jeudi 7 juillet 2011

العشقة


العشقة الي في نور الشمس ما ضواتش راهي ما سواتش
العشقة الي ما جهرتش يقرب وقت وتبكيها و ياريت ما هجرتش
العشقة الي من مدينة لمدينة ما رحلتش و شوالقها ما لمّتش، عشقة بُخْلِيّة و ما تتحمّل الثنيّة
العشقة الّي ما بكاتش و ما غصّصتش عشقة مرويّة بكلام الرّاوي الكذّاب تولّي أزليّة
العشقة الّيها فيها قانون و الّي كان بالشيخة تكون عشقة تعيش كان مع المجنون
وعشق المجنون في بلاد الاعباد مجون و انا وين و كيفاش نحيا و نكون اذا قلبي ما نخون
و نروّح بيه قلبي في يديّا خايقة عليه مالثنيّا
يبكي و في الشارع يفضحني و يطلع عياطي و يفضحني
و يسمع العالم و الحبيب هايم ماهو عالم الّي هو كيف جلّ الحبايب ظالم
و تروّح فيّا البنيّة الكحل سايل بعد ماكان ملهّب عينيّا
و تتنكس اعلامي و يضيع العالم من قدّامي و نقول : يا ريتو قلبي عليّا برّاني !
عذّبتو معايا المغبون ، هرّيتو و هو مايهون
هزّ قلبي في قلبو آلاف الاعباد و انا مولاتو ذوّقتوا الشوك و حرمتوا مالاعياد
شلوحتو، شلفحتو على قياس حلماتي كلّ مرّة قلبي لوحّتو
و لانهار هان بيّا و لا ههنت عليه و سكت و خلاّني ذكرى تُحييني و تُحييه
يا ناري على قلبي هبط رماد لا دفّى مولاتو و لا ناوي يشعل للاحباب
ياناري على قلبي هبط ريش و ياريتو هبط مطر و لاّ حشيش
اذا ما زيّن التصويرة راهو نفع امّاليه
العاشقة الّي ترى حبيبها بغيرها ممحون حبيبة بكذبتها و الكذبة ساعات رواية من احلى ما يكون
واذا روّحت بقلبك بدمع عينيك سكروان ملوّح اعفس عليه القلب تو ريحتو تفوّح العالم و الكون بريحة حلمة اسمها : عشق و مجنون !!!
اذا تلوّحت على القاع تتصرّع جواجيك في فمّك و فمّك بالدموع يفيّع
اعرف الّي قلبك صايع و يضيّع
يا هازّة الاعمار، يا فانية الازهار، ياليل بلا نجوم، يا ظلمة و بحر دموع و شمعة و دحسة ضلوع، يا مبكيّة الامّات، يا عازفة الليّعات، يا مبيّعة اللّيرات على كفن الحيرات يا موقّفة الاعمار، يا مطيّرة الاطيار يا قاهرة الاحلام !!! يا مـــــــــــــوت !!! قدّاش من مرّة ناوية قلبي تُقتلّي و تهزّوا لسماك و تحرّرني ؟؟؟ قدّاش من مرّة ناوية على هبالي و ضحكي عليك تفدي الثار؟؟
زعمة نلقى الوقت يا قلب و ندشّنلك ساحات ؟؟ و نسمّي بيك الشوارع و نصوّر بيك لوحات؟؟ و ندفنك تحت الزيتون خلّي يذوق نهار الحبيب زيت القلب الّي ما يخون؟؟؟ و لاّ نرميك زرّيعة و تطلع عالكيّاس و تولّي  في عينين فرخ صغير طلّيعة ؟؟؟ حرّيقة ولاّ بوقرعون؟؟؟ و لاّ حشيشة و مايهمّوا آش تكون ؟؟؟ نعملك على قبرك يا قلبي رخام و لاّ تاكلك العصافر و تغنّيك مع الفجر انغام؟؟؟
قلبي عاشق الواطي حاقرني، يخمّم في بالو سعدو قايم و فيه يصون، يكبّوا نيّة المغبون لا يعرف يفّرق شكون يحبّوا شكو بضحكة يسبّوا لا يعرف لاشنيّة لا شكون مايعرف قلبي كان قلبو يتبّع : قلتلكم مجنون !!!

2 commentaires:

  1. impressionnant...très touchant!

    RépondreSupprimer
  2. Bent Trad, depuis un moment silencieuse, muette, ou simplement épuisée (comme s'épuisent les cartouches d'encre et de sang) , même si vous semblez -pour les autres- parler . Où est passée votre plume/voix ? Qui a son secret ? Quel vent pourrait la nous rendre?
    On s'ennuie de vous .
    (une lectrice qui vous suivais depuis les débuts, en silence -justement- et qui sens que vous lui êtes proche et précieuse . )
    H

    RépondreSupprimer