لا عيّشوا!!!

لا عيّشوا إلي خان ! لا عيّشوا إلّي ما صان !! لا عيّشوا السمسار : كاري المحلّ، مهججّ الأعمار !! لا يعيّشوا الواطي الغبّار، بايع بحرنا جهار بهار!! أمّا جاه النهار إلّي الشيخة سكنتنا و النّوم هجرلوا الدار !! ما عينا في ثار، نحبوا على قرار طرد من جميع الأوطان !! نحبّوه 

 لاجئ من غير مخيّم و عليه الذلّ كي غراب مخيّم !!

لا يعيّشوا إلّي يحب يقطع عليك الهوى و إلّي يحب يسمّي عشقك زناء ! لا يعيّشوا إلّي ناوي يركب عليك و نسى إلّي شطر الهمّ مازال مَاليك !!! لا يعيّشوا إلّي يحب يمدّ يديه في جواجيك و هوما مقطعّين على ولادك و والديك !! لا يعيّشوا إلّي صحّح بش يناشد و ليوم ناشد التصحيح و خايف ينطق ثورة خاطر "موش مليح!!!"

نزيد:
لا عيّشوا الفناّن الجيعان إلّي باع هبالو بش يعيش مطمان و قتل في فنّو الإنسان! لا تعيّشها الكاميرا إلّي هبّطت عالعينين الخرا !! و يمحقها و يسحقها الغناية إلّي ما كانتش للحلمة مرايا و ولاّت جرّاية يتمدّوا عليها عرايا !!
لا يعيّشوا إلّي صوّر بلا عينين و صدّر عماه للتاعبين اللاّهين في اللقمة و قوت الأبناء و البنين !! و لا يعيّشوا إلّي قرى جملة موش كاتبها و كذبة موش مصدقّها !!

لا يعيّشوا إلّي دزّ الجزيرة و ساهم بسكاتو في تصنصيرة ! و لا يعيّشوا إلّي نهب ذاكرتنا و بلبز سكرتنا !! إلّي إستباح التاريخ، مسّخ، في بالوا بنالنا ،سايي، الضّريح!!!   و لا ترحموا، انتوما يا أحرار، إلّي سرقوا الأثار و محاوا قرطاج بش بناوا الديار!!

أخمج وأنتن مالإستعمار

لا يعيّشوا الممثل إلّي علينا مثّل أقذر الأدوار و ليوم خنانتوا سالت كي هبّوا الأحرار!! و لا يعيّشوا إلي ماشي في بالو محاكمة: نقد التاريخ هو أكبر مصالحة!! مصالحة بشرية ذات أفق إنسانيّة: لا تلوّج على منصب و لا زيادة في شهريّة !!

لا يعيّشوا إلّي نشر السخافة ودعم الخرافة، وساهم في بيعان الكتب في النصُبْ !!! لا يعيّشوا إلّي سمسر بالنساء و عمل منهم يا ملهى يا داء !!  و سوّق حقوقهم خدعة للبقاء و حضّر لكمشة منهم يا كارطي يا عصا !!

لا يعيّشهم و حتّى كان عاشوا ذاكرتنا بش تريّشهم !!!