dimanche 9 janvier 2011

سامحوني

سامحوني ما رقدتش
سامحوني ما قدرتش
سامحوني ما فكرتش
إنوم هجرني
ادمع سكني
الغل ركبني
كلامي مضروب قدام شعبي المنكوب و خد لميمة المندوب، كلامي تكركيرة قدام الذخيرة، كلامي مايجي شيء قدام ارصاص الحي
كلامي هو سلامي أما إليوم إل ورقة تبكي قدامي :
انا نكتب ول حبار يصيح يشيح نبيح عارف إلي لكلام غادي وين ماتوا ولاد بلدي رسمي وصحيح، لهنا لكلام هابط علينا كيف لعزى لا فيه راحة لا فيه دواء،
سامحوني م تشدوني
لاني طاغية و لا كلب صهيوني
لاني كاذبة ومبادئي خانوني
يمكن كاتبة بدمع عيوني
من غير قنابل تسيل هاهو الهم فيهم يميل
سامحوني كان دموع غطات عينية وقتلي كارني نزغرط علي تدفنوا عليا، و دفعوا حياتهم بش غدوة حرة انا نعيش في بلاد مفيهاش تدرويش، تطرويش، قحب بريش !! سامحوني ولاد بلادي مانيش بلعاني و هاني نعاني من لغة "ما عمبالي " ياخي إلي غادي سطمبالي ؟؟ ولا جو حافالي ؟؟ ياخي إلي ماتوا بل امالي؟؟ ياخي إتونسي ما عندو والي ؟؟ ياخي مازلنا نحكيو وقتلي اماتنى ينعيو ؟؟ ياخي بالحق تحبوا قلوب لحباب تتحرق ؟؟ و الأبات ول أمات من اولادها تتسرق ؟؟
سامحوني مانيش نعارك نحب نشارك أما البرد بارك  فينا : الجنازة غادي و لعزاء فينا، يا فضيحتنا قدام التاريخ إلي غدوة بش يجبد علينا ويقول إلي احنا تخاذلنا و بسكاتنا بعنا وشرينا
سامحوني ثلاثة أيام عروقي واقفة لا دار فيها لا دم لا هوى، اش يفيد قدام دموعكم إلي هابطة كي المطر تتحارب مع الكرطوش ومع الصخر
سامحوني منجمش نكمل قلبي ينمل
سامحوني كيفما كل يوم لكلام فيا يصول ويجول ويخرج دموع مخذول !!
سامحوني يا الأموات يلي زرعتوا في الصحراء شجيرات
وضويتو ليالينا بقميرات
يلي وقفتوا عسيكرات الكرذونة إلي بفلوسنا باعونا 
واحتلونا وبقنابل صهيون ضربونا 

2 commentaires:

  1. :'(
    و صورة البلاد إلي عليها مرجونا
    هاهم بعثوها تو(ولا يمكن حتى من قبل) و فضحونا
    قتلوهم هوما واحنا من داخل محقونا

    RépondreSupprimer
  2. مبروك الحرية لتونس عليكم بمحاكمة بن علي

    انتم السابقون

    RépondreSupprimer