هزّيت الريح

هزّيت الريح فوق اكتافي و طلّعت الشمس بين أطيافي و علاش بعد ما هجرت الحبيب ليوم في الأعداء نجافي ؟؟؟ ياريتني فوق تربة البلاد ابيات و قوافي ... مصيري بينكم صمود و حرايق و مطافي و انا الّي تحت القمع حرّة ماني في الثورة إنْجَاري !!
مشيت فوق السّماء كيف ماتحمّلتش الارض هبالي ... و ولّيت ماء المطر و نسمة الجبل العالي و مِالأرض للأرض لا سنّة و لا فرض ... و  لا قابلة بشكون يقدّملي قرض بش من غدوة نهبّط سروالي ... قد ما الارياح في الجبال حاملتنا و للسماء العالية هازتنا ... قد ما الوجوه القباح عالارض للطحين دازتنا ... و لا عاد عارفين وون تحيا وين تموت همتنا ماهو كان العقل يقول : عقم القلب هو علّتنا !!!
ولدت النجوم في ليل اكحل دامي و بعثت الكواكب من قدّامي ... و زرعت كالفلاّح في التراب الف معاني و فهمت الي ما يحبّ قدّاش يقدر يعمل بش الشعوب تعاني ... جمعت الحصى و الشوك من خيالي و سيّبت الريح و النوّار في بالي ... و مشيت للخلى و ما عمبالي بش كون يتفكّر و شكون يتنكّر و شكون ينسى ضحكة قلبي و دمعة عيني في اللّيالي ... انا المرا المترشّقة بخطوتها و متعطّرة بالفلّ و الياسمين هو حليتها ... متنسّمة متهجّمة عالجبل بقادومتها و الجبل قدّامها تحلّ و حشم لا يسكّر ثنيّتها !!!
هزتني الارياح و ما خانتني هزّتني لروحي و ما دزّتني ... قدّام الاحلام وقّفتني و بين الحياة و البقاء خيّرتني !! و باسم الرّبيع و دمّ التراب حلّفتني لا نهجر الارواح الصايعة المبليّة و كان ضاع الدليل : ريح الحياة في ظلامها ليّا ثنيّة !!