سامحني و بكى ...

سامحني و بكى ...
و ليلة قبل ضربني و شكى!!!
و قهرني و مشى...
سامحني: "طاح راح "
قبل بزق و صاح !!
"سامحني بش تربحني!!!"، "خاطر تنجم تطيحّني!!؟"
سامحني من غير كلام، تحبّ تاكل مشطة في الحزام ؟؟"
قالي: "سامحني و أنطق سَلامْ !!!" ... سامحني و يوفى الكلام !!!
قالي سامحني و دار في بالو حقّق انتصار و قضى فيّا بكلمة عالثورة و النار ...
قالي سامحني و ما غزر ّو كيف يبست نطر و فهمت إلّي موش سماح أمّا تتليف خطر يعطيه كسَرْ !!!
 أعذارو مسلوبة، ذاكرتو منكوبة، أيّامو إلّي فاتت و إلّي جاية منكوبة، و في ساعة طلب السماح و الدمع إلّي هبّطوا كيفما الدم إلّي سيّلوا ما شاح ... تعبت سنين يحّب بكلمة يرتاح و ينسى الليل و يعنّق الصباح ... ياخي لها الدرجة بدني مباح ؟؟؟ ...
طلب السماح و ما باح، كيفاش ناويني نرتاح ؟؟ من سنين فالح في التكسير، منين جاتو صدفة صحوة الضمير؟؟ من قرون ابدع في تعذيب المواطن المغبون، منين جاب الدموع في العيون؟؟؟
قالي سامحني و ما سمعني كيف قتلوا : لا، سماحك أبعدلك مالسماء !!
نسامحك؟؟ نسيت كيف من شعري كركرتني و بعصاتك كسّرتني، و في الهمّ عيّشتني و سكّرتني !! نسامحك؟؟ نسيت ملامحك كيف كالصيد تتسيّب و غلّك فيّا تسيّب ؟؟؟ نسيت كيف تسمعني لغتك الحيّة إلّي تلسعني و تخلّيني جيفة عالأرض مرميّة ؟؟؟ نسامحك؟؟؟ ما نجمّش، همّتي و كرامتي و قدري ما يسمحليش، تحبّهم بش يرضِّيوِكْ يهبّطوني ريش؟؟ سامحني إنت أمّا سماحك، إهانة لكلّ ضحكة مزيانة، حلمت ترى في سماها حمامة و لا ماطراك و لا عصا تهبّطها في طيرتها دايخة و ڨرسانة !!