samedi 15 janvier 2011

صباح الحرية


ساعات  كي الحلمة  تولي حقيقة ما تتمنى كان تعنيقة ولا بوسة ولا تطرشيقة لخمرة صديقة ... القلم رزن تعود إزمم أما الكلام ليوم مزيان لاهو حزين لاهو جيعان كلامي ليوم متمرد ثائر وفرحان ... صارع من أجل البقاء وليوم يحيا بعد العصا ... كلمة حرية كانت في بلادي تهز مولاها للإقامة الجبرية وليوم كالشمس تضوي عليك وعليا من غير إدعاء المغالطات ومن غير خطب فاسدة ومرزية ..إليوم بعد اعوام تأكدت إنو المواطن إنسان قادر عصبر أما مش علغلبة والنسيان ... صحيح مازال إنبيح ولكلاب وشوية كرطوش وسراقة يسريو في الظلام كيف الخنتوش أما ريت البارح إلي غيري مات وما شافوش : شباب وشيب وشياب تعيط فرد صوت وتقول "ديغاج" للي سرق وقتل وعمل أكبر براكاج - سكاج .. تلمينا ويل حب مالينا وحتى كيف ضرب إل غاز هل مرة شدينا يدينا وقلنا:"  لا مجال في حياتنا لتركينة مدى الحياة إلي عجبوا قبل ولا يروح في سكات هنا بلاد إلقلوب الحية ومش لاموات ولامجال للحزمات مع محبي الحريات"... صباح ليوم يوجع شوية علي ماتوا وخلاو وصية : البلاد لشعب موش لأي زمرة سياسية " و لا مجال للمتطرفين و الحسب اسياسية: الشعب حب و الشعب يحب على ديمقراطية موش على حقبة ظلامية فحذاري من غضب الشبيبة المتعطشة للحرية !!!!!
كيف بدات الحلمة وليت نرى بصحيح و توا بش نصيح :
نحبكم ما أحلى ربكم !!! نحبكم ينعنبو إلي سبكم ومحلى اتراب إلي لمكم !!! نحبكم و بالي فيكم وكلامي كلو ليكم ومعانيه ما تكثر إلا بعينيكم !! شعبي حبيبي : توحشتك يا سيدي !! يا كبير!!! يلي مالي عينيك الخير!!! يلي هبيت بصحوة ضمير نسات التاريخ وبقية الشعوب الشخير !! شعبي حبيبي مصيرك في يدي ويوم استقلالك هو عيدي !!! عيدي الوحيد وحبي الأكيد!!! زغردوا يا نساء إلجبان هرب ول حر عالميدان !!! ومازال طريقنا مليان بصعاب وصوت الخوان !! أما دفعنا ومازلنا مستعدين في عوض الميا ألفين أما رانا معادش راضين بنار شاعلة في جلود لولاد وكباد لولدين !!
هالبلاد عشقتها وعمري مبزقتها وبقلبي رزقتها تربى في دززها وفاق مع شعبها-عزها !!! عمري ما كنت من المناشدين إلي باعوا همتهم بفرنكين أما بش نولي مل حراس الشرسين للحرية ومبادئ الديمقراطيين !!! عمري ما فلحت في البوح بحبي أما ليوم نقول : نحبك يا شعبي !!!

2 commentaires:

  1. مبروك مبروك مبروك و الله الشعب المصري فرح ليكم

    انتم السابقون

    RépondreSupprimer