البوست هذا مجموعة من الاحساسات لمّ بيناتها : العشق !!!!
في بالكم الي مازلت نحبّكم؟ مهما الدهر كبّكم وقت القمع كنتو انتوما احسن سمع منعّتوني من روحي من جروحي !!! نحبّكم مهما تخالفنا و شكونهم الاحباب الّي ما تعاركوش و الّي بعد العرك ما تحابوش !! نحبّكم مسلمين ، نحبّكم شيوعيين، نحبّكم فوضويين، انتوما اصلي و انتوما امّالية و فمّة واحد باع اهلو و لقى ثنيّة ؟؟؟ مهبول يكذب عليكم و عليّا !!!!
نحبّكم بلحيّكم، بمطارقكم بمناجلكم، براجلكم و بنساكم الّي هجروتوا ، نحبّكم بلا سبب انتوما الصباح و المساء و الاحد !! انتوما بلا بيكم البلاد رعد !!! و هاني ريتها و هاني في هالساعة مالليل شريتها البلاد المخلّطة المجلّطة الّي بعشقكم ليها رغم اختلافاتكم عالعالم متسلّطة، انتوما ثورة الياسمين لا انتوما ثورة الثائرين و الشعب الحيّ الّي ما اختار ينين و رغم احترازاتي بالوانكم بلباسكم باطيافكم منّي ليكم : عشق كبير !!!
نحبّكم و ينعبوه الطاغية الّي على عشقكم صدّني : نسكر و انت صلّي : اضربني !! اما قلبك يجي نهار و يحبّني !!! تصلّي وهي تعرّي اما يجي نهار بيناتكم عشقة تجي تسري !!! كان تعرفوا قدّاش من مرّة قلبي نقّبت و غطّيت راكم ليوم كيف تراوني سكرانة شايخة تقولوا: بنت بلادي حيات و انا معاها حييت !! كان تعرفوا قدّاش من مرّة ركعت و صلّيت و تبليت و كيف جاني العشق وقفت و كيف الرّيح هبّيت !!
عشق ربّي كيف عشق عبادو و الرحمة من اولادو و كان هو خلق: شعري ليه نطق دمّي ليكم ماء و اشربوه و حللّوه كان فيه الشفاء انا منكم و انا ليكم و انا آش نسوى بلا بيكم ؟ انا بركة مرى حرّة بعد ما قرات الشعر ما قبلت تكون عرّة و تمنّات تولّي صرّة تتولد منها مرى اخرى حرّة تتهزّ عالرّوس كيف الجرّة : جرّة ماء تسقي و تهدّي الداء و راهي هيّا نوّارتكم شاهية تزهّي جنينتكم و عمرها ما خمّمت تكون عدوّتكم اذا انتوما قلتوا لعمى المخّ: لا!!
كليت الفلقة والعصا و البزقة و انتوما في الحبوسات تحبّوا ليوم نولّيوا عايشين الكبسات ؟ ميسالش اقتلوني اذا تعرفوا عصافر الشوارع تنساني و الجبّانة كيف تقبلني ما تنعاني ! ارجموني اذا نساوني احجار المدينة الّي سمعوا هوما دقّات قلبي في كلّ تركينة !!! انا لحمة و بلادي السكّينة و نموت انا وما تعيش تونس مسكينة !!! تونس شامخة لا حاجتها بهيبة و لا بقروض مادام عشق شعبها ليها في الصلاة و في المسرح و في درج الكليّة معروض !!
Aucun commentaire:
Enregistrer un commentaire