شقّان الفطر

مشيتلها

تبعّت خطاويها

فارغة، خالية من امّاليها

ساكتة

تستنى في صمتها تتمنّى

في هاك الوقت شكون يزورها و شكون يلهّيها

ريحتها : ريحكة كانون و مرا تنشر في صابون

و مشموم معيّن يستنى في شقان الفطر في بركون

شوارع خالية

و انا نتخيّل

انا نتبسّم و هي تميّل

عبّاوها بزبلتهم و تركوها

لا صانو تركتهم و لا نهار بش يحبّوها

جرايد، اوراق، شكاير بلاستيك

يا مدينتي معاهم شنوة التكتيك ؟

نصب، الميزيريا في الشوارع قبب

و انا هايمة لاعرفت نحبّ لا عرفت نسبّ !!

روايح منتنة طالعة مالحيوط

وكان تهرب مالريحة تطيّحكك الزيوت

ملاها مدينتي من هجركم العنكبوت

امّا الحرّة عمرها ما تموت

شدّت على يديّا

و هزّتني في ابهى ثنيّة

تحلّتلي و عملتلي هديّة

و هزّيت عينيّا للسماء

مقوى غزرتها يعطيها عزاء

رخام و فايونس و توارخ مرشومة

يعطيها الذاكرة قدّاش مشومة

مشيت في باب سويقة

شعلت في الجواجي حريقة

بلاصات خاربة و ناس عايشة في الشقوق

و سقوفات طايحة و ناس ما خايفة الموت

جرابع تتناڨز في كلّ تركينة

و قالك من سمة البلاد ياسمينة !!!

المدينة العربي

قهواجي يسربي

ريحة كانون

سرّ و كمّون

شوارع المدينة ولاّت سفينة

و رحلت بيّا لباب بحر

يا واللّه زهر

صبّت المطر

جاني الخبر

المدينة ليك شوارعها ثنيّة

هيم فيها تعرف البقيّة !!!

المدينة حوم و لاّت خيم

في باب بنات اعتصامات

مقتضيات الحركات !

قالوا ثورية !

يا ناري فيك و يا نارك فيّا

زعمة الكلّها ناوية عالحريّة !؟

بلاستيك و شكاير و كرظونة

و اتلال و جيش و عصافر ممحونة

و عييت و قعدت في ساحة الحكومة

يلعن بو الحكومات و خططهم المرسومة

آش مدخّل الحجر في الكلب الّي غدر

في الحبيب الّي هجر

المدينة عزوزة

شقوقها هوما جلودها

حفرها هوما جدودها

و زبلتكم هي خيانتكم !!

الّي عالحيوط بال وقال : هبال !

الّي عالحيوط كرطش و قال: فوشيك !

الّي عالخيوط مخط و قال : خطّ !

الّي عالحيوط بصق و قال : خمج فينا لصق !

الّي عالحيوط بات و ولّى مع حشيش حجراتك نبات !

الّي عالحيوط لصّق حبيبتو و ضربها و قال مقحبها !

الّي عالحيوط لصّق حبيبو و باس و قال لاباس !

الّي عالحيوط تكّى و بكى و تخنق و قال : غاز !

الّي كيفي على حيوطك كتب من غدوة تفسّخ و تسبّ!

يا مدينة يا هايمة

عنّقني اعشقني لا انت و لا انا عليك صايمة !

شقّان الفطر

نفذ الصبر

اخرجوا بخطاويكم آلمدينة زهّيو

غنّيوا و باصواتكم المدينة عالحزن لهّيو !!

سيّبوا دياركم و اهبطوا للشوارع !

المدينة مع الخوف وحدها تتفارع !

يذّن الامام و يتخبّى المشموم

وجنوب بلادي بهمّو مهموم

انا في القصبة و وجيعتي في بقايا نصبة

هو يكبّر و انا في روحي نصبّر

الّي يقاتل و المقتول يخمّموا في شربة و لاّ في صحور ؟

خمّمو في قهوة و لاّ في بخور ؟

آذان ...احزان... قلبي بهالمدينة مليان ...