانقضى. قضاو عليه شوهولو سمعة والديه , ماخلاوش فيه و كي لقاوه فنان ربطوه بالحزام للحفاظ على الامان متع الوخيات و الوخيان.