العاشق الي ...

مشيت ليوم عالبحر شكيتلو بلّي هجر و بكيتو مالخطر وسّع بالو و سمعني و نسّاني فلّي ليّعني مسح دموعي من عينيا كيف موجتو هربت بيّا و دفّاني و غطّاني كي تراب الارض ماعاد اوطاني و سمعّني حسّ الغشّ في جواجيه كي ضربت الموجة الصخر و دخلت فيه كفّ و مشطة : ملاّ طبيعة ملاّ سخطة !!!

العاشق الّي ما بكاش ما حياش ... الي ماطارش عليه النوم عاشق مهموم ... العاشق الي ما ماتش في الليل الف مرّة عشقو ذرّة ... العاشق الي مالوجيعة مازارش طبيب عندو خيال و ما عندو حبيب ....

العاشق الي ما خان و ديما العشقة صان .... عاشق صنعو شكسبير و كيف نقراه كعاشقة جكسبير ... و الهوى ما يدخلش نتخنق ...قلبي وقتها يتمحق ، يتسحق اما العشق يستحقّ ... العاشق الي ما شدّتو الغصّة و هو هايم في الشوارع الي دمعتو ما مسحتش الكياسات عاشق متع ڨيترينات ... العاشق الي ما طيّبش قهوة مع الفجر و حرق صوابعو موش عاشق صحيح اما يحاول يعمل في المليح !!!

العاشق الي ما تخيلّش خيال حبيبو في كلّ بلاصة كالمهبول عاشق موش للعشق رسول ... العاشق الي ما قلبو تشقّ و هبط جير وياجور عاشق قلبو كنتول حجر مجرّد خبر في جريدة موش قصيدة تخلّي حبيبو يرعش كيف الجّْرِيدة ... العاشق الّي ما غنّاش " صحيح الهوى غلاّب" عاشق كذّاب و الّي م كمّلهاش ب "انا املي في حبّك هو الحبّ" عاشق يموت عالنْصُبْ : يشري و هو ماشي و يلوّح في شطر الثنيّة عشقتو البالحة المزيّفة !!!

العاشق الّي عقاب الليل ما بكاش و ما كسّرش الكاس عاشق عشقو عايش في احباس ... دازز عليها لاباس و هو اللاّ فيه مقياس : لا عينو ياكل، لا عينو يشرب، لا عينو يبعد، لاعينو يقرب، لا عينو يحيا لا عينو يموت و خايف مالموت تحرمو مالعينين الّي بيهم يتنفّس ... العاشق الّي ما ضاعش اعرفوا الّي قلبو ما طاعش و يعيش ديما بين البينين :

بيني و بينك .... لا عاد نسأل ... لا نقول فينك ؟؟

بجهلهم نافينك و يا ريتني منفاك !!!!

ليوم مشيت عالبحر و حكيتلو عالعاشق الّي هجر.تعرفوا آش جاوبني؟ ملاّ سخطة ملاّ طبيعة!!! :"احمد ربّي ما حرقش! ما يلزم عاشق على عاشق البقاء:العشق يولّي شقاء ما يفرض عاشق على عاشق اللقاء:العشق يولّي عصا .مايلزم العاشق عشيقو : يولّي ليوم صاحبو غدوة رفيقو و بعدو يولّي ما ثمّاش و عشقهم يولّي ما يحياش. ما يشدّ العاشق عشيقو : العشق يولّي حبس كابوس و تتمنّاو وقتها تفيقوا احمد ربّي ما حرقش و كلاه الحوت غدوة تنساه و تنسى الموت !"