نحبّ نكون...

نحبّ نكون نجمة في سماك

نحبّ نكون :

صحرتك و ماك

خنقتك و هواك

خريفك و شتاك

نحبّ نكون وردتك بلاشوك

نحبّ نكون نارك بلا حريقة

نحبّ نكون كاسك و نسقيك

نحبّ نكون غناية تزهّيك

نحبّ نكون كتاب يلهّيك

نحبّ نكون ساعة من نهاراتك

نحبّ نكون بلادك كالبلاد ترميك

نحبّ نكون ماضيك اذا الحاضر موش راضيك

نحبّ نكون اللون آلّي في عينيك

نحبّ عينيك ... الّي ما يراونيش

و كان راوني ما يتوحّشونيش ...

نحبّ نكون الغطاء الّي يدفّيك اذا بردت الدنيا عليك

نحبّ نكون شمعة و نضوّي ليلة من لياليك

نحبّ نكون حكاية تحكاتلك و سكنت فيك

نحبّ نكون ياسمينة و انت متعدّي نفوّح عليك

نحبّ نكون طفلة صغيرة تضحكلها اذا عثرت في خطاويك

نحبّ نكون كيّاس تشدّوا اذا هوني تخنقت الانفاس

نحبّ نكون فرطتّو في النار ترميه اذا ما تلقى وين تحطّوا

نحبّ نكون تصويرة هاززها معاك في كلّ شيرة

نحبّ نكون مسيرتك الغير مرخّص فيها و الزدمة متع الدمّ في عروقك

نحبّ نكون هاك الزربوط الّي عليه سوايع شدّيت الحومة و الحيوط

نكذب عليك ما نحبّ نكون شي

نحبّ نكون نسمة و يدزّوها الارياح

نحبّ نكون نوّارة مطيّشة في جبل

نحبّ نكون حوتة في البحر

نحبّ نكون المطر

نكذب عليك ما تخافش ما نحبّش نكون

و لاّ ما نحبّ نكون شي ما تخافش

نحبّ نكون نوتة متع موزيكا مسامحة في السيمفونية

نحبّ نكون نار شطحت عليها غجرية

نحبّ نكون آثار مازالت مالقاتهاش البشرية ...