واحد واحد لالفين وحداش

الفاجعات متواصلة و السخطات متهاطلة , كل يوم نكد جديد و لا عنا منبر و لا مصدر اكيد نبريكوليو في الاخبار و قاتلنا الانتظار علي غاب عالانظار

كل دقيقية تهبط تفليقة للي ستانس ينزل على الليقة يعطيه كذا و شي عالخليقة و لفة في شوليقة و هجة عند بو تفليقة  ... كل يوم شكارة مالاسماء المستعارة الي يديكوا فيها الصنصارة عايثين فيها فسادا و عافسين فينا بلادا و نحنا هوما نحنا! لساناتنا مرزية و همتنا موش مكرية و لا عنا لا منصب و لا مكسب و ما عنا والي كان الزوالي و البقية يدها و لا نبالي ...لا عنا لامع البوتليس و لا البوليس عنا مع الكلام الحر و الساكريفيس فلذا كفانا مالارتيفيس و براو شوفوا وين تبيعوا كلامكم الخسيس ام لهنا فدينا مالتلحيس و التعصيص نحبوا نعيشوا احرار و بلا استعمار لا اعلامي و لا "حزامي" .... يزيونا مالمريشش الي كساكم و الاهالي ما عيش راهو ندى و عمللنا الفدة و قلقنا مالمدة و هانا ليوم قمنا و دموعنا سالت و تلقاتهم ضحكتنا خاطرنا و لاول مرة كلينا اما فدنا البلاد و الاحرار الاسياد و عيطنا باسامي الاجداد الي نساتهم البلاد ... بلادنا راجعتلنا ماليتها الكلمة الحرة الي تعيط الي تصيح الي ملت النبيح بعد ما اغتصبتوها و بعتوها و لزيتوها للهجان اليوم جات مع هيجان شعب شعبي حر و متحرر لاهو بشعار لا بثنين متاثر خوفوا الي زرعتوا فيه كالالغام تبخر و يدو اليوم عالية في السماء تندد و تصخر مالشمال للجنوب القلوب عالقلوب نساو الفوارق و الحدود ماعادش فيها النار شعلت في الجلود .... تحزمتوا بينا سنين طوال و عملتوا وجيعتنا موال نسيتوا حركة التاريخ يا والله احوال و اليوم هاو الدار الريح و بدينا نشوفوا في الضريح بناه الشعب الي علمتوه يحب اللعب

في بالكم ما نعرفوش لا ما نعبروش اما نعرفوا و اليوم هانا عبرنا صبرنا لين تطفرنا و لين استشليتوا و شليتوا علينا اما اليوم ان الاوان لقلب الميزان بعد ما تقلبت الميزانية

في بالكم جبورة فالحين كان في الكرة و نتبعبروا على تنورة  في قناوات ماجورة في بالكم نسينا نحبوا و من غادي استمديتوا الحق انكم تسبوا يراكم تتكبوا و تو تشوفوا حب بلا حدود ماتوا و فناوا عليه الجدود
وسيبو رب مدونات الاصحاب راهم طرف الشمس فس هالسحاب كلمة لكل المدونات الي داكها عمار الخرخار