الجواجي تحرقوا
الكلمات مع الدموع شرقوا
غصّة في القلب
غصّة في العينين
الدخّان فيّا شاعل
و النّار ويــــــــــن ؟
في الحلمة الّي كيف تولدت ما عيّطتش
في الحلمة الّي كيف عيّطت ماعاشتش
كالأمّ الّي فقدت كبدتها
و كرشها قعدت تفكّرها بوجيعتها
كالبو الّي يلوّج على دفينة
بش يلقى لكبدتو قبر
يا ريتني انا موش انت يا حلمة الخبر !!!
الجواجي تحرقوا
هبطت الدموع حشيش و ريش
وولاّت الثورات ريق و تقطيع و ترييش
و رجعت الثنيّة حالة عاديّة
الّي يفيّش بانتماؤو لحزب يڨيّش
والّي ينبّر و الّي عل خاسر بكلامو يغبّر
و الّي مقهور لاعارف لا يطيح و لا يثور
ولا عارف ينسى و يروح و قبر الحلمة يزور
رجع التعب بلا حتى سبب
و رجعنا لقلّة النوم
و للصباح الّي بالشمس و لاّ بلابيها مزموم
كيفاش الّي حلم في عزّ النهار مازال يجيه النوم !؟؟
يا أبو القاسم الشابي الجواجي تحرقوا
و هرب بينا القدر
و نشدّوا في الحلم لا ينتحر
و يعيش في البلاد كلّ من خانها
و ليوم فيها بالقهرة يموت كلّ من صانها
و الوجيعة تقول خيّال فينا تعفس بحصانها
يا الفاضل بن عاشور الجواجي تحرقوا
علاش دينهم هابط علينا ساطور
علاش نساو الّي القرآن جنّة و كلّ ماتتمنّى قبل حياة حزينة بين القبور
علاش، شبيك ماكش مع الشيوخ الّي يقراو فيهم ليوم الفروخ
يا فرحات حشّاد الجواجي تحرقوا
تعددية نقابية و المصيبة هي هي
و الّي البارح قتلوك ليوم يحبوّا يعاودوا يدفنوك
امّا ماتوا بعدك عباد و ما نتصوّر نهار الفرحة تدخل ديارهم في الاعياد !!!
يا الدغباجي تحرقوا الجواجي
اجري لذاكرتي الحلم يلاجي
يولول تقول مهبول
اجريلنا و حيّر التاريخ
خلّيه هابط عالجهل قنابل و صواريخ
يا الدوعاجي تحرقوا الجواجي
و تهدّ علينا السّور
هايمين ضايعين كالبكّايات بين القبور
لا عاد قارين لا الكتب لا بين السطور
و كيفاش تحبّ الفنّ و العشق فينا على الشقاء يثور ؟
الجواجي تحرقوا
و في الدموع غرقوا
و الليالي البيض تسرقوا
و الليالي السود بينا شلقوا
منارات فنارات ضوّينا عالبرّاني
و اليوم القلب الشاعل المحروق يعاني
و يخممّ ويقول "كيفاش و أنا رماد نعاود الاسطول ؟ "
Aucun commentaire:
Enregistrer un commentaire