مجيد كاڤوسيفار !!

الخبر الثاني : ابتسامة !!! تفوق الخيال ترعّش الربّ تركّع الموت !!! الابتسامة عندها اسم : مجيد كاڤوسيفار !! (ميسالش كان خبّشت الاسم اوّلا لأنو ايراني ثانيا لاني هالابتسامة ابتسامة الصمود و المقاومة )

يمكن موش برشا سمعوا بها الخبر لانّو قديم (ينعنبو الوقت و ينعبو اجندات قناوات الاعلام  و ينعبو والديا قدّاش نغزر لصرّتي و كأنّي عندي وزن في هالعالم المعفّط ) هالايّامات خرجت تصويرتو عالفايسبوك على صفحات بعض الاصحاب و شدّ انتباهي في التصويرة هاذي : الابتسامة ضدّ الحبل و انا حبل يا بو الربّ : حبل المشنقة !! ابتسامة للموت !!!! تهتّكلك قلبك، تفرّكوا، تفتّقوا من بعضوا!!!! السيد هذا روبن هود و ينعبو الصور المقتسمة و يلعن بو الخزينة الثقافية المقتسمة بين البشرية !!! السيد هذا تمّ شنقوا مع ولد خالو يمكن عمّو موش مهمّ تشنق مع رفيق دربو "حسين كاڨوسيفار" هالزويّز كانوا يسرقوا في البنو الّّي تقرض في المولاه الايرانيين الي كانوا يشريوا بنفس القروض هاذيكة نفس البنوك ايه نعم تظهر الجملة غالطة مفڨعصة اما هذاكة الواقع و بعد كان يبعث الفلوس للموظفين  في جوابات !!!!  قتل زاده رئيس المحكمة الي كان مسؤول على الحكم بالاعدام !! فوضوي، ثوري، مناضل ، سمّيوه آش تحبّوا !!! هو ابتسامة رعّشت الربّ، قهرت نظام وقلبت قلب ايّ انسان تفرّج فيها !!!!

قعدت نغزرلو ساعتين علقليلة و تفكّرت بوبي ساندس !!! بالنسبة ليّا بوبي ساندس زادة يمثّل تحدّي البشر للموت وتصوّرت الحكاية غادي تاقف و يوفى بعدو !!!! لكن لا لا يا دين الربّ لا !!! مازال الخير موش في مفهومو الامبريالي المسطّك لا في مفهومو الوجودي الانساني الّي ما وصلو نور حتى فلسفة ولاّ فنّ !! و كيف زدت غزرتلو دموعي هبطت و قلت لا اكتبلوا و نجح هالانسان، هالمواطن الايراني انّو يجرّي في عروق قلبي الحبار :

مجيد علاش تضحك، غيرك يشهق ؟؟؟ منين جاتك القوّة في سكاتك بعيد على حبابك و الدوّة ؟؟ تعرف قدّاش من واحد في الحبس الفكرة خان و انت معلّق في الموت كيفاش ضحكت عالحاكم الطحّان ؟؟

كيف ضحكت جاوك الملايكة و لعرش الربّ وصّلوك و لا خافوه يتكبّ كيف يشوف خدّامو كيفاش قتلوك؟؟؟  كي علّقو الحبل منين جاك الهبل ؟؟؟ و الضحكة كيفاش وجهك علات قتلت الّي قتلوك و روحك حيّات ؟ منين جبت الشجاعة و كرامتنا متباعة و منين جبت هالعشق و عشقنا للاوطان كاذب و نزق ؟؟؟

احكيلي يا راجل علاش يا دين الربّ ما خرجتش خبر عاجل ؟؟؟ كيفاش عليك ما قريناش و انت ودّيتنا بحلمة طفات امّا ما نساتناش ؟؟؟ كيفاش ماكش في كتب التاريخ وين دفنوك السرّاق الكلاب و شعبك نعاك و لاّ بالضحكة بكاك ؟؟؟ يلعن بو دين بوه الحرّ اّلي ينساك !!!!! و احمدي نجاد عايش باقي مع الاعباد و ضحكتك ساكنتو ولاّ نسّاتو في الاعياد ؟؟ مازال يحكم الطاغية وقتلي القلوب آذان صاغية : قوموا للصلاة اركعوا لضحكة حسين قاهر الموت ـــ خالق الحياة !!!!!!!! اركعوا للبشر الّي قدر و الّي وجهكم، وجهنا ستر !!!

قلّي كيفاش ضحكت من غير ما شهقت راك مخّي حرقت و ضوّيتلي الفكرة الّي مع التاريخ تبلات بتصاور التلافز و مقولات الثوريين الّي عملوا مالثورات مؤسّسات !!!

علاش ايراني انت و انا هوني فاقدة رفاڨي و جيراني : نسحب من روحي الجنسية ضحكتك أمميّة !!!

علاش ثرت ؟

من مدّة و انا هايمة و الستيلو واقف و المخّ واقف و القلب خايف ياقف عارف الّي بعدها كلّ شي ياقف ...
من مدّة الحروف تتهرّب منّي و ضايعة عليّا حاستها خايفة ملّي بش تمليه لياليّا، حاستها خايفة تجاوبني بالسّيف و تكذب عليّا ...
من مدّة و انا نتبّع، نكركر في جواجيّا ثقلوا عليّا و لا عاد فايد لا كاس و لا انفاس ...
جهامة تتحرّك و ماهي قادرة الرمّانة تفرّك : لياليّا هالايّامات ماليها سكات موش كيف السّكات !!! سكات الحروف و الابيات ، يشوي الاموات، يشوي الاموات !!!!
علاش ثرت ؟؟؟  كان بالك راك طرت !!
علاش تكلّمت؟ كان بالك راك سلّمت !!
علاش تفجّرت؟؟ كان بالك راك تأقلمت!!
علاش جريت و ما تخبّيت ؟؟؟ كان بالك راك بكيت !!
علاش و كيفاش ما زهيناش ؟؟
ثرت على خاطر في لحظة صرت عبد مع العباد يحلم يفرح في الاعياد
، ثرت بش نجّم غدوة نولّي و نزهى و نغنّي من غير ما الذلّ يسكنّي
 ثرت بش عينيّا تعنّق الشمس و السما و كحلهم يصوّر على الحيوط، حيوط المدينة العزوزة المسكينة الهايمة المسروقة الّي عقاب الليل مبصوقة،
 ثرت حبيت نراها بالالوان و تشطح على حافة الرّمل و قلبها عريان !!
ثرت بش تكثر في سمانا النجوم و ينقصوا الغيوم و تكبر الياسمينة و تخرج مالتركينة و تترمى على السور و تجبر الخاطر المكسور !!
 ثرت بش الكلام يجنّح و ارض الظلم يحرث و يفلّح و تنبت اشجار و تسكن اطيار !!
 ثرت بش ماعادش نحكي و حدي بش نلقى قلب حبيبي يسمعني !!
 ثرت علّي ياكل في الكاڨيار و ولد الحومة يزطّل تحت حيط و جيعان!
ثرت علّي يسافر الف مرّة في العام و ولد الحيّ ما لحقت ساقو سيدي الشبعان !!
ثرت علّي يسوق في كراهب بالملاين والخدّام يجري وراء كار عالفجر و هو هايم !!
ثرت علّي تبيع في بدنها و هدات قلبها !
ثرت علّي يكتب في الشعر و يبيع فيه بلاش في البيران بش يسكر و يرقد من غير ما يرى روحو معلّق في ثريّا !!
ثرت بش المرا تحبّ من غير من قلبها تتسلب و كان قلبها منها تسلب توافق و تقول وصلت لشطّ الامان !!
ثرت بش كان جبت بنيّة تعيش و ما  يهبط قلبها في النهار الف مرّة ريش بش كان عجبها حبيبها تمشيلو بعشقها تعبّيلو لياليه و تسكّن النجوم كالحمام في عشّ جواجيه !!
ثرت بش هيا تحيا و قتلي انا حييت و تكويت و بش هي تزهى و قتلّي انا تنبزت و بكيت و ثرت بش شعرها فوق اكتافها يتسرسب و زينها في الشوارع يمهمش و يكركب !!!
ثرت و الدمعة ما خطاتنيش نهار تهبط و عشرة تِجْمِدْ في القلب و تهبّطوا حشيش !!! سامحوني ماثرتش بش نلغي الديون كان تعرفوا قلبي في قدّاش من عشقة مديون و ماثرتش لاسقاط النظام كان تعرفوا قدّاش نظامكم كسّر من اعظام ! وماثرتش بش نعتصم كان تعرفوا قدّاش من مرّة وجيعتكم عملت فيّا اعتصام !!!
 و ماثرتش بش نحاسب اندراشكون كان تعرف قدّاش من مرّة حاسبوني من غير ما نخون !!! ثرت بش نحيا .
ثرت بش نكتب من غير ما يحقرني حدّ و يقلّي فاش تخنتب ؟ و يبدى الحبار يبكي و ينحب و يندب على الكلام الّي مهرّيه ! ثرت ايه نعم ثرت بش نولّي تونسي ما نحشمش لا من اصلي لا من امّاليه لا من الي حكمني و سيّب قمعوا فيّا ! ثرت بش نعنّق الماضي و نقلّوا فسّر للحاضر الهويّة غدوة كان طاح الليل نلقى روحي عارفة مليح الثنية !!!

ناموس يا كابوس !!

ماهو كل بلاد و ارطالها ، في جربوعستان بعد الثورة المباركة الي هبطتنا باركين، جاب ربي ما جاتش معظمة رانا متنا مالتزوفير متع العظم فمة حاجة انا متأكّدة الي هي تلمّ بين الشعب التونسي الكلّ شمالا و جنوبا، المناطق الداخليه و حتى الجيران دزاير و ليبيا راهو واصلهم الخير، هالحاجة الّي تلمّ بيناتناو وحّدت دموماتنا بعد ماشواتنا وعطاتنا على مشموتنا هي : الـــــــــــــــناموس ! يا حبيبي عالفرص : هيليكوبتتر اصلا!!! هــــــاي الجوانح : جرّاية ! و حصريا من مكتسبات الثورة المباركة : ناموس ماد اين تونيزيا يمصّ ايه نعم يمصّ بش ما نقولش يرضع و تولي فمة ايحاهات زنسية و ترصيلنا مشكي بينا و مصنصرين هههع    فارح بالثورة ناموس السنة، قعد هو ما ركبش علينا و مصّلنا دمّنا، والديه انجع مالقنّاصة يختار بلايص ليكس؛ تبدى من غدوة تجرش كيف المجراب و الناس تغزرلك و تقول " يلطف بينا ما تدوّشش!!!" و كان بدى راجل في بيرو يلزمو يردّ بالو لا تمشيلو قضية تحرّش ا يه نعم ناموس السنة خذى انخراط في حزب الديك ههههع كان يكمّل يلتحق بشباب حركة النهضة كتائب الشهيد روكو سي فريدي ماهو البلاد تنجم تولّي بورديل و الفضل يعود لشكون تره ؟؟؟ هيجة الناموس عالمواطن ماهي اسبابها  من يختفي وراءها ؟ الفضل يعود لاضراب اعوان التنظيف الي دام شهرين على ابواب صيف فمتلا ! عشعشوه مليح و التونسي ماهي ماكلتو ماشالله بيو و خفيفة جانا ناموس ضارب الكسكسي و المقرونة و الملوخية انت تصرفقو و هو يقلك اياه زيدني مبنو المساج !!! يا بو ڨلب ناموس يريززتيي للفليتوكس !!! عندو مناعة شي عجب و نورمال بعدة شهيرين يصك في غاز لاكريمو فسد متع فيولة آش مزال ينفع فيه ؟؟؟ هذا النووي و شوف و شوف  ...

الخلاصة اضراب الزبلة هانا توة بدينا نشموّ في روايحو البنينة و مابالك التيليكوم و الديوانة : صيف السنة و قيل صيف العزى !!!

العاشق الي ...

مشيت ليوم عالبحر شكيتلو بلّي هجر و بكيتو مالخطر وسّع بالو و سمعني و نسّاني فلّي ليّعني مسح دموعي من عينيا كيف موجتو هربت بيّا و دفّاني و غطّاني كي تراب الارض ماعاد اوطاني و سمعّني حسّ الغشّ في جواجيه كي ضربت الموجة الصخر و دخلت فيه كفّ و مشطة : ملاّ طبيعة ملاّ سخطة !!!

العاشق الّي ما بكاش ما حياش ... الي ماطارش عليه النوم عاشق مهموم ... العاشق الي ما ماتش في الليل الف مرّة عشقو ذرّة ... العاشق الي مالوجيعة مازارش طبيب عندو خيال و ما عندو حبيب ....

العاشق الي ما خان و ديما العشقة صان .... عاشق صنعو شكسبير و كيف نقراه كعاشقة جكسبير ... و الهوى ما يدخلش نتخنق ...قلبي وقتها يتمحق ، يتسحق اما العشق يستحقّ ... العاشق الي ما شدّتو الغصّة و هو هايم في الشوارع الي دمعتو ما مسحتش الكياسات عاشق متع ڨيترينات ... العاشق الي ما طيّبش قهوة مع الفجر و حرق صوابعو موش عاشق صحيح اما يحاول يعمل في المليح !!!

العاشق الي ما تخيلّش خيال حبيبو في كلّ بلاصة كالمهبول عاشق موش للعشق رسول ... العاشق الي ما قلبو تشقّ و هبط جير وياجور عاشق قلبو كنتول حجر مجرّد خبر في جريدة موش قصيدة تخلّي حبيبو يرعش كيف الجّْرِيدة ... العاشق الّي ما غنّاش " صحيح الهوى غلاّب" عاشق كذّاب و الّي م كمّلهاش ب "انا املي في حبّك هو الحبّ" عاشق يموت عالنْصُبْ : يشري و هو ماشي و يلوّح في شطر الثنيّة عشقتو البالحة المزيّفة !!!

العاشق الّي عقاب الليل ما بكاش و ما كسّرش الكاس عاشق عشقو عايش في احباس ... دازز عليها لاباس و هو اللاّ فيه مقياس : لا عينو ياكل، لا عينو يشرب، لا عينو يبعد، لاعينو يقرب، لا عينو يحيا لا عينو يموت و خايف مالموت تحرمو مالعينين الّي بيهم يتنفّس ... العاشق الّي ما ضاعش اعرفوا الّي قلبو ما طاعش و يعيش ديما بين البينين :

بيني و بينك .... لا عاد نسأل ... لا نقول فينك ؟؟

بجهلهم نافينك و يا ريتني منفاك !!!!

ليوم مشيت عالبحر و حكيتلو عالعاشق الّي هجر.تعرفوا آش جاوبني؟ ملاّ سخطة ملاّ طبيعة!!! :"احمد ربّي ما حرقش! ما يلزم عاشق على عاشق البقاء:العشق يولّي شقاء ما يفرض عاشق على عاشق اللقاء:العشق يولّي عصا .مايلزم العاشق عشيقو : يولّي ليوم صاحبو غدوة رفيقو و بعدو يولّي ما ثمّاش و عشقهم يولّي ما يحياش. ما يشدّ العاشق عشيقو : العشق يولّي حبس كابوس و تتمنّاو وقتها تفيقوا احمد ربّي ما حرقش و كلاه الحوت غدوة تنساه و تنسى الموت !"

الى الساقط الحرّ !!

ريتو ونعرف وين و انا ماشية لفتني لحنين وقفت اما الدنيا موش فيلم !!!!قدمت تبسمت تببهذلت تبعثرت قدمت وقفت وخرت مشى مكسح قلبو يعطيه عزاء!!!!

 

كرهت نهج القاهرة ليوم قهرني !!!