عييت ..

عييت .. بلحق عييت ... كلّيت، ملّيت و غليلي مالطاغية العربي ما شفيت ... يدوس فينا كالماكينة لاهامو اهلنا لاهامو آش قاسينا !! عييت و بجرايمو تبليت ... كلالي مخّي، نهشلي نومي و لياليّا، ضحّكني عليه وليوم نضحك على استخفافي بحماقتو الوحشيّة ... راني عييت : ريت العجايب وهو زايد ما تايب ... الّي عفّس و الي رفّس و الّب البدنّات غفّص و الجهامة هايمة مبهّمة ما قادرة تتنفّس ... عييت مالحاكم و الحكّام الّي كرطشوا عالحمام و يتشدّقوا بالامن و السّلام ... عييت و تهرّيت و من كلّ الانظمة تبرّيت : الكلّها بايعتنا و مكبّلة همّتنا و  كي تمرّدنا باعتنا عالدولار، عالآثار، على قواعد الاستخبار و نحنا داء العار !! عييت من خطابات التهديد و الوعيد و عييت مالخوف عاشعب الّي حقّو يريد !!! عييت و تعبت و دمعة ما سكبت و نكتة من بحر الغلّ ما كتبت !!!
عييت مالغنّوشي الاوّل الّي حكم و سكت و شارك و ليوم عالثورة بارك و الثاني الّي حرق و هرب و كي شعلت لنار في جلد البوعزيزي هبّ!! عييت ماللّجان و تقصّي الحقائق و الرشوة و الفساد و نحنا نتبّعوا ضاربنا الكساد : لا حزب و لا جبهة تمثلّنا ما فمّة كان تحالفات تعطّلنا !!! عييت مالجثث المتهاطلة و المخاخ العاطلة عن العمل، عن الامل !!! عييت مالدمومات ڨلت في الشوارع، و القنّاص البارع !!! عييت مالسياسة و من غياب الاخلاق فيها و عييت من كلمة انا على كلّ فمّ آش بش ينحّيها ؟؟؟؟ عييت مالمقالات في الجرايد و عييت من غياب الغناء و القصايد !!!! عييت مالراب و من تخونيجو و مالعباد كي يسمعوه كيفاش يهيجو !! عييت مالإعلام الّي نكّس الأحلام و متمادي في سياسة التبهيم ماشي في بالو مازال الشعب زكيم !!
عييت مالمفاهيم الجامدة الّي تبرّد القوايم و الّي تبرّك العزايم !! عييت مالخطابات الخشبيّة الّي تستنزف في الذات البشريّة قتلة فيها ايّ ابداعيّة !! عييت من بعض الاصوات الّي تجري و تلهط من ميكرو لميكرو، توصل للمحطّة و يفوتها الشعب كالمترو !!! عييت و ملّيت مالحملات الأناـ تخابية و نحنا مازالنا ما بديناش الثنيّة و غيرنا يحسب فينا في الصناديق الاقتراعية !!!! عييت، كلّيت، ملّيت اما من حبّ الحرية لا ني بش نشفى ولا شفيت !!!!

عييت مالخلط في المفاهيم : المسلم موش اسلامي و المسلم موش ارهابي و غيرهم لاهو طحّان لاهو كافر !! الشيخ موش بشيبو عاقل و موش بالضرورة خاطر ما قالش عقال امّا اكيد يحضّر في معتقل جديد للعقل و للّي عليه ناوي يحيد !!! يحضّر و هو ينظّر لديكتاتورية في شكل جديد : كلام منزّل مالسماء كيف يحكم في  الارض يولّي قفص حديد !! وعييت مالاطراف الّي من غادي تزايد وتزيد و تخوّن و تثوّر كيف العادة في النداوات من بعيد لبعيد !!! عييت من بدني خاطرو يتعب و عييت من تعبي نحبّو يبعد؛ عيت نحبّ الشعب بعد الهمّ شايخ و سعيد و نحبّ القصبة تولّي مطرح عيد للثوّار ، للاحرار !!!

علاش يسيل الدمّ بش يطير الهمّ ؟؟؟