mardi 29 mars 2011

بنت طراد و شيت ليبر حبّوا يحكيوا .....


 احكيلي ما تشكيلي خلّي كلامك فنّ تشكيلي !!


 نحكيلك من ورا البيبان، من غير ما إناديلك ، نحكيلك حكاية الانسان


الانسان الّي في عشقو خرّج قلبو عريان !!! و لا خافو يتبلّ ولا خافو ڨرسان احكيلي يمكن نطمان


منين نبدا الحكاية ؟ أنا ناس نساتها الغناية ، عشقت السكات ، لعبت بالكلام ، تكلمت ، تألمت، وما قالتش . بردت و ما حكيتش . نجي عندك نتخبى ؟ تحكيلي عالمحبة ؟ تقلي زعمة علاش ؟


و انا منين نعرف لعلاش و لاّ الكيفاش ؟؟؟ انا نعرف كيفك ، يمكن، كان اللّيل الڨرّاس الّي في قسوتو على كرايم العشّاق عفّاس !!! اما كان تحبّ تجيني ايجا و جيب كلامك فاليجا اذا ڨرسنا نعملوه غطى و نتخبّيو بيه عالسماء !


نبداو الحكاية بريحة النسري ، نصبلك قهيوة تنسي ، والزهر في روايرينا خليه يسري ، اسمعني :

نحكيلك على الفليجة ، معبية أسرار الترهويجة ، فيها تصاور أبيض أسود ، فيها نصدق وفيها نكذب ، نحكيلك :

نحكيلك على عشيري ياسر :

في دشرة منسية ، عاش ياسر ، ومات ياسر . وفي قلبي قداش ياسر حي . ياسر الأبكم ، فهم الدنيا على بكري ، بلع لسانو ، غار على كلامو ، ما عطاه لحد . يقولوا عمرو ما تكلم . وياسر ياما تألم . جاء من بلاد بعيدة ، حد ما يعرف أصلو ، وكل واحد فصللو قصيدة . ياسر يتكلم بالتنهيدة . تغزر لوجهو تهزك التفرهيدة . حطيتو قدامي ، نعرفو مش كيفهم ، كيف نشكيلو، يفهم إلي بيا . قتلو :

ياسر خويا ، نعرفك تسمع فيا . إلي بيك راهو بيا . ما نعرفش حكايتك شنية ، أما نعرفك كيفي ، طوالت بيك الثنية . آش تهم الحكايات ، التفاصيل تتغير ، والمحاين هي هي .

فتكلــــــم وتألـــــــم ولتمــــت في الكلمات ....
 
يا سر كلام في الظلام و يا سر الظلام غماق للي راقد و للي فاق !! لاعاد نور و لاعاد آفاق ما تلقى كان المشتاق !!

المشتاق لغزرة و دموعو غزيرة !!! المشتاق لكلمة و كلمتو اسيرة !! المشتاق لحلمة و هو الحيرة !!


ولقيتك فهمت الحكاية ، من غير ما نطول ، ياسر هاو حذاية ، ساقيه مزروعة في التراب ، حذا راسو نبتت شجرة غريبة ، من هاك النهار تضلل علينا ، كيف ما نلقى شكون يفهم كلامي ، نمشي لياسر ، شجرتو تعرف تجبر بالخاطر ، وكيفها كيف ياسر ، من غير ما 
 تتكلم ، حنينة .

4 commentaires:

  1. مرا ، حبوا يعملولك لجام ، سلاحك ماهو طلامس ، سلاحك كلام موش كي الكلام ، جاء مسود الافام ، رهوجتو مرا تحكي عالغرام ، حب يسكتك وهو ناسي ، إلي كلامك في قلوبنا ، مهوش من راسي ! كمل وخليك حذانا ! عمرها لا ربحت الطحانة !

    RépondreSupprimer
  2. aaaaaaaaaaaaaaaaaaaaaaaaaaaaa ktaltouna j'adoooooooooooooooooooooore quelle naissanece svp svp encore ltawa je chiale devant cette pureté man antom? man antom? :)

    (Asma)

    RépondreSupprimer
  3. قلما أجد متعة في القراءة باللهجة التونسية، و ذلك لكونها امتلأت بألفاظ ثقيلة في اللسان و مزعجة في الأذن و كريهة في الذهن. و لكن في هذه المدونة، استرجعت الأمل. هنا جمعت اللهجة التونسية بين رومانسية قلم جبران خليل جبران و حزن أفكار فكتور هوڤو و عنف موسيقى ريتشارد فاغنر. لك مني كل الاحترام و التشجيع

    RépondreSupprimer