samedi 12 février 2011

كي تسكّر عينيها

 نحبّك بش نمدّك ... "نحبّك!!" كلمة خاطر ما نڨدّك !!! مخّك واسع و عريان و انا راجل نحبّ الامان !!! بدنك شاعل و مزيان و نحبّ البدن المتزيرف و العطشان مهما نعطيه يحسّ روحو مكسي و شبعان ... نحبّك تكنيك ... نحبّك تتناك... نحبّك ستراتيجيك... نحبّك ستراتاج ... الحبّ قبل و لاّ بعد الثورة بياج و ممكن بعدها اقرب للزناء مالستراتاج !!!
 كيف تتمدّ المرا : الراجل يحسّ روحو قدر و قرى ... ما يعرفش ... ما علّموهش!!! الّي المرا كيف تتمدّ تسرح و ما ما تقدرش تمدح !!! ... ما علّموهش الي بدنها خريطة و ما هياش قادرة على أي تفريطة في أيّ ركن مالأركان بش يتمكّن سيادتو مالإستيطان ... 
     و كيف اللّة تاقف، سيادتو ما ياقف، يحسّ روحو خافق و موش  قادر عالنجاح ، علّموه ملّي صغير الإجتياح !!! و قرّاوه موش عالحبّ اما عالنكاح !!! ومن غادي كثر الضرب و الصياح و من وقتها لا من فينا عارف يرتاح !!!
نحبّك بش نهدّك موش لأحلامك وردة مفتّحة نمدّك !!! و هالفكرة لا يلزمهالا اصلاحيين و لا ثوّار !! هّالفكرة يلزمها رجال احرار !! و الحريّة لاهي انقلاب و لاهي مرجعية: هي فكرة تولدت معانا و فيك و فيّا ؛ فماّ اليّ تنكرّلها و فمّا الّي كبّلها و فمّا الي كالبيان سرّبها امّا جلّنا نسى يعبّرها، يعبرّلها !!!!
 نسى يقوللها يا للّة وقتلي تبات تحلم و تستنّى!!
نسى يقوللها يا عمري و قتلي الأيّام تحتو تسري !!
نسى يقوللها مزيانة و قتلّي الأيّام خوّانة !!
نسى يقول وقتلي بان سكاتو يخون و كيف تكّلم ما صان و كيف سكت خان !!!
المرا يا سيدي كيفك بالظبط جيعانة وِهْمُوكْ الّي هي شبعانة و ماورّاوك إلّي هي في صحرتك عطشانة!!!  وزعمة دوري أنا ؟؟ إنّي نصوّر؟؟ إنّي نحوّر؟؟ إنّي ما نخوّن: وقتلّي كيف اللّة تتمدّ الشمس تتحوّل و اللّيل يصير نهار و الّي في النهار عار و كان جاء الليل يصبح دمار؟؟؟  
و السؤال يتسأل : علاش حبّ الراجل للمرا كيف تشيب و تعمل كرش يولّي سُلّْ ؟؟ هو بالعهد يخلّ و هي تتسَلّ ؟؟؟ هو يتجاوز و هي كلّ جوازات السفر ممنوعة و عايشة مقموعة !!!! هو يحتلّ و هي بكرهو و نقمتها على روحها تِعْتَلّْ !! تولّي كالكسرة بعد حرف جرّ لا قادرة تتفتح و لا قادرة تتضمّ !!  و كان عملتهم تولّي غلطة و تولّي هي سبب الجلطة، وقتّلّي اللّة كيف تتمدّ ما كانت  تحلم بحدّ: كانت تسكّر عينيها و تتفكّر لياليها و قتلّي كانت تحلم بيه و تسأل روحها : ليوم آش بقى بيني و بيه ؟؟؟؟

3 commentaires:

  1. lol, houwa el klém s7i7 w mawzoun w 3ase77a ma9roun, emma el mochkla mehich houni yé bnayet 3ammi : el mochkla fi innoun nséna ( barcha menhom mé ikhamémouch fi nhar ghodwa ) ti sa3a sa3a tesma3 : ti ech ihemni fih !! ijiha errajel et9oulou: ti e7chem, yékhi mezelna sghar ? emta3 hakka a7na ?? alors que barcha rjel, la majorité, kif ifout erl 50 iwali chébeb ! w ken martou mé teklhetech eb rou7ha durant es 50 adernieres annes, etwali ki koudes le3zé 7achek :-P

    RépondreSupprimer
  2. آآآآآآآآآآآآآآه جبتها و ما جابها غيرك يا بنت طراد انتي كتبتها بالجواجي و انا تحفرتلي في كبدتي

    RépondreSupprimer