هزّ ...

هزّ

بعّد شوالقك عليّا

هزّ

شبي صوابع يديك في عينيّا

هزّ

شبيك بزاقك يشللّ فيّا

هزّ شبي لحيتك كاشة عليّا

هزّ

ماو لاباس تدافع على ربّي و هو في جواجيّا

هزّ

ربي كبير و غفور و رحيم

كتب شعر ولد احلى مومنين

شبي قرآنك و لاّلي محاكمة غير شرعية ؟؟؟

هزّ

ظلامك و كلامك، هابط نور الحرّية !

هزّ

عينيك عليّا، بدني موش مسرحيّة

هزّ

خلّيني بعد 23 سنة قهر، نعزّ البشرية

هزّ

حتى كلام الشعر لخنتابة كيفي عندو قدسيّة

هزّ

راني مرا تونسية

امّ و مرت الهمّ

حبيبة و مالناس تتذمّ

كان بدات بعشقها مبليّة

هزّ

استعواذاتك و تغفيرك كان ريت كحل عينيّا

هزّ

جنّتك و جهنّكم و اعطيني حلمتي المرزيّة

هزّ

اكحلك و سود الغربان

جيفة قهرتنا كاسيها الذبّان

ريحة موتننا تعطرڨ في قطر و عمّان

هزّ

تاعبة مالدنيا و من راس المال

آش تسوى الدنيا كان يزيدوا يهربوا عليها الالوان

هزّ

يا ولد بلادي سيفك و قبل ما تغرسوا فيّا

اغرسوا في ظلام المخّ الاسود و القلب الحفيان !

هزّ

عييت مالخوف و مالدزّ

هزّ

نحبّ نسكر مع مدينتي

و نهزّها من يدّها و ندوّرها في جنينتي

هزّ

غنّي النشيد الّي غنّاه الشهيد

اشهد عالعلم احمرو من دم

ابيضو دموع لمّيمة

هزّ

سلاسلك السماويّة

واخلاق العبيد التحقيرية

هزّ

نحبّ نحبّ الحريّة

نحبّ نحبّ بحريّة

نحبّ نحبّ

نحبّ ...

هزّ

نحلم نلعب موزيكا في المدينة العربي

من غير ما يتمنيك حتى كربي

نحلم نكتب كتاب

و يتقرى و يتنشر و يتباع

و يولّي الكتاب فنّ و ابداع

نحلم نهار نشطح و نغنّي على الكيّاسات

و ننسى المأساة و نشدّ من حزامها الحياة

ندوّرها و تدوّخني

و كان وقفت عالشطيح

تصيح و توبّخني

هزّ

نتمنّى في برشا حكايات

حكاية فرخة و عروسة و بيسات

و روبةّ مقطّعة مالغمّيضة و التكربيسات

حكاية هربةّ في جبّة ممّاتي كنكرّد الولاد بحجيرات

و حكاية تشنشينة فرادي : "ابعدوا لغادي !! "/"شبيهم على بنتي ؟"

و بنتها شيطانة وراء ضحكتها تخبّات

تحلّت ظفيرتها و ذاق شعرها بنّة النسمة و الحياة ...

هزّ

نحبّ نرجع مرا زعبانة

بعينيها تخلّي الروح عريانة

نحبّ نشعّل النار في عينيّا

و كالفرططّو الحبيب يموت فيّا

نحبّ نرجع بقلبي نقلول فنّي

و تجاوب النّجوم في مرقدها "ياللنّي !!"

نحبّ هبلة و عشق و بوسات

و تعنيقة تطرشق فيّا الحياة

نحب يدّ نشدّه تعرق و ما تجريش

تسري كريحة نسري و الحبّ يزيد !!

هزّ ...