تونس : ـــ شبي بنتي تبكي ؟
شكون ضربك ؟
شكون دزّك ؟
شكون على الدموع لزّك ؟؟
أنا : ــــ ما بيّا شيّ
اخرج عليّا
اخرج منّي
سحابة و تتعدّى !!!
تونس : ـــ سحابة ؟؟
تي هاي دموعك مطر
مغطّيتك للشطر
قلبك تغمر !!
أنا : ـــ ما بيّا شيّ
ما بلاني شيّ
ماعندي شيّ
تي انا حتى شيّ
تونس : ـــ يعطيه الكيّ و هو حيّ
الّي بكّاك
الّي طعنك في ضلوعك و ما دفّاك
قلّي شكون قلّي شبيك تو نورّيك !!!
أنا : ـــ ورّيني 6 شهر و أنا نستنّى
تخرج إنت للضوّ
و أنا نتهنّى
تلبس الحايك
و تلبس الحرير
تشدّ ثنيتك
و تترك السرير
تونس: ــــ شبي بنتي لاباس ؟
عندك السّخانة ؟
شبيك تمتم ؟
تكلّم عمرك في كلمتك ما تسلّم
احكيلي اشكيلي ابكيلي !!!
أنا: ــــ نحكيليك : كان يا مكان في قديم الزمان
عهد الامان و شعب حافي و عريان
كلمتو تاكل مالزبلة جيعانة
وكان عُطشت تشرب مالڨلتة فرحانة !!!
كان عهد الاحباس تتقطع فيه الانفاس
ما كانوا يعرفوا مالشمس كان حريقتها
لا عمرهم ذاقوا لا رمّانها لا دڨلتها
ما كانوا يعرفوا مالمطر كان غريقتها
لا ذاقوا شعيرها لا عجنوا قمحتها
كانوا يخرجوا الزيتون و ما يعرفوا منو كان الصابون !!!
تونس: ــــ نعرف ! نعرفها الحكاية : نار هبّاية !!!!!!
أنا: ـــ كيف تعرفها و أنا بنتك علاش ما قتليش ؟
تونس: ـــ من قلّة الحكايات ؟
اخترت اصعبهم عالحياة
حكاية بها الشعوب الكلّ تكوات
و في بالي بنتي أميرة
و هي الدنيا غلات
في بالي العصافركيف هجرت شوارعي
سكنت فيك
و في بالي بيك كبرت
و مرا صرت
و خلقت نجومك و بيهم ضوّيت لياليك
قلّي يعيّش بنتي اش بيك ؟
مسرحية الحياة بين الكلام و اكلام/ فاصل دموع
أنا: ـ ما بيّا شيّ
اخرج منّي
اخرج عليّا
سحابة و تتعدّى ؟
تونس: ـــ سحابة؟؟ و تتهدّى !
بنور الشمس
تو تشوف
و يطلع قوس قزح
و نوّار بو ڨرعون
و حتى الفرطتّو تو يصون !
ما تخلّي عيش بنتي غير النور فيك يكون !
صحيح انا ولدتك
اما ولدت معاك الظلام
في بالي بش يحلى المنام
نعرف كبر و لبس كبّوس
ولّى راجل الظلام و لّي كابوس
ولّى بعد الاحباس حبّاس النفوس
انساه و سكّر القُوس !!
أنا :ــــ هدّيتني بعد ما بالحلم مليتني
عطيتني حبيب كلني كيف جاع كالذيب
عطيتني صحاب غبرو في بلاد العكري كالسحاب
هوما عليهم المطر و انا قلبي عليهم تنحَر
عطيتني جواجي و قطّعتهملي
عطيتني عينين و ما شريتلي الكحل
ياخي كيف الوقت شراهولي سال و ذبل
عطيتني ڨمرة و نسيت النجوم
نلوم عالمدينة و سكّانها و لاّ عالليل نلوم ؟
آش عطيتني ؟ علاش عطيتني ؟
عطيتني قلب فنيتو عليك
شاب و ما تاب
و غدوة ياقف و ما كتب الكتاب !!!
خرجت تونس
سكّرت الباب
قعدت انا في العذاب : لزّيتلها وجعتها ؟!
خوذ كلام الّي يبكّيك
الّي اليوم بالخير واعدك
غدوة ناوي يفليك
وكان لقى فيك عنقود عنب يطيّشو و يسبّ
وكان لقى فيك الشعير يبزّعوا و يفزّع عليك الجيران
وكان و كان و كان ياريتو بالامكان نحكيلك كلّ شيّ
امّا وقيّت دموع يضويو في ليلي شموع !!!
Ahlala ! C'est poétique :)
RépondreSupprimerMerci pour ce moment, Bent Trad :)
si tendre et si douce . Continuez
RépondreSupprimerTu étais magnifique sur RTCI . Tout les problèmes que tu as mentionné vont disparaître au moment ou la religion se met en question. C'est le manque sexuel qui implique le sexisme. Merci d'éclaircir ça dans tes écrits . Et encore, que la beauté te protège . Merci de tout nos coeurs.
RépondreSupprimer