لمّة تطير الغمّة

لبس الدنڨري و المظلّة

فوّح بضحكتو لوّح

شرب قهيوة عربي و صبّ فيها الزهر

و غزرلي في عينيّا و استدعاني على ثنيّة

هزني للواحة، خلّى الدنيا دوّاحة

حكالي عالنخل و تغنّالي بالحنّة

رجعني طفلة صغيرة

هايجة، مالكتها التنطيرة

نسّاني في كبري و شيباتي الاوّلين

رجعّلي الحنين ...

و روّحنا للدّار

انا و عزيزي زوز فروخ صغار

خفاف و في يدينا قفاف

دڨلة و رند و رمّان

بالنا زاهي و القلب مطمان

و جات ممّاتي تتكعبر كالغشّيرة

تتهنّى عليّا فرحانة و لاّ لا ؟؟

يا حسرة آخر مرّة سألوني هالسؤال كان بعد عزى !

و حطّت عالجمر بخور و طلع مالكانون غناء مسحور

و تملاو بالدمع عينيا قداش من عام نسيت هالثنية

و هي الاقرب من جواجيا ...

و قعدت عالجلد و غنّات :

" يا رمّانة يا رميمنة ..."

ومعاها الزهوة بدات

و تعدّى الشايب الكبران : مش بش تطيّبي الغداء ؟ "

جاوبتو : " وبرّة ليلة ماكليناش ؟؟؟ "

عندها الحقّ من مدّة روحي ما شبعتش !

ممّاتي يقولو تتحرّك بالسّيف

امّا العزايز يتحرّكو بالكيف

هزّني النوم تحت النخلة

قمت نلقى الطاولة منصوبة

و النجوم عاملة حفلة ...

نحبّ نكمّل عمري فلاّحة

نحكي مع نخلة و انا مرتاحة

نحبّ نبعد عالمدينة و عبادها

مزيّفين، مجيّفين عالهمّ دازين

نحبّ نزرع الحنّة

في يدين عروسة تتهنّى

نحبّ نشمّ ريحة الارض

هي الاصل، هي الفصل، هي العرض ...

جاء وقت الشيشة

و كاس التاي المنعنع

و حلّ الشايب الراديون

فدّ ظاهر عينو في امّ كلثوم !

اما هالايّام الراديون مسموم !

جبتلو "امل حياتي" ملّي في باب سويقة

كان عاملها عشيقة !

تبسّم و جبد نفس هو نفخو و الوقت حبس !

تفكّرت و انا عمري ما ريتها ...

امّي بظفيرتها دايرين بيها اخوتها

يسمعوا في الراديون و غادي يبدى و يوفى الكون !!