يا عيني عليكم ...

يا عيني كيف تجيو لبالي تزهّيو الليالي بدمعتين و برشا حَنين ... مشتيو و خلّيتونا حيّين مكويّين لانا عارفين نشطحو و لا على قبر نهّبطوا دمعتين ...
 يا عيني كيف وجوهكم تتعلّق فوق حيوط دموعي و تدفّي ضلوعي الباردين !!!  شهداء نحنا بيكم اوفياء ... انتوما الشمس و انتوما الماء بلابيكم ما ثمّاش لا وطى و لا سماء .. انتوما كفن دفن العفن و انتوما التراب و روح الوطن .. لا شعارات و لا استثمارات انتوما الصوت و العياط روّضتوا السياط !!! ...
 يا عيني كيف النوم يهجرني و حبّي ليكم يحيّرني و من سكرتي يفيّقني و نلقى روحي نهوم بين القبورات الوجه الآخر للثورات نلوّجلكم على فقرات قادرات على تفسير الخنقات و تحويلها لقرارات شعرية ثورية تحررية ما عندها حتى قضية كان البشريّة !!
يا عيني كيف نسمع فيروز و مالشباّك نستنى نراكم في نوّار اللّوز .. نحبّ نراكم توحشّتكم ! نحبّ نراكم و نعرف باش حاجتكم !! بالذكرى و لاّ بالفكرة و لاّ بصوت يقرى في قصيدة هاربة عليه كان حكات على ليوم خايفة من غدوة عليه !!!
 يا عيني كيف عقاب الليل تمهمشوني و تفكّروني فلّي فات وماعادش يرجع و فلّي كان فينا يقمع و ما ريتوهش ليوم يقبع في المنفى و الشعب ثاير فرحان !!!
ياعيني عليكم يا الحيين يلي فيقتوا الاحياء ــــ الميّتن !!! في لبلاد ثمّة مسيرات لا تاشير و لا استرخاصات !! الاحزاب بعضها مرخّص واغلبها ديما  مرخّس اما انتوما ادرى !!! في لبلاد فما صراعات فكرية و ايديولوجية مازالت ما شدّتش الثنية اما عندها القابليّة !!!
يا عيني عليكم كيف تهدّوا عليّا و تتملّكوا صوابعي و حباري و عينيّا تسيّلوا الكحُل و تفتّحوا الكلام على الاوراق نوّار فلّ يفوّح الغلّ و يخليه مالشبّاك يطلّ و يرى نوّار اللوز و يسمع فيروز ويتفكّر الّي فينا الكنوز !!!
يا عيني كيف فيّا تطلّوا و الخوف فيا تذلّوا!! تهدّوا الإلهات و تحلّولي السماوات و نتفكّر الّي بيكم الزيتونة و الكرمة حيات !!
يا عيني عليكم ...

اهداء لرفيقة و صديقة غادرتني قبل عامين و ثورة !!